គេហទំព័រ កម្ពុជាថ្មី

ប្រកាសបញ្ចូលសមាជិកគណបក្សប្រជាជនកម្ពុជាខណ្ឌដូនពេញចំនួន៩៩៩នាក់

kang_sophak@yahoo.com (KANG SOPHAK) — Thu, 09 Sep 2010 08:52:40 +0000

ភ្នំពេញ ៖ គណបក្សប្រជាជនកម្ពុជា ខណ្ឌដូនពេញបានប្រកាសបញ្ចូលសមាជិកថ្មីចំនួន៩៩៩នាក់ ទៀត កាលពីព្រឹកថ្ងៃទី០៩ ខែកញ្ញា ឆ្នាំ២០១០ នៅក្នុងបរិវេណវត្តស្រះចក ក្រោមអធិបតីភាព នាយឧត្ដមសេនីយ៍ផ្កាយមាស៤ ហ៊ីង ប៊ុនហៀង និងលោកម៉ប់ សារិន អនុប្រធានប្រចាំការគណបក្សប្រជាជនរាជធានី ភ្នំពេញ និងលោកសុខ សម្បត្តិ ប្រធានគណបក្សប្រជាជនខណ្ឌដូនពេញ។

លោកសុខ សម្បត្តិ ប្រធានគណបក្សប្រជាជនខណ្ឌដូនពេញ បានលើកឡើងថា យើងទាំងអស់គ្នាធ្លាប់បានដឹងនិងឃើញជាក់ស្ដែងរួចហើយ អំពីសមិទ្ធផល ដ៏ច្រើនសន្ធឹកសន្ធាប់ នៅគ្រប់ច្រកល្ហក ទូទាំងព្រះ រាជាណាចក្រកម្ពុជា សុទ្ធសឹងកើតចេញពីការអភិវឌ្ឍ ដោយគណបក្សប្រជាជនកម្ពុជា ដែលមានសម្ដេចទាំង ៣ ជាប្រមុខដឹកនាំដ៏ត្រឹមត្រូវ និងឈ្លាសវៃ។

ក្នុងពិធីនោះដែរ នាយឧត្ដមសេនីយ៍ ផ្កាយមាស៤ ហ៊ីង ប៊ុនហៀង បានមានមតិសំណោះសំណាល ជាមួយសមាជិក សមាជិកា គណបក្សប្រជាជនកម្ពុជាខណ្ឌដូនពេញ និងបានឧបត្ថម្ភស៊ីម៉ងត៍ចំនួន១០០តោន និងថវិកា៥០លានរៀលផងដែរ ដល់វត្តស្រះចក៕

វាយប្លន់យកកាបូបលុយបានហើយតែគេចមិនរួច ត្រូវប៉ូលិសក្របួចបាន៣នាក់

kang_sophak@yahoo.com (KANG SOPHAK) — Thu, 09 Sep 2010 08:29:18 +0000

ភ្នំពេញ ៖ ជនសង្ស័យ៣នាក់ ក្នុងនោះមានស្រីម្នាក់ផង ត្រូវបានកម្លាំងប៉ូលីសប៉ុស្ដិ៍ផ្សារថ្មីទី២ ស្រាវ ជ្រាវឃាត់ខ្លួនបន្តបន្ទាប់គ្នា ក្រោយពេលជនសង្ស័យទាំងនោះ ដែលមានបក្ខពួក៥នាក់ បានព្រួតគ្នាវាយប្លន់ យកកាបូបលុយពីគូរសង្សារមួយគូ ខណៈពេលអង្គុយសាសងគ្នាលើសួនច្បារ ក្បែរផ្សាររាត្រី។

ហេតុការណ៍វាយប្លន់នោះ កើតឡើងកាលពីម៉ោង២២យប់ថ្ងៃទី៧ ខែកញ្ញា ឆ្នាំ២០១០ នៅចំណុចលើសួនច្បារក្បែរផ្សាររាត្រី ផ្លូវលេខ១០៦ សង្កាត់វត្តភ្នំ ខណ្ឌដូនពេញ។

ជនរងគ្រោះមានឈ្មោះសៅ សំណាង ភេទប្រុស អាយុ២៣ឆ្នាំ មុខរបរជាងជួសជុលម៉ូតូ ស្នាក់នៅ សង្កាត់ទួលស្វាយព្រៃទី២ ខណ្ឌចំការមន បានបាត់លុយខ្មែរចំនួន២០ម៉ឺនរៀល និង១៥ដុល្លារ, អត្តសញ្ញាណ ប័ណ្ណ១សន្លឹក។

សមត្ថកិច្ចបានឲ្យដឹងថា នៅពេលកើតហេតុ ជនរងគ្រោះនិងមិត្តស្រីបាននាំគ្នាអង្គុយលេងនៅលើសួន ច្បារ ក្បែរផ្សាររាត្រី ពេលនោះស្រាប់តែមានជនល្មើសចំនួន៥នាក់ ក្នុងនោះមានស្រីម្នាក់ផង បានមកធ្វើសកម្មភាពចាប់វាយជនរងគ្រោះ ប្លន់យកកាបូបលុយ ហើយនាំគ្នាគេចខ្លួន។ ប៉ុន្តែជនរងគ្រោះបានដេញតាម ចាប់បានជនសង្ស័យម្នាក់ប្រគល់ឲ្យប៉ូលិស។

សមត្ថកិច្ចប៉ូលិសបានឲ្យដឹងថា ក្រោយឃាត់ខ្លួនជនសង្ស័យម្នាក់ហើយ ប៉ូលិសបានស្រាវជ្រាវចាប់ បានជនសង្ស័យ២នាក់ទៀត សរុបចំនួន៣នាក់ មានស្រីម្នាក់ យកមកកសាងសំណុំរឿងបញ្ជូនទៅតុលាការ ហើយជនសង្ស័យដែលមិនទាន់ចាប់បាន នឹងស្រាវជ្រាវជាបន្តទៀត៕

រស្មី

P.M ពីរក្រុមពាក់មុខយក្សដាក់គ្នា រឿងចាប់ឡានដឹកឈើ មួយបានលុយ មួយមិនបានលុយដេញចាប់មកវិញ ផ្អើលអ្នកក្រុង

kang_sophak@yahoo.com (KANG SOPHAK) — Thu, 09 Sep 2010 08:24:05 +0000

ខេត្តកណ្ដាល ៖ រថយន្តក្រុងមួយគ្រឿង បង្កប់ឈើគ្រញូងចំនួន១០បាវ ត្រូវបានកម្លាំង PM ស្នាក់ការ លេខ៥០១ គោលដៅតាមផ្លូវជាតិលេខ៥ ស្ទាក់ចាប់បាន រួចសម្រួលជាថ្នូរនឹងប្រាក់ ដោះលែងដោយបង្វែ ដានទៅផ្លូវលេខ៥១ ប៉ុន្តែត្រូវកម្លាំងPM ស្រុកពញ្ញាឮដឹង ខឹងមិនបានលាភសក្ការៈបញ្ជាកូនចៅឲ្យដេញចាប់ ផ្អើលប្រជាពលរដ្ឋធ្វើដំណើរតាមផ្លូវ។

ហេតុការណ៍នោះ បានកើតឡើងកាលពីរសៀលថ្ងៃទី៨ ខែកញ្ញា ឆ្នាំ២០១០ នៅតាមផ្លូវលេខ៥១ ស្ថិត ក្នុងព្រំប្រទល់ស្រុកពញាឮ ខេត្តកណ្ដាល និងព្រំប្រទល់ខេត្តកំពង់ស្ពឺ។ រថយន្តដឹកឈើគ្រញូងម៉ាកហ៊ីយិនដាយ ៤៥កៅអី ដឹកអ្នកដំណើរឲ្យក្រុមហ៊ុន GST ពាក់ស្លាកលេខ 3A 0872។

ប្រភពច្បាស់ការណ៍បានឲ្យដឹងថា នៅរសៀលថ្ងៃទី៨ ខែកញ្ញា ឆ្នាំ២០១០ មានរថយន្តរបស់ក្រុមហ៊ុន ដឹកអ្នកដំណើរ GST ដឹកឈើគ្រញូង១០បាវតូច ពីពោធិ៍សាត់ មកភ្នំពេញ លុះមកដល់ស្នាក់ការ PM លេខ៥០១ស្ទាក់ចាប់បានក៏សម្រួលគ្នា រួចបង្វែដានមិនឲ្យPM ស្រុកពញាឮដឹង ដោយធ្វើដំណើរតាមផ្លូវលេខ៥១ ឆ្ពោះទៅផ្លូវជាតិលេខ៤ ចូលមករាជធានីភ្នំពេញ ប៉ុន្តែដោយខឹងនឹងPM ស្នាក់ការលេខ៥០១ ទើបលោកសែ ហាក់ មេបញ្ជាការPMស្រុកពញាឮ បានដឹកនាំកូនចៅប្រដាប់ដោយអាវុធ និងរថយន្តសឺរ៉ែន ដេញតាមចាប់ រថយន្តក្រុងនោះបានតាមផ្លូវលេខ៥១ បញ្ជូនទៅរដ្ឋបាលព្រៃឈើកំពង់ស្ពឺតែម្ដង។

សាក្សីនិយាយថា ដោយការចែកលាភសក្ការៈមិនស្មើគ្នា ទើបមន្រ្តីPM ស្នាក់ការ៥០១ និងមន្រ្តីPM ស្រុកពញាឮ ពាក់មុខយក្សដាក់គ្នា ដេញតាមចាប់រថយន្តក្រុងដឹកឈើគ្រញូង ចំនួន១០បាវយ៉ាង សហាវបែបនេះ៕

ឌួង វីរៈជ័យ

គ.ជ.ប អំពាវនាវឲ្យពលរដ្ឋទៅពិនិត្យនិងចុះឈ្មោះបោះឆ្នោតចាប់ពីថ្ងៃទី១ ខែតុលា

kang_sophak@yahoo.com (KANG SOPHAK) — Thu, 09 Sep 2010 07:22:38 +0000

ភ្នំពេញ ៖ គណៈកម្មាធិការជាតិរៀបចំការបោះឆ្នោត បានអំពាវនាវឲ្យប្រជាពលរដ្ឋទាំងអស់ អញ្ជើញ ទៅពិនិត្យនិងចុះឈ្មោះបោះឆ្នោតសម្រាប់ឆ្នាំ២០១០ ចាប់ពីថ្ងៃទី១ ខែតុលា ដល់ថ្ងៃទី៣១ ខែធ្នូ ឆ្នាំ២០១០។

ការអំពាវនាវនេះ បានធ្វើឡើងនៅក្នុងសន្និសីទ សារព័ត៌មានមួយ កាលពីព្រឹកថ្ងៃទី៩ ខែកញ្ញា ឆ្នាំ២០១០ នៅសាលសន្និសីទរបស់គណៈកម្មាធិការជាតិរៀបចំការបោះឆ្នោត ដោយមានការចូលរួមពីអ្នកយក ព័ត៌មានជាតិនិងអន្តរជាតិព្រមទាំងតំណាងគណបក្សនយោបាយជាច្រើនដែលមានអាសនៈនៅក្នុងរដ្ឋសភា។

លោកអ៊ឹម សួស្ដី ប្រធានគណៈកម្មាធិការជាតិរៀបចំការបោះឆ្នោតបានមានប្រសាសន៍នៅក្នុងសន្និសីទនោះថា ដំណើរការចុះឈ្មោះនិងពិនិត្យបញ្ជីឈ្មោះបោះឆ្នោត នឹងចាប់ផ្ដើមដំណើរការចាប់ពីថ្ងៃទី១ ខែតុលាតទៅ។ ដូច្នេះសូមបងប្អូនប្រជាពលរដ្ឋអញ្ជើញទៅចុះឈ្មោះ និងពិនិត្យបញ្ជីឈ្មោះឲ្យបានគ្រប់ៗគ្នា នៅ ឃុំ-សង្កាត់របស់ខ្លួនដែលកំពុងរស់នៅ ដើម្បីមានសិទ្ធិចូលរួមនៅក្នុងការបោះឆ្នោត។

ចំណែកលោកទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត ក៏បានមានប្រសាសន៍ផងដែរថា ពីមួយឆ្នាំទៅមួយឆ្នាំ គណៈកម្មាធិការជាតិរៀបចំការបោះឆ្នោត បានខិតខំរិះរកមធ្យោ បាយនានា ដើម្បីធ្វើយ៉ាងណាឲ្យដំណើរការចុះបញ្ជីបោះឆ្នោតប្រព្រឹត្តទៅដោយល្អប្រសើរជាងពេលកន្លងមក។ ប៉ុន្តែទោះជាយ៉ាងណាក៏ដោយ លោកទេព នីថា បញ្ជាក់ថា នីតិវិធីនៃការចុះឈ្មោះបោះឆ្នោតនាពេល កន្លងមកមិនមានបញ្ហាអ្វីដែលធ្វើឲ្យរាំងស្ទះ ឬពិបាកក្នុងការចុះឈ្មោះទេ ហើយនីតិវិធីនេះ ក៏ទទួលបានការ គាំទ្រពីសំណាក់អង្គការផ្សេងៗ ដែលធ្វើការផ្នែកបោះឆ្នោតផងដែរ៕

កោះកែវ

បញ្ជារថយន្តបុកបង្គោលភ្លើងរាបដល់ដី២ដើម រួចទៅបុករថយន្តចតស្ងៀម និងបន្តបុកដើមឈើ លុះក្រឡាប់ផ្ងារជើងទើបស្ងប់ចិត្ត

kang_sophak@yahoo.com (KANG SOPHAK) — Thu, 09 Sep 2010 05:34:23 +0000

ភ្នំពេញ ៖ រថយន្តមួយគ្រឿង ដែលម្ចាស់វាជាជនស៊ីវិល តែប្រដាប់ដោយអាវុធច្រូងច្រាងពេញដៃ បាន បញ្ជាចង្កូតទៅបុកបង្គោលភ្លើងដែកបាក់រាបដល់ដី២ដើម រួចទៅបុករថយន្តចតនៅស្ងៀម និងបន្តទៅបុកដើម ឈើទៀត លុះក្រឡាប់ផ្ងារជើងទើបស្ងប់ចិត្ត ហើយអ្នកបើកបរ និងអ្នករួមដំណើរបានលូនចេញមកច្រងេងច្រងាង ដោយមានកាន់កាំភ្លើងវែងខ្លីគ្រប់ដៃទៀតផង។

ហេតុការណ៍នោះបានកើតឡើង កាលពីវេលាម៉ោង១០ និង៣០នាទី យប់ថ្ងៃទី៨ ខែកញ្ញា ឆ្នាំ២០១០ ត្រង់ចំណុចមុខសិប្បកម្មដែកយីហោ តាំងសុខហេង ស្ថិតក្នុងផ្ទះលេខ១០៥A ផ្លូវលេខ២៧១ សង្កាត់បឹងសា ឡាង ខណ្ឌទួលគោក។

រថយន្តបង្កហេតុម៉ាក ម៊ីតស៊ុយប៊ីស៊ី ត្រៃតុន ពណ៌ទឹកប្រាក់ គ្មានស្លាកលេខ បើកបរដោយជនស៊ីវិល ម្នាក់ និងមានអ្នកជិះជាមួយ២នាក់ផ្សេងទៀត ស្លៀកពាក់ស៊ីវិលដូចគ្នា ប៉ុន្តែទាំង៣នាក់ ប្រដាប់ដោយកាំភ្លើង៣ដើម និងមានកាំភ្លើង AK១ដើមទៀតផងដែរ។ ចំណែកឯរថយន្តរងគ្រោះម៉ាកតូយូតា តាកូម៉ា ពណ៌ស្កពាក់ស្លាកលេខ ភ្នំពេញ 2C.6122 កំពុងចតស្ងៀម ត្រូវរងការខូចខាតផ្នែកខាងក្រោយយ៉ាងខ្លាំង ដែលជាកម្មសិទ្ធិរបស់ម្ចាស់សិប្បកម្មដែកខាងលើ។

សាក្សីនៅកន្លែងកើតហេតុ បានឲ្យដឹងថា មុនពេលកើតហេតុរថយន្តបង្កបានបើកតាមបណ្ដោយផ្លូវ ២៧១ ពីលិចទៅកើត ក្នុងល្បឿនយ៉ាងលឿន ហើយក៏បានរេចង្កូតទៅបុកបង្គោលភ្លើងចំនួន២ដើមដែលធ្វើអំពីដែក បណ្ដាលឲ្យបាក់រាបដល់ដី។ សាក្សីនិយាយទៀតថា ដោយអំណាចល្បឿនខ្លាំងរថយន្តបង្កក៏បានបន្តទៅបុករថយន្តតូយូតា តាកូម៉ា ដែលកំពុងចតស្ងៀម នៅមិនទាន់អស់ចិត្តទៀត ទាល់តែបុកដើមឈើរួច រថយន្តប៉ើងក្រឡាប់ផ្ងារជើងទើបឈប់។ សាក្សីបន្តថា ពេលរថយន្តបង្កឈប់គេសង្កេតឃើញអ្នកបើកបរនិងអ្នកជិះរួមដំណើរជាមួយ បានលូនចេញតាមបង្អួចទ្វាររថយន្ត ដោយមានកាំភ្លើងកាន់គ្រប់ដៃ ចំណែកអ្នករួមដំណើរម្នាក់ទៀត បានវៀរចេញមកតាមក្រោយ ក៏មានកាំភ្លើងខ្លី និងកាំភ្លើងAKវែងមួយដើមទៀតផងដែរ ដែលអ្នកទាំង៣នាក់នោះ គេសង្ស័យថា ជាមន្រ្តីកងរាជអាវុធហត្ថ។

ហេតុការណ៍នេះធ្វើឲ្យអ្នកឃើញស្រៀវសាច់ ស្ងើចសរសើរថា រថយន្តបង្កបើកលឿនម្លឹងៗ បុកបង្គោលភ្លើងរាលរាបដល់បែបនេះ មិនបង្កឲ្យមានគ្រោះថ្នាក់ដល់នរណាម្នាក់សោះ នេះបានពិតជាអ្នកមានអំណាចពូកែខាងប្រណាំងឡានមែន!

សមត្ថកិច្ចបានឲ្យដឹងថា រថយន្តបង្កក្រោយពេលក្រឡាប់ផ្ងារជើងឡើងលើរួច ម្ចាស់វារត់យករួចខ្លួន អស់ ហើយរថយន្តត្រូវកម្លាំងប៉ូលិសស្ទូចយកទៅរក្សាទុកនៅចរាចរជើងគោករាជធានីភ្នំពេញ ដើម្បីរង់ចាំម្ចាស់រថយន្តចូលខ្លួនមកដោះស្រាយតាមផ្លូវច្បាប់៕

ស្រីរ័ត្ន

ដុតកំទេចគ្រឿងញៀន៤ប្រភេទ គិតជាប្រាក់តម្លៃប្រហែល១០ម៉ឺនដុល្លារអាមេរិក

kang_sophak@yahoo.com (KANG SOPHAK) — Thu, 09 Sep 2010 04:52:04 +0000

សៀមរាប ៖ គ្រឿងញៀនចំនួន៤ប្រភេទ ដែលមានយ៉ាម៉ា៩៥៩២គ្រាប់ មេតំហ្វេតាមីន ៤៩២កញ្ចប់ ហេរ៉ូអ៊ីន ៣កញ្ចប់, អ៊ិចស្ដាសីន ២គ្រាប់ ត្រូវបានអាជ្ញាធរខេត្តសៀមរាបដុតកំទេចចោល ដែលគិតជាទឹកប្រាក់ ប្រហែល ១០ម៉ឺនដុល្លារសហរដ្ឋអាមេរិក។

ពិធីដុតកំទេចគ្រឿងញៀននេះធ្វើឡើងនៅព្រឹកថ្ងៃទី៩ ខែកញ្ញា ឆ្នាំ២០១០ នៅក្នុងបរិវេណសាលាដំបូងខេត្តសៀមរាប-ឧត្ដរមានជ័យ ដែលមានការចូលរួមពីលោកសុខ លក្ខិណា អភិបាលរងខេត្ត, លោកទី សុវិនថាល់ ព្រះរាជអាជ្ញារង, លោកហុក ពៅ ចៅក្រម និងមន្រ្តីពាក់ព័ន្ធមួយចំនួនទៀត។

អាជ្ញាធរបានឲ្យដឹងថា ការដុតកំទេចគ្រឿងញៀននេះ គឺប្រមូលបានមកពីខេត្តចំនួន២ មានខេត្តសៀម រាប និងខេត្តឧត្ដរមានជ័យ ហើយការបង្រ្កាបបានគ្រឿងញៀនទាំងនេះ មានរយៈពេល២ឆ្នាំកន្លងមកហើយទើបតែពេលនេះធ្វើពិធីដុតកំទេចចោល៕

អ្នកនយោបាយថៃត្រូវបញ្ឈប់ល្បែងបំពុលបរិយាកាស

kang_sophak@yahoo.com (KANG SOPHAK) — Wed, 08 Sep 2010 12:41:37 +0000

ភ្នំពេញ ៖ គណៈកម្មាធិការជាតិបេតិកភណ្ឌពិភពលោកបានស្នើឲ្យឥស្សរជននយោបាយថៃ បញ្ឈប់ យុទ្ធនាការបំពុលបរិយាកាសដើម្បីបោកប្រាស់មតិសាធារណជន និងបញ្ឈប់សំដែងសុឆន្ទៈក្លែងក្លាយធ្វើឲ្យ មានការស្អប់ខ្ពើមរបស់ប្រជាជនថៃមកលើកម្ពុជា។

យោងតាមសេចក្ដីថ្លែងការណ៍របស់គណៈកម្មាធិការជាតិបេតិកភណ្ឌពិភពលោក(យូណេស្កូ) ដែល កម្ពុជាថ្មីទទួលបាននៅថ្ងៃទី០៨ ខែកញ្ញា បានរៀបរាប់ថា គណៈកម្មាធិការជាតិបេតិកភណ្ឌពិភពលោក បានកត់សំគាល់ថា កាលពីថ្ងៃទី៣១ ខែសីហា ឆ្នាំ២០១០ សារព័ត៌មាន The Nation របស់ថៃបានចុះផ្សាយថាលោក សុវិត ឃុនគិតទិ រដ្ឋមន្រ្តីក្រសួងធនធានធម្មជាតិនិងបរិស្ថានថៃ បានប្រាប់ដល់បណ្ដាញឃោសនាអំពីការសុំ ជួបប្រធានមជ្ឈមណ្ឌល បេតិកភណ្ឌពិភពលោក និងលោកស្រីអគ្គនាយកអង្គការយូណេស្កូ នៅទីក្រុងប៉ារីស ដើម្បីពិភាក្សាលើបញ្ហាចុះបញ្ជីប្រាសាទព្រះវិហារនៅក្នុងបញ្ជីបេតិកភណ្ឌពិភពលោក បន្ទាប់ពីកម្ពុជាបានដាក់ ឯកសាររបស់ខ្លួនដល់មជ្ឈមណ្ឌលនេះរួចហើយនោះ។

នៅក្នុងសេចក្ដីប្រកាសព័ត៌មានរបស់គណៈកម្មាធិការជាតិបេតិកភណ្ឌពិភពលោក ក៏បានរៀបរាប់យ៉ាងលំអិតពិស្ដារចំនួន៤ចំណុចធំៗដើម្បីបង្ហាញលោករដ្ឋមន្រ្តីស៊ូវិត ឃុនគិតទិ ឲ្យបានដឹង ហើយគណៈកម្មា ធិការជាតិបេតិកភណ្ឌពិភពលោក បានសំដែងការសោកស្ដាយយ៉ាងខ្លាំងចំពោះយុទ្ធនាការបំពុលបរិយាកាស មិនចេះឈប់ឈរនិងគ្មានការទទួលខុសត្រូវរបស់លោករដ្ឋមន្រ្តីស៊ូវិត ឃុនគិតទិ ខណៈដែលប្រទេសទាំង២ កំពុងស្ថិតនៅលើវិថីឆ្ពោះទៅកាន់ទំនាក់ទំនងធម្មតាទៅវិញទៅមក ដែលក្នុងនោះជំហានទី១គឺការបញ្ជូនឯក អគ្គរាជទូតរៀងៗខ្លួនឲ្យមកបំពេញបេសកកម្មវិញ៕

កោះកែវ

មន្រ្តីរដ្ឋបាលព្រៃឈើឈូងសមុទ្រដឹកនាំកម្លាំងបង្រ្កាបបានឈើមួយរថយន្តកែច្នៃ

kang_sophak@yahoo.com (KANG SOPHAK) — Wed, 08 Sep 2010 12:41:02 +0000

កំពត ៖ រថយន្តកែច្នៃកូរ៉េ១គ្រឿង ដឹកឈើប្រណិតសម្រុកទៅប្រទេសវៀតណាម ត្រូវបានកម្លាំង អធិការឈូងសមុទ្រ សហការជាមួយកងរាជអាវុធហត្ថលើផ្ទៃប្រទេសបង្រ្កាប ខណៈពេលធ្វើសកម្មភាពដឹក ជញ្ជូនឈើគ្រញូងបម្រុងឆ្លងដែនទៅប្រទេសវៀតណាម នៅវេលាម៉ោង២២ និង៣០នាទីយប់ ថ្ងៃទី៧ ខែកញ្ញា ឆ្នាំ២០១០ ស្ថិតនៅក្នុងភូមិខ្នាចរមាស ឃុំនរាយ ស្រុកឈូក ខេត្តកំពត។

មន្រ្តីរដ្ឋបាលព្រៃឈើបានឲ្យដឹងថា កម្លាំងរដ្ឋបាលព្រៃឈើបានសហការជាមួយនឹងកម្លាំងកងរាជអា វុធហត្ថលើផ្ទៃប្រទេស បានដាក់គោលដៅពួនស្ទាក់និងតាមឃ្លាំមើលជានិច្ចនូវបទល្មើសផ្សេងៗដែលប្រុងឆ្លង ដែនខុសច្បាប់។ ជាលទ្ធផលនៅយប់ថ្ងៃទី៧ កម្លាំងសមត្ថកិច្ចបានបង្រ្កាបឈើគ្រញូង១រថយន្ត ដែលមានអ្នក បើកបរឈ្មោះឃុន ហឿន ភេទប្រុស អាយុ៣១ឆ្នាំ រស់នៅភូមិព្រៃពក ឃុំដងទង់ ស្រុកដងទង់ ខេត្តកំពត និង កម្មករម្នាក់ទៀតឈ្មោះអៀវ កេត អាយុ៤៣ឆ្នាំ រស់នៅភូមិជាមួយគ្នា។

មកដល់ពេលនេះចំនួននិងទម្ងន់ឈើពិតប្រាកដមិនទាន់ដឹងនៅឡើយទេ រង់ចាំពិនិត្យជាក្រោយ។ ចំពោះអ្នកបើកបរនិងកម្មករម្នាក់ទៀត សមត្ថកិច្ចនឹងកសាងសំណុំរឿងបញ្ជូនទៅតុលាការ៕

ប្រជាពលរដ្ឋទីទ័លក្រចំនួន២៤១គ្រួសារ នៅឃុំកំពង់ឃ្លាំង ទទួលអំណោយសង្រ្គោះពីកាកបាទក្រហមខេត្ត

kang_sophak@yahoo.com (KANG SOPHAK) — Wed, 08 Sep 2010 12:40:26 +0000

ខេត្តសៀមរាប ៖ កាកបាទក្រហមកម្ពុជា ខេត្តសៀមរាប បាននាំយកជំនួយសង្រ្គោះជូនប្រជាពលរដ្ឋ ទីទ័លក្រខ្វះខាតស្បៀងចំនួន២៤១គ្រួសារ មកពីភូមិចំនួន១០ ក្នុងឃុំកំពង់ឃ្លាំង ស្រុកសូទ្រនិគម ខេត្តសៀម រាប កាលពីថ្ងៃទី៤ ខែកញ្ញា ឆ្នាំ២០១០ ក្រោមអធិបតីភាពលោក ស៊ូ ភិរិន្ទ ប្រធានគណៈកម្មាធិការកាកបាទ ក្រហមកម្ពុជាខេត្តសៀមរាប និងជាអភិបាលនៃគណៈអភិបាលខេត្ត។

លោកស៊ុំ សំអន នាយកប្រតិបត្តិកាកបាទក្រហមខេត្ត បានរាយការណ៍ថា ប្រជាពលរដ្ឋខ្វះខាតក្នុងភូមិកំពង់ឃ្លាំង មានចំនួន២៤១គ្រួសារ ស្មើនឹង១.០៩៩នាក់ ក្នុងនោះមានកុមារកំព្រា១នាក់ ពិការម្នាក់ ចាស់ ជរាទីទ័លក្រគ្មានទីពឹងចំនួន២២នាក់ ស្រ្តីមេម៉ាយក្រីក្រ៦១នាក់ និងប្រជាពលរដ្ឋទីទ័លក្រចំនួន១៤៨នាក់។

អំណោយដែលទទួលបានក្នុងម្នាក់ៗមាន អង្ករ២៥គីឡូក្រាម មុង១ ភួយ១ សារុង១ និងក្រមា១៕

ដួលធុងទឹកកកសង្កត់មនុស្សស្លាប់ម្នាក់

kang_sophak@yahoo.com (KANG SOPHAK) — Wed, 08 Sep 2010 12:39:43 +0000

បន្ទាយមានជ័យ ៖ យុវជនកម្មករក្នុងរោងសិប្បកម្មផលិតទឹកកកម្នាក់ បានស្លាប់ភ្លាមៗ បន្ទាប់ពីធុង ដែកដែលមានដើមទឹកកកចំនួន៧ដើម ដួលសង្កត់លើកាលពីវេលាម៉ោង ៩ព្រឹក ថ្ងៃទី៧ ខែកញ្ញា ឆ្នាំ២០១០ ស្ថិតនៅក្នុងភូមិ១ សង្កាត់ព្រះពន្លា ក្រុងសិរីសោភណ្ឌ ខេត្តបន្ទាយមានជ័យ។

យុវជនម្នាក់ឈិន ប៊ុន អាយុ២០ឆ្នាំ មានទីលំនៅភូមិក្រាំង ឃុំព្រៃឡឹក ស្រុកពារាំង ខេត្តព្រៃវែង មករស់ធ្វើជាកម្មករនៅក្នុងរោងសិប្បកម្ម ផលិតទឹកកក យីហោ សេះហោះមានជ័យ ស្ថិតនៅភូមិ១ សង្កាត់ព្រះពន្លា ក្រុងសិរីសោភណ្ឌ តាមបណ្ដោយផ្លូវជាតិលេខ៦ ត្រូវបានធុងទឹកកក ដួលសង្កត់ពីលើខណៈពេលដែល យុវជននោះរង់ចាំទឹកកកដែលគេស្ទូចចេញពីកន្លែងកំណត់ ដើម្បីដកចេញពីធុងដែកលើកដាក់រថយន្ត។ ធុង ទឹកកកមានចំនួន៧ និងមានទឹកកកចំនួន៧ដើមទឹកកក ត្រូវដួលសង្កត់លើរហូតដល់ស្លាប់ភ្លាមៗ។

តាមការសន្និដ្ឋានរបស់ប៉ូលិស ដែលចុះទៅពិនិត្យទីតាំងកើតហេតុ បាននិយាយថា មូលហេតុដែលនាំ ឲ្យធុងទឹកកកដែលមានទឹកកកនៅក្នុងនោះដួលចំជនរងគ្រោះ រហូតដល់ស្លាប់ គឺបណ្ដាលមកពីខុសបច្ចេក ទេស៕

អ. ពៅ

គេហទំព័រ កម្ពុជាថ្មី

ប្រកាស​បញ្ចូល​សមាជិក​គណបក្ស​ប្រជាជន​កម្ពុជា​​ខណ្ឌ​ដូន​ពេញ​ចំនួន​​៩៩៩​នាក់

វាយ​ប្លន់​យក​កាបូប​លុយ​បាន​ហើយ​តែ​គេច​​មិន​រួច ត្រូវ​ប៉ូលិស​ក្របួច​បាន​៣​នាក់

គ.ជ.ប អំពាវនាវ​ឲ្យ​ពលរដ្ឋ​ទៅ​ពិនិត្យ​និង​ចុះ​ឈ្មោះ​បោះ​ឆ្នោត​ចាប់​ពី​ថ្ងៃ​ទី​១ ខែ​តុលា

ដុត​កំទេច​គ្រឿងញៀន​៤​ប្រភេទ គិត​ជា​ប្រាក់​តម្លៃ​ប្រហែល​១០​ម៉ឺន​ដុល្លារ​អាមេរិក

អ្នក​នយោបាយ​ថៃ​ត្រូវ​បញ្ឈប់​ល្បែង​បំពុល​បរិយាកាស

មន្រ្តី​រដ្ឋបាល​ព្រៃឈើ​ឈូង​សមុទ្រ​ដឹក​នាំ​កម្លាំង​បង្រ្កាប​បាន​ឈើ​មួយ​រថយន្ត​កែច្នៃ