នគរបាលស្រុកស្នួល ស្រាវជ្រាវឃាត់រថយន្តមួយគ្រឿងនៅក្នុងក្រុមហ៊ុនចម្ការកៅស៊ូ សុវណ្ណ វុទ្ធី ក្រោយបង្កគ្រោះថ្នាក់បណ្ដាលឲ្យមនុស្ស៥នាក់ស្លាប់

ដោយមានបទបញ្ជាពីលោកឧត្តមសេនីយ៍ទោ អ៊ូ សុប៊ុណ្ណា ស្នងការនគរបាលខេត្តក្រចេះ និងមានការសម្របសម្រួលពីព្រះរាជអាជ្ញារអមសាលាដំបូងខេត្ត កម្លាំងនគរបាលស្រុកស្នួល កាលពីវេលាម៉ោង ៩និង៣០នាទីព្រឹកថ្ងៃទី ៩ ខែវិច្ឆិកា ឆ្នាំ២០២៤ បានចុះស្រាវជ្រាវរកឃើញ និងឃាត់រថយន្ត ១ គ្រឿង ដែលព្យាយាមបើករត់គេច ក្រោយបង្កគ្រោះថ្នាក់ចរាចរ បណ្ដាលឲ្យមនុស្សក្មេងចាស់ ប្រុសស្រី ចំនួន ៥ នាក់ ស្លាប់យ៉ាងអនោចអធម៌នៅនឹងកន្លែងកើតហេតុ។

តាមការបញ្ជាក់ពីលោកវរសេនីយិ៍ឯក ចាន់ សុខគីម អធិការស្រុកស្នួល បានឲ្យដឹងថា កាលពីវេលាម៉ោង ២០ និង ៣០ នាទីថ្ងៃទី ០៨ ខែវិច្ឆិកា ឆ្នាំ២០២៤ មានករណីគ្រោះថ្នាក់ចរាចរណ៍មួយបង្កឡើងដោយរថយន្ត V1 ម៉ាក FUSO ពណ៍ស លាយ ក្រហម​ ពាក់ស្លាកលេខវៀតណាម​ 92C-157.48 បើកទៅបុកម៉ូតូកំពុងជិះបញ្ច្រាសទិសគ្នា នៅត្រង់ចំណុចចន្លោះបង្គោលគីឡូម៉ែត្រលេខ 11-12 ស្ថិតនៅភូមិ​ច្រាប ឃុំ​ 2ធ្នូ ស្រុកស្នួល ខេត្តក្រចេះ លើកំណាត់ផ្លូវជាតិលេខ 74 (ស្នួល-វៀតណាម)។

ក្រោយពេលបង្កហេតុ រថយន្តបង្កបានព្យាយាមបើករត់គេច ដោយយកទៅលាក់ទុកនៅក្នុងក្រុមហ៊ុនចំការកៅស៊ូឈ្មោះ សុវណ្ណ វុទ្ធី ចំណុចគីឡូម៉ែត្រ 107 ស្ថិតក្នុងភូមិ104 ឃុំគ្រញ៉ូងសែនជ័យ ស្រុកស្នួល ខេត្តក្រចេះ ដោយអ្នកបើកបរបានរត់គេចខ្លួនបាត់។

ប្រភព​សមត្ថកិច្ច​បាន​បញ្ជាក់ថា ជនរងគ្រោះទាំង ៥ ដែលស្លាប់​ ទី1- ឈ្មោះ​ ឆាន​ ស្រីនិច​ ភេទស្រី​ អាយុ18ឆ្នាំ ជនជាតិខ្មែរ មានទីលំនៅភូមិក្បាលស្នួល ឃុំស្នួល​ ស្រុកស្នួល​ ខេត្តក្រចេះ​ (ស្លាប់នៅកន្លែងកេីតហេតុ) ជាអ្នកបើកបរម៉ូតូ និង​អ្នករួមដំណើរមានឈ្មោះដូចខាងក្រោម៖
2- ឈ្មោះ​ ឆាន​ ស្រីនុត​ ភេទស្រី អាយុ 16ឆ្នាំជនជាតិខ្មែរ រស់នៅភូមិឃុំជាមួយគ្នា(ស្លាប់នៅកន្លែងកេីតហេតុ)
3- ឈ្មោះ​ ខេង យៀវ ភេទប្រុស អាយុ08ឆ្នាំជនជាតិខ្មែរ រស់នៅភូមិអូរគ្រៀង​ ឃុំអូរគ្រៀង​ ស្រុកសំបូរ​ ខេត្តក្រចេះ (ស្លាប់នៅកន្លែងកេីតហេតុ)
4- ឈ្មោះ​ ខេង ស៉ីនឿន​ ភេទប្រុស អាយុ06ឆ្នាំជនជាតិខ្មែរ រស់នៅភូមិអូរគ្រៀង​ ឃុំអូរគ្រៀង​ ស្រុកសំបូរ​ ខេត្តក្រចេះ (ស្លាប់នៅកន្លែងកេីតហេតុ)
5- ឈ្មោះ​ ខេង ប៉ិច ភេទស្រីអាយុ04ឆ្នាំជនជាតិខ្មែរ រស់នៅភូមិអូរគ្រៀង​ ឃុំអូរគ្រៀង​ ស្រុកសំបូរ​ ខេត្តក្រចេះ (ស្លាប់នៅកន្លែងកេីតហេតុ)
ធ្វេីដំណើរពីទិសខាងលិចទៅកើត។

ក្រោយពេលកើតហេតុ សពជនរងគ្រោះទាំង ៥ នាក់ខាងលើ ត្រូវបានសមត្ថកិច្ចប្រគល់ជូនក្រុមគ្រួសារយកទៅធ្វើបុណ្យតាមប្រពៃណី។ ចំពោះវត្ថុតាងរថយន្តបង្ក និងម៉ូតូ ត្រូវបានសមត្ថកិច្ចយកមករក្សាទុកជាបណ្តោះអាសន្តនៅអធិការរដ្ឋានស្រុកស្នួល ដើម្បីកសាងសំណុំរឿងបន្តនីតិវិធី៕

អត្ថបទ៖ ប្រុញ វិធិន