តុលាការសម្រេចចោទប្រកាន់អ្នកបើករថយន្ដក្រោមជាតិស្រវឹងបង្កគ្រោះថ្នាក់បណ្ដាលឲ្យមានអ្នកស្លាប់នៅលើស្ពានជ្រោយចង្វារ

តំណាងអយ្យការអមសាលាដំបូងរាជធានីភ្នំពេញ កាលពីថ្ងៃទី៣ ខែកក្កដា ឆ្នាំ២០២៥ បានសម្រេចចោទប្រកាន់លើអ្នកបើកបររថយន្ដស្ថិតក្រោមជាតិស្រឹង និងបង្កគ្រោះថ្នាក់បណ្ដាលឲ្យមានអ្នកស្លាប់នៅលើស្ពានជ្រោយចង្វារ កាលពីថ្ងៃទី១ ខែកក្កដា ឆ្នាំ២០២៥។

ជនត្រូវចោទមានឈ្មោះ យួន វឌ្ឍនៈបញ្ញា ភេទប្រុស អាយុ ២២ឆ្នាំ ដែលជាអ្នកបើកបររថយន្ត ម៉ាក TOYOTA PRIUS ត្រូវវបានចោទប្រកាន់ពីបទ​ បើកបរបង្កគ្រោះថ្នាក់ចរាចរណ៍បណ្តាលឱ្យអ្នកដទៃស្លាប់ តាមមាត្រា ៨៥ នៃច្បាប់ ស្តីពីចរាចរណ៍ផ្លូវគោក និងបញ្ជូនសំណុំរឿងទៅចៅក្រមស៊ើបសួរនៃសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធី។

តាមសេចក្ដីប្រការព័ត៌មានរបស់អ្នកនាំពាក្យនៃអយ្យការអមសាលាដំបូងរាជធានីភ្នំពេញ បុគ្គល់ឈ្មោះ យួន វឌ្ឍនៈបញ្ញា បានបើករថយន្តម៉ាក TOYOTA PRIUS ពណ៌ស ពាក់ផ្លាកលេខ ភ្នំពេញ 2CD-4071 បើកបរក្នុងស្ថានភាពស្រវឹងមានអត្រាជាតិអាល់កុល០,៦១Mg/L បុកពីក្រោយម៉ូតូសណ្តោងរ៉ឺម៉ក ០១គ្រឿង ម៉ាក HONDA WAVE ពណ៌ខៀវ ពាក់ផ្លាកលេខ សៀមរាប 1C-3581 បណ្តាលឱ្យអ្នកបើកបរម៉ូតូសណ្តោងរ៉ឺម៉កឈ្មោះ គ្រី សិលា ភេទប្រុស អាយុ ៣៣ឆ្នាំ ស្លាប់ក្រោយ ពេលបញ្ជូនទៅសង្គ្រោះនៅមន្ទីរពេទ្យ៕

អត្ថបទ៖ រដ្ឋា