មេ​ដឹក​នាំ​កំពូល​អ៊ីរ៉ង់ ត្រៀម​ផែនការ B ដាក់​មេប្រូច​ទៅ​រុស្ស៊ី បើ​បាតុកម្ម​កាន់តែ​ធំទប់លែងឈ្នះ

របាយការណ៍ពីកាសែតអង់គ្លេស The Times ដោយដកស្រង់ការរកឃើញរបស់ភ្នាក់ងារចារកម្ម បានទម្លាយ​ឲ្យ​ដឹងថា មេដឹកនាំកំពូលរបស់អ៊ីរ៉ង់ Ayatollah Ali Khamenei បានរៀបចំ «ផែនការ B» ជាបន្ទាន់​មួយ ដើម្បីភៀសខ្លួនទៅកាន់ទីក្រុងមូស្គូ ប្រសិនបើបាតុកម្ម​​នៅ​ក្នុង​ប្រទេស​ផ្ទុះឡើងខ្លាំងហួសពីសមត្ថភាព​​គ្រប់គ្រងរបស់រដ្ឋ។

ផែនការជម្លៀសខ្លួននេះត្រូវគេរាយការណ៍ថា រួមមានកូនប្រុសរបស់លោកគឺ Mojtaba Khamenei រួមជាមួយសមាជិកគ្រួសារ និងជំនួយការជិតស្និទ្ធប្រហែល ២០នាក់។

របាយការណ៍ដដែល បានលើកឡើង​ទៀត​ថា មេដឹកនាំវ័យ​៨៦​ឆ្នាំរូបនេះ បានប្រែជា «ទន់ខ្សោយទាំងរាងកាយ និងស្មារតី» បន្ទាប់ពីជម្លោះដោយផ្ទាល់រយៈពេល​១២​ថ្ងៃជាមួយអ៊ីស្រាអែលកាលពីខែមិថុនា​ឆ្នាំ​មុន ដែលក្នុងនោះលោកត្រូវចំណាយពេលភាគច្រើននៅក្នុងលេណដ្ឋានក្រោមដី។

អ្នកវិភាគចារកម្ម​ជឿថា ការសម្រេចចិត្តរបស់លោក Khamenei ក្នុងការត្រៀមខ្លួនចាកចេញនេះ គឺធ្វើតាមគំរូរបស់សម្ព័ន្ធមិត្តលោក គឺអតីតប្រធានាធិបតីស៊ីរី Bashar al-Assad ដែលបានភៀសខ្លួនទៅកាន់ទីក្រុងមូស្គូកាលពីខែធ្នូ​ឆ្នាំ២០២៤ នៅពេលដែលកងកម្លាំងប្រឆាំងបានកាន់កាប់ទីក្រុងដាម៉ាស។ ប្រទេសរុស្ស៊ីនៅតែជាជម្រកដ៏មានសុវត្ថិភាពមួយសម្រាប់មេដឹកនាំអ៊ីរ៉ង់ ដោយសារលោក Khamenei តែងតែសម្តែងការកោតសរសើរចំពោះប្រធានាធិបតី វ្ល៉ាឌីមៀរ ពូទីន។

របាយការណ៍បានឲ្យដឹងបន្ថែម​ថា របបនេះបាននិងកំពុងផ្ទេរទ្រព្យសម្បត្តិទៅក្រៅប្រទេសដើម្បីសម្រួលដល់ការចាកចេញដោយសុវត្ថិភាព។ លោក Khamenei គ្រប់គ្រងអាណាចក្រហិរញ្ញវត្ថុដ៏ធំសម្បើមតាមរយៈអង្គការ Setad ដែលមានតម្លៃប្រហែល ៩៥ពាន់លានដុល្លារ រួមមានអចលនទ្រព្យ និងឧស្សាហកម្មជាច្រើន។

សូម​ជម្រាប​ថា អ៊ីរ៉ង់​បាន​ផ្ទុះ​មាន​បាតុកម្ម​ជា​បន្តបន្ទាប់ នៅទូទាំងប្រទេស ដែលបង្កឡើងដោយការធ្លាក់ចុះយ៉ាងខ្លាំងនៃតម្លៃរូបិយប័ណ្ណជាតិ និងវិបត្តិសេដ្ឋកិច្ចដ៏ធ្ងន់ធ្ងរ។ ​ទន្ទឹម​នោះ ប្រធានាធិបតី​អាមេរិក លោក​ ដូណាល់ ត្រាំ បាន​ចេញ​សារ​ព្រមាន​ខ្លាំងៗ​ថា បើអាជ្ញាធរអ៊ីរ៉ង់«បាញ់សម្លាប់បាតុករស្លូតត្រង់​យ៉ាងឃោរឃៅ តាម​ទម្លាប់របស់ពួកគេនោះ សហរដ្ឋអាមេរិកនឹងទៅជួយសង្គ្រោះពួកគេ»។ សម្តីនេះតំណាង​ឲ្យ​ជំហរដ៏រឹងមាំបំផុតរបស់រដ្ឋបាលលោកត្រាំ ហើយវាបានកើតឡើងត្រឹមតែប៉ុន្មានថ្ងៃប៉ុណ្ណោះ បន្ទាប់ពីលោកបានជួបជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu នៅរីសត Mar-a-Lago ជាកន្លែងដែលមេដឹកនាំទាំងពីរបានពិភាក្សាអំពីឥទ្ធិពលក្នុងតំបន់របស់អ៊ីរ៉ង់ និងការចោទប្រកាន់ពីការប៉ុនប៉ងស្តារកម្មវិធីនុយក្លេអ៊ែរឡើងវិញ ក្រោយការវាយប្រហារតាមអាកាសកាលពីខែមិថុនា​ឆ្នាំ​២០២៥។

មន្ត្រីអ៊ីរ៉ង់បានឆ្លើយតបវិញភ្លាមៗជាមួយនឹងការព្រមានយ៉ាងដាច់អហង្ការ ដោយចាត់ទុកអន្តរាគមន៍ណាមួយរបស់អាមេរិកថាជា «បន្ទាត់ក្រហម»។ រដ្ឋមន្ត្រីការបរទេសលោក Abbas Araghchi បានហៅការលើកឡើងនេះថាជា «ទង្វើខ្វះការទទួលខុសត្រូវ និងគ្រោះថ្នាក់» ដោយបញ្ជាក់ថា កងកម្លាំងសន្តិសុខអ៊ីរ៉ង់នឹងច្រានចោលរាល់ការជ្រៀតជ្រែកចូលក្នុងអធិបតេយ្យភាពជាតិ។ ទន្ទឹមនឹងនេះ ប្រធានសភាអ៊ីរ៉ង់ លោក Mohammad Bagher Ghalibaf បានព្រមានថា មជ្ឈមណ្ឌលយោធា និងបុគ្គលិកអាមេរិកទាំងអស់នៅក្នុងតំបន់មជ្ឈិមបូព៌ា នឹងក្លាយជា «គោលដៅស្របច្បាប់» បើ​អាមេរិកហ៊ានធ្វើសកម្មភាពយោធាណាមួយ៕

ប្រែសម្រួល៖ ឈាង