អាជ្ញាធរខណ្ឌកំបូល បាញ់ថ្នាំមូសជូនពលរដ្ឋក្នុងមូលដ្ឋាន បង្ការទប់ស្កាត់ជំងឺគ្រុនឈាម

ដោយ​មាន​ការ​ណែនាំ​ពី លោក ឃួង ស្រេង អភិបាល​រាជធានី​ភ្នំពេញ ដែល​បាន​គិតគូរ​ពី​បញ្ហា​សុខភាព​សាធារណៈ​របស់​ប្រជាពលរដ្ឋ​ ​អាជ្ញាធរខណ្ឌកំបូល បានបើកយុទ្ធនាការ​ចុះ​​បាញ់ថ្នាំ​សម្លាប់​មូសនៅ​មូលដ្ឋាន​របស់​ខ្លួន​ជា​បន្តបន្ទាប់ ដើម្បី​បង្ការ និង​ទប់ស្កាត់ ជំងឺគ្រុនឈាម។

កាលពីថ្ងៃទី ១១ ខែវិច្ចិកា ឆ្នាំ ២០២៥ ម្សិលមិញ លោក ឃឹម ស៊ុនសូដា អភិបាល នៃគណៈអភិបាលខណ្ឌកំបូល​ បានចាត់តាំងមន្រ្តីការិយាល័យសង្គមកិច្ច និង សុខុមាលភាពសង្គម​ កម្លាំងសណ្តាប់ធ្នាប់ខណ្ឌ សហការជាមួយអាជ្ញាធរ សង្កាត់-ភូមិ​ ចុះបាញ់ថ្នាំកម្ចាត់មូស ដើម្បីបង្ការ​ និងទប់ស្កាត់ការចម្លងជំងឺគ្រុនឈាម តាមលំនៅឋានប្រជាពលរដ្ឋ និង បន្ទប់ជួលរបស់កម្មករ កម្មការិនី ស្ថិតនៅភូមិតាសេក ភូមិព្រៃកុដិ សង្កាត់កំបូល ខណ្ឌកំបូល រាជធានីភ្នំពេញ។

​

ក្រោយពី​កម្លាំង​បាញ់ថ្នាំ​របស់​រដ្ឋបាល​ខណ្ឌកំបូល ចុះ​ទៅ​បាញ់ថ្នាំ​សម្លាប់​មូស​រួចរាល់ ប្រជាពលរដ្ឋ​ក្នុង​មូលដ្ឋាន​ខណ្ឌ បាន​សម្តែង​នូវ​ទឹកចិត្ត​រីករាយ​យ៉ាង​ក្រៃលែង​ជា​ខ្លាំង និងសូម​ថ្លែង​អំណរគុណ​យ៉ាង​ជ្រាលជ្រៅ​ចំពោះ អភិបាល​រាជធានី​ភ្នំពេញ អភិបាលខណ្ឌកំបូល និង​ក្រុម​ការងារ​រដ្ឋបាល​ខណ្ឌ ដែល​តែងតែ​គិតគូរ​ពី​សុខភាព​សាធារណៈ​របស់​ពួកគាត់។

យុទ្ធនាការចុះបាញ់ថ្នាំមូស នាពេលនេះ ដើម្បីទប់ស្កាត់ និងបង្ការ កុំឲ្យមានការកើតឡើងនៅជំងឺផ្សេងៗ ដល់ប្រជាពលរដ្ឋ ពិសេសសម្រាប់កុមារ និងមនុស្សចាស់។

គួរជម្រាបថា យុទ្ធនាការ នៃការចុះបាញ់ថ្នាំមូសជូនប្រជាពលរដ្ឋនៅតាមខ្នងផ្ទះ សាលារៀន វត្តអារាម ជាពិសេសកន្លែងដែលជាជម្រកមូស គឺតបតាមការណែនាំរបស់ក្រសួងសុខាភិបាល ក៏ដូចជារដ្ឋបាលរាជធានីភ្នំពេញ ផងដែរ ដោយអាជ្ញាធរក្នុងខណ្ឌទាំង ១៤ នៃរាជធានីភ្នំពេញ បញ្ចេញសកម្មភាពធ្វើព្រមៗ គ្នា តែម្តង៕

ដោយ ៖ ម៉េង