ចរាចរណ៍

២ នាក់ បងប្អូន ចេញពីធ្វើការជិះម៉ូតូទៅទិញម្ហូប ត្រូវរថយន្តដឹកដីកិនបែកក្បាលស្លាប់ម្នាក់

បានផុស

៥ ខែ មុន

នៅ

ថ្ងៃសុក្រ ៨ វិច្ឆិកា ២០២៤

ដោយ

បុរសម្នាក់ ដឹកគ្នាចេញពីកន្លែងធ្វើការទៅរកទិញម្ហូប ត្រូវរថយន្តដឹកដីបុក បណ្ដាលឲ្យម្នាក់ ធ្លាក់ចូលក្រោមកង់រថយន្តកិនបែកក្បាលស្លាប់ភ្លាមៗ នៅនឹងកន្លែង និងម្នាក់ទៀត រងរបួសស្រាល ចំណែករថយន្តបង្ក បានបើកគេចចេញពីកន្លែងកើតហេតុបាត់ស្រមោល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ៨ និង ៤៥ នាទីយប់ ថ្ងៃទី ០៧ ខែវិច្ឆិកា ឆ្នាំ ២០២៤ ស្ថិតតាមបណ្ដោយផ្លូវថ្មី ក្រោយផ្សារទំនើប ÆON មានជ័យ សង្កាត់ជើងឯក ខណ្ឌដង្កោ រាជធានីភ្នំពេញ។

បើតាមប្រភពពីសាច់ញាតិរួមដំណើរជាមួយបានឲ្យដឹងថា មុនពេលកើតហេតុ ខ្លួនជាមួយនឹងជនរងគ្រោះ បានជិះម៉ូតូមួយគ្រឿង ម៉ាក HONDA Dream ឆ្នាំ ២០១៨ ពណ៌ខ្មៅ ពាក់ផ្លាកលេខ កណ្ដាល 1W-7199 ចេញពីកន្លែងធ្វើការទៅរកទិញម្ហូបហូប បើកបរក្នុងទិសដៅពីលិចទៅកើត លុះមកដល់ចំណុចកើតហេតុ ស្រាប់តែរថយន្តដឹកដីបត់ត្រឡប់ក្រោយភ្លាមៗ បណ្ដាលឲ្យជនរងគ្រោះជាអ្នកឌុបចាប់ហ្វ្រាំងមិនទាន់ទៅបុកពេញទំហឹងធ្លាក់ចូលក្រោមកង់រថយន្តកិនបែកក្បាលស្លាប់ភ្លាមៗ។ ចំណែកម្នាក់ទៀត រងរបួសស្រាល ភ្លាមៗនោះ រថយន្តបានបើករត់គេចគេចចេញពីកន្លែងកើតហេតុបាត់ស្រមោល។

តាមការបញ្ជាក់ពីសាច់ញាតិ ជនរងគ្រោះមានឈ្មោះ ឆេង ថាលៀស ភេទប្រុស អាយុ ៣១ ឆ្នាំ មានស្រុកកំណើត ឃុំហាន់ជ័យ ស្រុកឆ្លូង ខេត្តក្រចេះ។

ក្រោយពេលកើតហេតុសមត្ថកិច្ចជំនាញចរាចរណ៍ផ្លូវគោក នៃអធិការដ្ឋាននគរបាលខណ្ឌដង្កោ ចុះមកធ្វើការវាស់វែងយកម៉ូតូទៅរក្សាទុកសិន ដើម្បីស្រាវជ្រាវរករថយន្តបង្កមកដោះស្រាយ និងបន្តតាមនីតិវិធីច្បាប់ ចំណែកឯសពជនរងគ្រោះប្រគល់ជូនសាច់ញាតិយកទៅធ្វើបុណ្យតាមប្រពៃណី៕

អត្ថបទ ៖ ម៉េង