យុវជន៣នាក់​ជិះ​លឿន​ចាប់​ហ្វ្រាំង​រអិល​ជ្រុល​ទៅបុក​រថយន្ត​ បណ្ដាល​ឱ្យ​រងរបួសធ្ងន់ស្រាល

ភ្នំពេញ ៖ យុវជន០៣នាក់ ជិះម៉ូតូលឿនរអិលទឹកភ្លៀង ចាប់ហ្រ្វាំងមិនជាប់ ជ្រុលបុករថយន្ត បណ្តាល​ឱ្យ​របួសធ្ងន់ម្នាក់ និងស្រាល០២នាក់ បញ្ជូនទៅមន្ទីរពេទ្យ។

ហេតុការណ៍​នេះ​កើត​ឡើង​កាល​ពី​វេលាម៉ោង ០៨ នឹង ៤០នាទីយប់ថ្ងៃទី ២៥ ខែមិថុនា ឆ្នាំ២០២៥ នៅចំណុចក្នុងតំបន់កោះពេជ្រ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។

តាម​ប្រភពព័ត៌មានពីប្រជាពលរដ្ឋបាន​ឱ្យ​ដឹង​ថា មុនកើតហេតុគេ​បាន​ឃើញ​រថយន្ត​មួយគ្រឿងម៉ាក FORD XLT ពណ៌ស ពាក់ស្លាកលេខ ភ្នំពេញ 2BY-7842 បើក​ពី​ត្បូងទៅជើង ក្នុងល្បឿនមធ្យម លុះមកដល់ចំណុចផ្លូវបំបែកជាបួន រថយន្តបានឆ្លងជិតផុតទៅហើយ ក៏ស្រាប់តែមានយុវជន០៣នាក់ បានជិះម៉ូតូមួយគ្រឿងម៉ាក ហុងដាឌ្រីម ឆ្នាំ២០២២ ពណ៍ខ្មៅ ពាក់ស្លាកលេខ កំពង់ធំ 1R-5481 ឌុបគ្នា ទិសដៅពីកើតទៅលិច ក្នុងល្បឿនលឿន ស្របពេលមេឃកំពុងធ្លាក់ភ្លៀង ក៏ជ្រុលបុកផ្ទប់ជាមួយទ្វាររថយន្តខាងក្រោយ ផ្នែកខាងស្តាំ រងការខូចខាត នឹងបណ្តាលអោយយុវជនទាំង០៣នាក់នោះ រងរបួសធ្ងន់ម្នាក់ នឹងស្រាល០២នាក់ បញ្ជូនទៅមន្ទីរពេទ្យភ្លាមៗផងដែរ។

ក្រោយកើតហេតុ សមត្ថកិច្ច​មូលដ្ឋាន​បាន​ធ្វើ​ការ​វាស់វែងយករថយន្ត នឹងម៉ូតូ ទៅរក្សាទុករងចាំដោះស្រាយពេលក្រោយ៕

អត្ថបទ ៖ រដ្ឋា