រថយន្ដកាមរីឆ្លាមបើកធ្លាក់ប្រឡាយ ខណៈភ្លៀងខ្លាំងលិចផ្លូវ

រថយន្តម៉ាកកាមរីឆ្លាម១គ្រឿងបើកធ្លាក់ចូលប្រឡាយអមផ្លូជាតិ៤ ខណៈពេលមេឃកំពុងធ្លាក់ភ្លៀងខ្លាំងទឹកលិចផ្លូវ ទំនងអ្នកបើកបរមើលមិនដឹងថាចំណុចនោះមានប្រឡាយ។ ប៉ុន្តែជាសំណាងល្អពុំបានបណ្ដាលឲ្យអ្នកបើកបររថយន្តរងរបួសនោះទេ រួចអ្នបើបរបានបើកទ្វារចាកចេញទៅបាត់ស្រមោល ដោយទុករថយន្តចោលនៅកន្លែងកើតហេតុនោះ។

បើតាមកាមេរ៉ាសុវត្ថិភាពរបស់ផ្ទះប្រជាពលរដ្ឋ ឧប្បត្តិហេតុនោះបានកើតឡើងនៅវេលាម៉ោង៤និង៣០នាទីជិតភ្លឺថ្ងៃទី៥ ខែតុលា ឆ្នាំ២០២៤ នៅតាមបណ្ដោយផ្លូវជាតិលេខ៤ ស្ថិតនៅក្នុងភូមិត្រពាំងទួល សង្កាត់កំបូល ខណ្ឌកំបូល រាជធានីភ្នំពេញ ។

រថយន្តម៉ាកកាមរីឆ្លាម១គ្រឿងពណ៍ទឹកមាសពាក់ស្លាកលេខភ្នំពេញ2G-4898 ហើយអ្នកបើកបរមិនត្រូវបានគេស្គាល់អត្តសញ្ញាណនោះទេ។ បើតាមសម្តីរបស់អ្នកលក់ដូរក្បែរនោះបាននិយាយថា គាត់មិនបានឃើញ ឬដឹងថារថយន្តខាងលើធ្លាក់ប្រឡាយទឹកនៅមុខផ្ទះគាត់តាំងពីពេលណាមកនោះទេ ស្រាប់តែព្រឹកឡើងឃើញធ្លាក់ប្រឡាយបាត់ទៅហើយ។

បន្ទាប់មកគាត់បានឆែកមើលកាមេរ៉ាសុវត្ថិភាព ក៏បានឃើញនៅវេលាម៉ោង៤និង៣០នាទីជិតភ្លឺរថយន្តនោះបើកបរធ្វើដំណើរក្នុងទិសដៅពីកើតទៅលិច ក្នុងពេលភ្លៀងលិចផ្លូវ ហើយទំនងមើលផ្លូវមិនឃើញក៏ធ្លាក់ចូលប្រឡាយទឹកនោះតែម្ដង ។ ក្រោយមកអ្នកបើកបរបានចាកចេញទុករថយន្តចោលនៅទីតនៅទីតាំងកើតហេតុតែម្តង។

រហូតដល់វេលាម៉ោង៧ព្រឹកថ្ងៃដដែលពុំទាន់ឃើញអ្នកបើកបររថយន្តខាងលើទៅទាញយករថយន្តរបស់ខ្លួនចេញពីក្នុងប្រឡាយនោះនៅឡើយទេ ហើយនគរបាលខណ្ឌកំបូលបានស្ទូចយករថយន្តនោះទៅរក្សាទុកបណ្ដោះអាសន្នរង់ចាំប្រគល់ជូនម្ចាស់នៅពេលក្រោយ៕

អត្ថបទ៖ សំណាង