ករណី​គ្រោះថ្នាក់​ចរាចរណ៍រវាងរថយន្ត​ និងម៉ូតូ បណ្ដាលឱ្យឪពុក និងកូន២នាក់ស្លាប់បាត់បង់ជីវិត

ភ្នំពេញ ៖ បុរស​ម្នាក់​សង្ស័យ​បើកបរ​ក្នុងស្ថានភាពស្រវឹង រេ​ចង្កូត​ទៅ​បុក​ម៉ូតូ​ជន​រង​គ្រោះ កំពុងដឹកប្រពន្ធកូនជិះដើរលេងពេលល្ងាចបណ្ដាល​ឱ្យ​ជនរងគ្រោះ៣នាក់ស្លាប់​ឪពុក​កូន ចំណែក​ម្ដាយ​រង​របួសធ្ងន់​ដាច់​ជើងម្ខាង អ្នកបេីកបររថយន្តបង្កត្រូវបានសមត្ថកិច្ចឃាត់ខ្លួន។

គ្រោះថ្នាក់ចរាចរណ៍នេះកើតឡើងពេលល្ងាច ថ្ងៃទី១០ ខែមករា ឆ្នាំ២០២៥ តាម​បណ្តោយ​ផ្លូវ​មហាវិថី​៦០​ម៉ែត្រ ជិត​ផ្សារ​ទំនើប​អ៊ី​ន​អន​៣ ក្នុង​សង្កាត់​ជើងឯក ខណ្ឌដង្កោ រាជធានី​ភ្នំពេញ។

បើ​តាម​ប្រភព​ពី​កន្លែង​កើត​ហេតុ​បាន​ឱ្យ​ដឹង​ថា មុន​ពេល​កើតហេតុ គេ​បាន​ឃើញ​បុរស​ម្នាក់​បេីកបររថយន្តមួយគ្រឿងម៉ាកតាកូម៉ា ពណ៌ទឹកប្រាក់ ពាក់ស្លាកលេខ ភ្នំពេញ 2BS-1023 ធើ្វដំណើរ​ក្នុង​ល្បឿនលឿន​ពី​ទិសដៅ​ពីត្បូងទៅជើង ខណៈ​មក​ដល់ចំណុចកើតហេតុ​បាន​រេចង្កូត​ទៅ​បុក​ជា​មួយម៉ូតូមួយគ្រឿង ពាក់ស្លាកលេខ ភ្នំពេញ 1II-2330 គ្រឿង​ជិះ​បញ្ច្រាស​ទិស​គ្នា​ដែល​កំពុង​ដឹកកូនជិះដើរលេងពេលល្ងាច បណ្ដាលឱ្យជនរងគ្រោះជិះម៉ូតូមួយគ្រួសារប៉ើងជាច្រើនម៉ែត្រ។ ចំណែក​រថយន្ត​ក្រឡាប់​ជា​ច្រើន​ត្រឡប់ ភ្លាមៗ​អ្នក​ធើ្វ​ដំណើរ​ឆ្លង​កាត់​បានទាក់ទង​ហៅរថយន្តសង្រ្គោះបន្ទាន់មក​ជួយ​ជន​រងគ្រោះ តែ​ជាអកុសល​ឪពុក​បាន​ស្លាប់ភ្លាមៗនៅនឹងកន្លែងកើតហេតុ កូនប្រុសស្រី២នាក់ទៀតបានស្លាប់​ពេលទៅដល់មន្ទីរពេទ្យ នឹងម្ដាយរងរបួសធ្ងន់ដាច់ជើងម្ខាងកំពុងសង្រ្គោះបន្ទាន់។

ក្រោយ​កេីតហេតុ​សមត្ថកិច្ច​មូលដ្ឋាន​បាន​សហការ​ជាមួយនគរបាលជំនាញចរាចរ​ចុះ​វាស់វែង​អូស​យក​រថយន្តនិងម៉ូតូរួមជាមួយ​អ្នកបើកបរ​រថយន្ត​បង្ក​ទៅ​កាន់ការិយាល័យ​ចរាចរផ្លូវគោក​នៃ​ស្នងការ​ដ្ឋាននគរបាលរាជធានីភ្នំពេញ​រង់ចាំ​ដោះស្រាយ​តាម​នីតិវិធីច្បាប់ ចំណែក​អ្នករងរបួសត្រូវបាន បញ្ជូនទៅកាន់មន្ទីរពេទ្យ ភ្លាមៗ៕

អត្ថបទ ៖ ម៉េង