អាជ្ញាធរសង្កាត់ស្ទឹងមានជ័យ១ ដាក់កម្លាំងឃាត់អ្នកបើកបរបញ្ច្រាសផ្លូវ

អាជ្ញាធរសង្កាត់ស្ទឹងមានជ័យទី១ កាលពីល្ងាចថ្ងៃទី៤ ខែកុម្ភៈ ឆ្នាំ២០២៥ បានដាក់ពង្រាយកម្លាំងនៅលើកំណាត់ផ្លូវលេខ២១៧ ដើម្បីឃាត់អប់រំណែនាំដល់អ្នកបើកបរបញ្ច្រាសផ្លូវធ្វើឲ្យមានការកកស្ទះចរាចរណ៍។ ការដាក់កម្លាំងពង្រាយហាមឃាត់អ្នកបើកបរបញ្ច្រាសផ្លូវនេះ គឺដោយសារមានប្រជាពលរដ្ឋមួយចំនួនបានបើកបរបញ្ច្រាសទិសដៅចរាចរណ៍ ដែលជាបញ្ហានាំឲ្យមានការកកស្ទះចរាចរណ៍ខ្លាំង ជាពិសេសនៅចំណុចមុខវត្តស្ទឹងមានជ័យ។

លោក ជា សារ៉េត ចៅសង្កាត់ស្ទឹងមានជ័យទី១ បានអោយដឹងថា ការដឹកនាំកម្លាំងចុះទប់ស្កាត់អ្នកបើកបរបញ្ច្រាសផ្លូវ ២១៧ សង្កាត់ស្ទឹងមានជ័យទី១ លោកបានដាក់កម្លាំងពង្រាយចំនួនបួនគោលដៅ ទី១ នៅមុខវត្តស្ទឹងមានជ័យ
ទី២ នៅច្រកចូលសង្កាត់ ទី៣ ច្រកចូលប៉ុស្តិ៍ និងទី៤ នៅមុខសាលា ណតឡាញ។

លោកចៅសង្កាត់បានបន្តទៀតថា ចំពោះម៉ូតូប្រជាពលរដ្ឋដែលជិះបញ្ច្រាសផ្លូវជាច្រើនគ្រឿងនោះ លោកមិនមានសិទ្ធិក្នុងការឃាត់ផាកពិន័យនោះទេ គ្រាន់តែឃាត់ហើយធើ្វការណែនាំ និងធ្វើការអប់រំរួចឲ្យត្រឡប់ជិះទៅក្រោយវិញ។ ជាមួយគ្នាអាជ្ញាធរសង្កាត់ស្ទឹងមានជ័យទី១ សូមឱ្យប្រជាពលរដ្ឋចូលរួមសហការបញ្ឈប់ការជិះបញ្ច្រាសទិសចរាចរណ៍បន្តទៀត ជៀសវាងបង្កមានការកកស្ទះចរាចរណ៍ និងអាចកើតមានករណីគ្រោះថ្នាក់ចរាចរណ៍ជាយថាហេតុ៕

អត្ថបទ៖ ម៉េង