ចិនកាត់បន្ថយពន្ធប្រឆាំងការលក់បង្ខូចតម្លៃលើសាច់ជ្រូកនាំចូលពី EU

ក្រសួងពាណិជ្ជកម្មចិន បានឱ្យដឹងកាលពីថ្ងៃអង្គារថា ប្រទេសចិននឹងដាក់ពន្ធ​ ១៩,៨% លើសាច់ជ្រូកនាំចូលពីសហភាពអឺរ៉ុប (EU) ដោយទាបជាងឆ្ងាយធៀបនឹង​អត្រាបឋម​បណ្ដោះអាសន្ន ៦២,៤% នាពេលកន្លងមក​។ ​នេះបើតាមការចុះផ្សាយរបស់ទីភ្នាក់ងារសារព័ត៌មាន AP។

ការប្រកាសរបស់ក្រសួងធ្វើឡើង បន្ទាប់ពី​ចិនបើកការស៊ើបអង្កេត​លើការនាំចូលសាច់ជ្រូកពី​ EU ក្រោយប្លុកនេះ ​ប្រកាសដាក់ពន្ធបណ្ដោះអាសន្នលើរថយន្តអគ្គិសនី​ផលិតនៅចិន។

ក្រៅពីនេះ ចិនបានដាក់ពន្ធប្រឆាំងការលក់បង្ខូចតម្លៃលើស្រា​ធ្វើពីផ្លែឈើអឺរ៉ុប ជាពិសេសស្រាកូញ៉ាក់​ផលិតនៅ​បារាំង ទោះបីជាក្រុមហ៊ុនផលិតស្រា​សំខាន់ៗ ទទួលបានការលើកលែងក៏ដោយ។ ការនាំចូលផលិតផលទឹកដោះគោពី EU ក៏រងការស៊ើបអង្កេតប្រឆាំងនឹងការលក់បង្ខូចតម្លៃផងដែរ។

គួរគូសបញ្ជាក់ថា EU មានឱនភាពពាណិជ្ជកម្មយ៉ាងច្រើនជាមួយចិន ជាង ៣០០ ប៊ីលានអឺរ៉ូ (៣៤៨ ប៊ីលានដុល្លារ) កាលពីឆ្នាំមុន។ ​យ៉ាងណាមិញ ប្លុក​នេះគឺជា​អ្នក​នាំចេញសាច់ជ្រូកដ៏សំខាន់​សម្រាប់ចិន។

​កន្លងមក ចិន​បាន​ទទូចថា ក្រុមហ៊ុន EU កំពុងលក់សាច់ជ្រូកនៅចិនក្នុងតម្លៃថោកៗ ដែលធ្វើឱ្យប៉ះពាល់ដល់អ្នកផលិតចិន។ ជាលទ្ធផល​ ចិនបានដាក់ពន្ធប្រឆាំងការលក់បង្ខូចតម្លៃលើការនាំចូលសាច់ជ្រូករបស់​ប្លុក​។

កាលពីដើមឆ្នាំ​ ចិនបានទាមទារឱ្យអ្នកនាំចេញ EU បង់ពន្ធបណ្តោះអាសន្នរហូតដល់ ៦២,៤%​។ ឥឡូវនេះ ពន្ធដដែល ត្រូវបាន​ទម្លាក់ចុះមកត្រឹមចន្លោះ ​៤,៩-១៩,៨% ដោយ​ចាប់ផ្ដើមអនុវត្តនៅសប្ដាហ៍នេះ និងរយៈពេល ៥ ឆ្នាំ។ ​

វិធានការរបស់ចិន ​រំពឹងបង្កផលប៉ះពាល់ខ្លាំងបំផុត​ដល់់អេស្ប៉ាញ ហូឡង់ និងដាណឺម៉ាក៕