​ការនាំចេញទំនិញពីថៃមកកម្ពុជាធ្លាក់ចុះជិត​ ១៥% ​នៅឆ្នាំ ​២០២៥

ការដោះដូរទំនិញ​កម្ពុជា-ថៃ​ សម្រេច​បាន​នូវ​​ទំហំ​ទឹក​ប្រាក់​ជាង​ ៣,៦៥ ​ពាន់លានដុល្លារ ​នៅក្នុងឆ្នាំ ២០២៥ ​ធ្លាក់ចុះជិត ​១៥% ​ធៀបនឹងឆ្នាំ ២០២៤ ​ដែលមាន ​៤,២៩ ​ពាន់លានដុល្លារ​។​

​ទិន្នន័យ​របស់​អគ្គនា​យក​ដ្ឋាន​​គយ ​និង​រដ្ឋាករ​កម្ពុជា ​(GDCE) ​បង្ហាញថា ​នៅក្នុងឆ្នាំ ២០២៥ ​ពាណិជ្ជកម្មទ្វេភាគីកម្ពុជា-ថៃ ​សម្រេចបាននូវទំហំទឹកប្រាក់ ៣,៦៥ ​ពាន់លានដុល្លារ ធ្លាក់ចុះ ១៤,៨៦% ​ក្នុងនោះ​កម្ពុជា​នាំ​ចេញ​ទៅ​ថៃ​មាន​តម្លៃ​ប្រ​មាណ ​៧៣២ លានដុល្លារ ធ្លាក់ចុះ ១៤,១៥% ចំណែកថៃនាំចូលមកវិញមានតម្លៃ ២,៩ ពាន់លានដុល្លារ ធ្លាក់ចុះ ១៥%។​

​លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម បានប្រាប់ឱ្យដឹងថា​ បន្ទាប់​ពីបិទព្រំដែនគោក ក្រៅ​ពី​ទំនិញដែលកម្ពុជា​ហាមឃាត់ ដែលមានបន្លែ ផ្លែឈើ អគ្គិសនី ប្រេង និងឧស្ម័ន ពាណិជ្ជកម្ម​រវាង​កម្ពុជា និងថៃ នៅដំណើរការធម្មតា ពោល​គឺភាគីថៃបាន​បង្វែរទិស​នាំទំនិញ​ចូលមកតាមផ្លូវទឹក (ច្រកសមុទ្រ)​ និង​ឆ្លងតាមច្រកព្រំដែនប្រទេសឡាវ។

​កម្ពុជា​នៅរក្សាបានទីផ្សារសំខាន់ៗរបស់ខ្លួន ​ដែល​ជា​ទីផ្សារ​ពិភពលោក​ ធានារនូវការផ្គត់ផ្គង់​ បង្កើតសក្ដានុភាពកម្ពុជា ​ក្នុងខ្សែច្រវាក់​តម្លៃ និងខ្សែច្រវាក់​ផ្គត់​ផ្គង់​ និងរក្សាបាននូវជំនឿចិត្ត​ពីអ្នកបញ្ជាទិញ​ និង​ទីផ្សាររបស់ខ្លួន។​

​យោងតាមក្រសួងពាណិជ្ជកម្មនៅក្នុងឆ្នាំ​ ២០២៥ ​ពាណិជ្ជកម្ម​អន្តរជាតិ​របស់កម្ពុជាសម្រេចបាន​នូវទំ​ហំទឹក​ប្រាក់ ​៦៥,២៥ ពាន់លានដុល្លារ ​កើនឡើង ១៨% ក្នុងនោះ​កម្ពុជា​នាំចេញ​មានតម្លៃ ៣១,២៨ ពាន់លាន​ដុល្លារ កើន​ឡើង ១៧% ​និង​នាំចូល​មានតម្លៃ ​៣៣,៩៦ ​ពាន់លានដុល្លារ កើនឡើង ១៨%៕​​

អត្ថបទ៖ ឡេង ដេត