ទឹកជំនន់នៅអយុធ្យាក៏ធ្ងន់ដែរ, ជាង៤ខែហើយ មិនទាន់ធូរ 

ស្របពេលគ្រោះទឹកជំនន់ដ៏សាហាវកំពុងវាយប្រហារខេត្តភាគខាងត្បូងប្រទេសថៃស្រាប់ទៅហើយនោះ ខេត្តអយុធ្យានៅភាគកណ្តាលឯណោះ ក៏មិនទាន់ធូស្រាលដែរ ពោលគឺទឹកជំនន់ បានជន់លិចខេត្តនេះរយៈពេលជាង៤ខែមកហើយ។

តាមការផ្សាយរបស់ Khaosod, ទឹកជំនន់នៅអយុធ្យា ចាប់ផ្តើមនៅខែសីហា ដោយបង្កទុក្ខវេទនាដល់ពលរដ្ឋ បណ្តាលឲ្យមនុស្សស្លាប់រាប់សិបនាក់ និងបង្កផលប៉ះពាល់ធំធេង។

នាយកដ្ឋានបង្ការនិងកាត់បន្ថយគ្រោះមហន្តរាយថៃ ចេញរបាយការណ៍ថា ទឹកជំនន់នៅអយុធ្យា បានជន់លិចភូមិចំនួន៩៤៦ ក្នុង១៤៥ឃុំ នៃ១២ស្រុក ប៉ះពាល់ធ្ងន់ធ្ងរដល់ពលរដ្ឋ ៦៦ ៧៩៤គ្រួសារ។ 

ងាកទៅភាគខាងត្បូងប្រទេសថៃ មនុស្សស្លាប់ដោយសារគ្រោះទឹកជំនន់គិតត្រឹមថ្ងៃសុក្រគឺឈានដល់១៤៥នាក់ហើយ ប៉ុន្តែពលរដ្ឋកំពុងខឹងសម្បារដ្ឋាភិបាលយ៉ាងខ្លាំងដោយចោទថា លាក់បាំងតួលេខ។

ក្នុងចំណោមមនុស្សស្លាប់ទាំងអស់ ខេត្ត Songkhla មានច្រើនជាងគេ ពោលគឺ១១០នាក់ បន្ទាប់មកគឺ Nakhon Si Thammarat ៩នាក់, Pattani ៦នាក់, Satun ៥នាក់, Yala ៥នាក់, Phatthalung ៤នាក់, Narathiwat ៤នាក់ និង Trang ២នាក់។

ទោះបីជាយ៉ាងណាក៏ដោយ អ្នកជំនាញថៃបានព្រមានរួចទៅហើយថា តួលេខជាក់ស្តែងនៃមនុស្សស្លាប់ក្នុងគ្រោះទឹកជំនន់ដ៏សាហាវបំផុតនៅ Songkhla ក្នុងប្រវត្តិសាស្រ្ត៣០០ឆ្នាំ គឺមិនក្រោម៥០០នាក់នោះទេ៕

អត្ថបទ៖ សុខ សុវណ្ណ