ទប់ស្កាត់Online Scams! អភិបាលខេត្តបន្ទាយមានជ័យ បញ្ជាឱ្យពិនិត្យ២៤​ម៉ោងលេី២៤ម៉ោងចំពោះជនបរទេសឆ្លងកាត់ចូលខេត្ត

ក្នុងកិច្ចប្រជុំដឹកនាំសមត្ថកិច្ចចម្រុៈលើការត្រួតពិនិត្យជនបរទេស នៅថ្ងៃទី២៣ ខែកុម្ភៈ នេះ អភិបាលខេត្តបន្ទាយមានជ័យលោក អ៊ុំ រាត្រី បានដាក់ចេញផែនការត្រួតពិនិត្យលើជនបរទេសឆ្លងកាត់ខេត្តបន្ទាយមានជ័យ គ្រប់គោលដៅ២៤ម៉ោងលើ២៤ម៉ោង ដេីម្បីទប់ស្កាត់បទល្មេីសឆបោកតាមប្រព័ន្ធបច្ចេកវិទ្យា Online Scams។

កិច្ចប្រជុំនេះ កើតឡើងប​ន្ទាប់ពី កាលពីថ្ងៃទី២២​ ខែកុម្ភៈ លោក អ៊ំ រាត្រី បានចុះពិនិត្យ​ និងរៀបចំ ទីតាំង​ត្រួតពិនិត្យជនបរទេសឆ្លងកាត់ចូលមកខេត្តបន្ទាយមានជ័យ​ ព្រំប្រទល់ខេត្តបាត់ដំបង​ និងព្រំប្រទល់ខេត្តសៀមរាប​ ដេីម្បីទប់ស្កាត់បទល្មេីសឆបោកតាមប្រព័ន្ធបច្ចេកវិទ្យា។

បទបញ្ជានេះសំដៅលើជនបរទេសដែលឆ្លងកាត់ ចេញចូលមកខេត្តបន្ទាយមានជ័យ ដោយលោក អ៊ំ រាត្រី តម្រូវឱ្យសមត្ថកិច្ចជំនាញត្រូវពិនិត្យឯកសារពាក់ព័ន្ធរបស់ជនបរទេសទាំងអស់នោះ។ ក្នុងករណីជនបរទេសដែលចូលមកបម្រេីការនៅក្នុងខេត្តបន្ទាយមានជ័យ ត្រូវសួរព័ត៌មានពាក់ព័ន្ធនឹងទីកន្លែងដែលត្រូវបំពេញការងារ ការបញ្ជាក់ ឬការធានាពីម្ចាស់ក្រុមហ៊ុន ឬសហគ្រាស។

សម្តេច ហ៊ុន ម៉ាណែត ប្រមុខរាជរដ្ឋាភិបាលកម្ពុជា កាលពីថ្ងៃទី១៤ កក្កដា ឆ្នាំ២០២៥ បានចេញបទបញ្ជា ស្តីពី យុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា ភ្ជាប់ជាមួយការព្រមានថាបើស្ថាប័នពាក់ព័ន្ធមិនអនុវត្តតាមបទបញ្ជា ឬមិនសហការអនុវត្ត ក្នុងរូបភាពណាមួយ នឹងត្រូវក្លាយជាកម្មវត្ថុនៃផ្លាស់ប្តូរ ឬបញ្ចប់មុខតំណែង។

ក្រោយប្រមុខរាជរដ្ឋាភិបាលកម្ពុជា សម្តេច ហ៊ុន ម៉ាណែត ដាក់ចេញបទបញ្ជាបង្ក្រាបប្រយុទ្ធប្រឆាំងនឹងបទល្មើសឆបោកតាមប្រព័ន្ធអនឡាញទូទាំងប្រទេស រដ្ឋបាលខេត្តបន្ទាយមានជ័យ បានបន្ថែមនៅទីតាំងត្រួតពិនិត្យគ្រប់ច្រកល្ហក ត្រួតពិនិត្យជនបរទេសឆ្លងកាត់ចូលមកខេត្តបន្ទាយមានជ័យ។

ចូលមកដល់ឆ្នាំ២០២៦ រាជរដ្ឋាភិបាលកម្ពុជា និងសមត្ថកិច្ចជំនាញ បានបង្កើនល្បឿនបន្ថែមទៀត ក្នុងការបង្ក្រាបបទល្មើសឆបោកតាមប្រព័ន្ធបច្ចេកវិទ្យា ដោយបានបើកប្រតិបត្តិការជាបន្តបន្ទាប់ និងឃាត់ខ្លួនមេក្លោងបញ្ជូនទៅអនុវត្តច្បាប់នៅប្រទេសកំណើត និងកាត់ទោសតាមច្បាប់កម្ពុជាជាដើម។

រាជរដ្ឋាភិបាលកម្ពុជា តាមរយៈក្រសួងមហាផ្ទៃ បានគូសបន្ទាត់ក្រហមនៃប្រតិបត្តិការបោសសម្អាតខ្នាតធំ(XXL) ផ្ដាច់ដង្ហើមចុងក្រោយបទល្មើសឆបោកតាមប្រព័ន្ធបច្ចេកវិទ្យា គឺត្រឹមកំឡុងខែមេសា ឆ្នាំ២០២៦ ដោយត្រូវបោសសម្អាតទីតាំងប្រព្រឹត្តបទល្មើសឆបោកអនឡាញ ឱ្យអស់ពីលទ្ធភាព និងឱ្យស្អាត៕