ចិន គំរាមសងសឹកអាមេរិក បើហ៊ានបិទ TikTok 

ជម្លោះពាក់ព័ន្ធកម្មវិធី TikTok បានក្លាយជាប្រធានបទក្តៅរវាងសហរដ្ឋអាមេរិកនិងចិន ហើយពេលនេះទីក្រុងប៉េកាំង បានចេញមុខគំរាមសងសឹក ប្រសិនបើទីក្រុងវ៉ាស៊ីនតោន អនុវត្តច្បាប់ហាមប្រាមលើកម្មវិធីបណ្តាញសង្គមនេះមែន។ នេះបើតាមការចុះផ្សាយរបស់ Fox News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជុំវិញច្បាប់បង្ខំឲ្យក្រុមហ៊ុន ByteDance ដកទុនពី TikTok ក្នុងរយៈពេល៩ខែបើមិនដូច្នោះទេនឹងបិទកម្មវិធីនេះនៅក្នុងសហរដ្ឋអាមេរិក, អ្នកនាំពាក្យក្រសួងការបរទេសចិនលោក Lin Jian កាលពីថ្ងៃចន្ទទី២៩ខែមេសា បានជំរុញឲ្យទីក្រុងវ៉ាស៊ីនតោន កុំធ្វើរឿងអវិជ្ជមានទាក់ទងនឹងប្រទេសចិនឲ្យសោះ។

លោកព្រមានថា “បើអាមេរិក នៅតែរឹងចចេសមិនព្រមប្តូរចិត្តមែន ច្បាស់ណាស់ ចិននឹងចាត់វិធានការយ៉ាងម៉ឺងម៉ាត់និងតឹងតែងជាទីបំផុត ដើម្បីការពារផលប្រយោជន៍សន្តិសុខនិងការអភិវឌ្ឍរបស់ខ្លួនជាក់ជាមិនខានឡើយ”។

ទោះបីជាយ៉ាងណាក៏ដោយ លោកមិនបញ្ជាក់ឡើយថាតើ ចិននឹងប្រើវិធានការអ្វីដើម្បីសងសឹកទៅអាមេរិកពាក់ព័ន្ធការហាមប្រាមកម្មវិធី TikTok នេះ។

ជុំវិញច្បាប់ TikTok ថ្មីដែលចុះហត្ថលេខាដោយលោកប្រធានាធិបតី ចូ បៃដិន កាលពីថ្ងៃទី២៤ខែមេសានេះដែរ, នាយកប្រតិបត្តិ TikTok លោក Shou Zi Chew បានប្រកាសថា ក្រុមហ៊ុននឹងដាក់ពាក្យបណ្តឹង ពីព្រោះច្បាប់ថ្មីនេះ បានរំលោភលើសិទ្ធិរបស់អ្នកប្រើប្រាស់ជាជនជាតិអាមេរិក ក្រោមវិសោធនកម្មទីមួយចំពោះសេរីភាពខាងសាសនានិងសេរីភាពនៃការបញ្ចេញមតិ។

សូមបញ្ជាក់ថា TikTok កំពុងទាក់ទាញការយកចិត្តទុកដាក់យ៉ាងខ្លាំងនៅក្នុងបណ្តាប្រទេសលោកខាងលិច ព្រោះតែក្តីកង្វល់អំពីហានិភ័យដែលទិន្នន័យអ្នកប្រើប្រាស់​ អាចធ្លាក់ចូលទៅក្នុងដៃរបស់ចិន។ តួយ៉ាង ភ្នាក់ងារសន្តិសុខអាល្លឺម៉ង់ បានព្រមានប្រជាជន សូមកុំប្រើប្រាស់ TikTok ឲ្យសោះខណៈកម្មវិធីនេះ ត្រូវបានហាមឃាត់នៅលើឧបករណ៍របស់បុគ្គលិករដ្ឋ ក្នុងប្រទេសជាច្រើនរួចទៅហើយ។

យ៉ាងណា កម្មវិធីវីដេអូខ្លីនេះអះអាងថា ការចោទប្រកាន់ទាំងអស់គឺមិនមានមូលដ្ឋានច្បាស់លាស់ឡើយ ហើយនេះគឺជាការយក TikTok ធ្វើជាអាវុធនយោបាយសុទ្ធសាធ៕

អត្ថបទ៖ សុខ សុវណ្ណ

ចុចអាន៖ EU បើកការស៊ើបអង្កេតលើ TikToK ជុំវិញច្បាប់ការពារអនីតិជន