ចរាចរណ៍

បុរសម្នាក់ បើករថយន្តលឿន បុកម៉ូតូ ២ គ្រឿង កំពុងឆ្លងស្តុប ស្លាប់ម្នាក់ និងរបួសធ្ងន់ ២ នាក់

បានផុស

១ ខែ មុន

នៅ

ថ្ងៃអាទិត្យ ៨ ធ្នូ ២០២៤

ដោយ

បុរសម្នាក់ បានបើករថយន្តម៉ាក lexus Nx200T តាមបណ្ដោយផ្លូវទេពផន ក្នុងល្បឿនយ៉ាងលឿន ជ្រុលចង្កូតទៅបុករះម៉ូតូចំនួន ២ គ្រឿង និង ដើមឈើ ១ ដើម បាក់ដល់គល់ បណ្ដាលឲ្យមនុស្សស្លាប់ម្នាក់ របួសធ្ងន់ ២ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង ២៣ និង ៣៥ នាទី ថ្ងៃទី ៧ ខែធ្នូ ឆ្នាំ ២០២៤ ចំណុចស្តុបសំណង់ ១២ ស្ថិតតាមបណ្ដោយផ្លូវលេខ ១៨២ សង្កាត់ទឹកល្អក់ទី ២ ខណ្ឌទួលគោក រាជធានីភ្នំពេញ។

ប្រភពព័ត៌មានបានឲ្យដឹងថា នៅមុនពេលកើតហេតុមានបុរសម្នាក់ដែលបើករថយន្តម៉ាក lexus Nx200t ពណ៌ស ពាក់ស្លាកលេខ ភ្នំពេញ 2BT-4562 ធ្វើដំណើរតាមបណ្ដោយផ្លូវលេខ ១៨២ ទិសដៅពីលិចទៅកើត ក្នុងល្បឿនយ៉ាងលឿន ដូចកាំជ្រួច ខណៈមកដល់ចំណុចស្តុបសំណង់ ១២ រថយន្តបានបុកម៉ូតូ ២ គ្រឿង កំពុងបើកឆ្លងភ្លើងស្តុប (ភ្លើងស្តុបពណ៌ខៀវ) ដោយ ១ គ្រឿង ម៉ាក PCX ពណ៌ស ពាក់ស្លាកភ្នំពេញ 1KF-2588 និង ម៉ូតូ ១ គ្រឿងទៀត ម៉ាក Let បណ្ដាលឲ្យម៉ូតូ PCX និង ម្ចាស់ម៉ូតូ ជាប់លើកញ្ចក់រថយន្តរហូតមកបុកផ្តាច់ដើមឈើ ១ ដើម បាក់ដល់ដី បណ្ដាលឲ្យបុរសម្ចាស់ម៉ូតូ PCX ស្លាប់ភ្លាមៗ នៅក្បែររថយន្ត និង រងរបួសធ្ងន់បុរស ២ នាក់ទៀត។ ចំណែករថយន្តរងការខូចខាតខ្ទេចមួយកំណាត់មុខមើលលែងយល់ និងដាច់ម៉ូតូ PCX ជា ២ កំណាត់ ផងដែរ។

ក្រោយពេលកើតហេតុកម្លាំងនគរបាល នៃអធិការដ្ឋាននគរបាលខណ្ឌទួលគោក បានចុះមកដល់ទីតាំងកើតហេតុ និងបានបញ្ជូនមនុស្សរងរបួសទៅមន្ទីរពេទ្យភ្លាមៗ។ ចំណែកជនបង្ក និងរថយន្ត បានឃាត់ខ្លួនបញ្ជូនទៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ចាត់ការតាមនីតិវិធី៕

អត្ថបទ ៖ ម៉េង