អ្នកជំងឺកូវីដ១៩ម្នាក់រស់នៅ ក្រុង​បាវិត បានស្លាប់​នៅមន្ទីរពេទ្យស្វាយជ្រំ

លោក វេជ្ជបណ្ឌិត កែរ រដ្ឋា ប្រធានមន្ទីរសុខាភិបាលខេត្តស្វាយរៀងបានមានប្រសាសន៍នៅព្រឹកថ្ងៃទី១១មេសានេះថាអ្នកជំងឺកូវីដ១៩ម្នាក់ ជាស្ត្រីជនជាតិខ្មែរអាយុ៧២ឆ្នាំ រស់នៅភូមិប្រសប់លាក់ សង្កាត់បាទី ក្រុងបាវិត ខេត្តស្វាយរៀង បានស្លាប់បាត់បង់ជីវិត នៅវេលាម៉ោង៣និង៣០នាទីថ្ងៃទី១០ខែមេសាឆ្នាំ២០២១ នៅមន្ទីរពេទ្យបង្អែកស្វាយជ្រំ។

អ្នកជំងឺនេះបានឆ្លងជំងឺកូវីដ១៩ពីអ្នកវិជ្ជមានកូវីដ១៩ម្នាក់ ឈ្មោះហួត សុខា ហើយក្រុមការងារបានយកសំណាកលើកទី១នៅថ្ងៃទី០១មេសា ដោយទទួលបានលទ្ធផលអវិជ្ជមាន។ ប៉ុន្តែដោយសារស្ថានភាព​អ្នក​ជំងឺ​ពុំបានធូរស្បើយនៅថ្ងៃទី០៣ខែមេសាឆ្នាំ២០២១ ក្រុមការងារក៏បានយកសំណាកធ្វើតេស្តជាលើកទី២ ជាលទ្ធផលមានវិជ្ជមាន​កូវីដ១៩​ហើយបានបញ្ជូនទៅព្យាបាលនៅមន្ទីរពេទ្យបង្អែកខេត្តស្វាយជ្រំ។

លោក វេជ្ជបណ្ឌិត កែរ រដ្ឋា បន្តទៀតថា អ្នកជំងឺមានសភាពធ្ងន់ធ្ងរដោយសារមានជំងឺប្រចាំកាយ រួមមានជំងឺលើសឈាមនិងជំងឺទឹកនោមផ្អែម។

យ៉ាងណា​មិញលោក​បញ្ជាក់ថា ចំពោះមូលហេតុនៃការស្លាប់របស់អ្នកជំងឺខាងលើសូមរង់ចាំការប្រកាសជាផ្លូវការរបស់ក្រសួងសុខាភិបាល៕

អត្ថបទ៖ សំអឿន