ម្ចាស់រថយន្ដកែច្នៃមួយគ្រឿងសន្យាជួសជុលស្ពាន​ឈើ​មួយខ្សែឡើងវិញ ក្រោយបើកឆ្លងកាត់បណ្ដាលឲ្យបាក់ធ្វើដំណើរលែងរួច

ស្ពានឈើមួយខ្សែនៅចំណុចភូមិអូរក្រូច ឃុំតាតោក ស្រុកសំទ្បូត ត្រូវបានបាក់ដោយសាររថយន្ដកែច្នៃដឹកឈើមួយគ្រឿងបើកឆ្លកកាត់ ខណៈម្ចាស់រថយន្ដថានឹងជួសជុលឲ្យដូចដើមវិញ។

ករណីគ្រោះថ្នាក់ចរាចរណ៍នេះបានកើតឡើងកាលពីថ្ងៃទី១៩ ខែឧសភា ឆ្នាំ២០២៥ វេលាម៉ោងប្រហែល ១២យប់ នៅចំណុចភូមិអូរក្រូច ឃុំតាតោក ស្រុកសំទ្បូត ខេត្តបាត់ដំបង។ បន្ទាប់ពីសមត្ថកិច្ចចុះពិនិត្យ គឺសង្កេតឃើញថា ម្ចាស់រថយន្តច្នៃឈ្មោះ រឿន សុខា (ហៅយាយមាន់) ភេទស្រី អាយុ៥៥ឆ្នាំ រស់នៅភូមិកញ្ចាំង ឃុំស៊ុង ស្រុកសំឡូត។    

សមត្ថកិច្ចបានអះអាងថា ស្ពានឈើនោះមានប្រវែង ២០ គុណ ៤ម៉ែត្រ បាក់ប្រវែង ៣ម៉ែត្រ គឺជាស្ពានដែលប្រជាពលរដ្ឋឆ្លងកាត់ពីជនបទ មកទីរួមស្រុកសំឡូត។ ក្រោយពេលចុះសាកសួរ និងត្រួតពិនិត្យរួច ម្ចាស់រថយន្តខាងលើបានសន្យាថានឹងជួសជុសស្ពានខាងលើឲ្យវិញនៅថ្ងៃនេះ៕

អត្ថបទ៖ សោ និយមរ័ត្ន