បុរសម្នាក់បើករថយន្ដបុករះម៉ូតូ និងរថយន្ដជាច្រើនគ្រឿងរបួសមនុស្ស៤នាក់

បុរសវ័យចំណាស់ម្នាក់បើករថយន្ត Lexus 470 ក្នុងល្បឿនលឿនបុករះម៉ូតូ និងរថយន្តជាច្រើនគ្រឿងបណ្ដាលឲ្យមនុស្សរងរបួសធ្ងន់ស្រាលចំនួន៤នាក់។

ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង១និង៤៥នាទីរសៀល ថ្ងៃទី២៧ ខែវិច្ឆិកា ឆ្នាំ២០២៤ ស្ថិតនៅតាមបណ្ដោយផ្លូវទេពផន (១៨២) កែង២២៩ ក្នុងសង្កាត់ផ្សារដេប៉ូទី១ ខណ្ឌទួលគោក រាជធានីភ្នំពេញ។

បើតាមប្រភពពីប្រជាពលរដ្ឋនៅកន្លែងកើតហេតុបានអោយដឹងថា មុនពេលកើតហេតុមានបុរសម្នាក់បើករថយន្តម៉ាក lexus470 ពណ៌ខ្មៅ ពាក់ស្លាកលេខស្វាយរៀង 2A-0788 តាមបណ្ដាយផ្លូវទេពផន ក្នុងទិសដៅពីកើតទៅលិច លុះមកដល់ចំណុចកើតហេតុផ្លូវបំបែកជាបួនបានបុកម៉ូតូមួយគ្រឿងម៉ាក wave ពណ៌ស ពាក់ស្លាកភ្នំពេញ 1HS-5516 កំពុងជិះឆ្លងផ្លូវដឹកកូនទៅរៀនបណ្ដាលឲ្យបុរសម្នាក់នឹងកូនៗរងរបួស និងបន្តបុករទេះលក់ម្ជូរ និងរថយន្តចំនួន៤គ្រឿងទៀតដែលជារបស់ទីតាំងហាងលក់រថយន្ត បណ្ដាលឲ្យមនុស្ស៣នាក់ផ្សេងទៀតរងរបួសផងដែរ។

ក្រោយពេលកើតហេតុកម្លាំងនគរបាលប៉ុស្តិ៍រដ្ឋបាលផ្សារដេប៉ូទី១ និងកម្លាំងនគរបាលផែនចរាចរណ៍នៃអធិការដ្ឋាននគរបាលខណ្ឌទួលគោកបានចុះមកដល់ទីតាំងកើតហេតុ និងបានបញ្ជូនមនុស្សរងរបួសទៅមន្ទីរពេទ្យ ចំណែករថយន្តបង្កបញ្ជូនទៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ចាត់ការតាមនីតិវិធី៕

អត្ថបទ៖ ម៉េង