ឯកអគ្គរដ្ឋទូតអូទ្រីសសន្យាជំរុញការធ្វើពាណិជ្ជកម្មជាមួយកម្ពុជា ខណៈធុរជនអូទ្រីសនឹងមករកឱកាសវិនិយោគ

ឯកអគ្គរដ្ឋទូតថ្មីរបស់អូទ្រីស លោកស្រី Katharina Wieser សន្យាថា នឹងជំរុញនូវទំនាក់ទំនង និងកិច្ចសហប្រតិបត្តិការបន្ថែមទៀតរវាងកម្ពុជា និងអូទ្រីស ជាពិសេសវិស័យពាណិជ្ជកម្ម និងវិនិយោគ។ ការសន្យានេះបានធ្វើឡើងនៅចំពោះមុខសម្ដេចតេជោ ហ៊ុន សែន ប្រមុខរដ្ឋស្ដីទីនៃកម្ពុជា ក្នុងពេលលោកស្រី Katharina Wieser ចូលប្រគល់សារតាំង នៅថ្ងៃទី៤ ខែមីនា ឆ្នាំ២០២៦នេះ។

លោកស្រី Katharina Wieser បានប្ដេជ្ញាចិត្តខិតខំប្រឹងប្រែងក្នុងការពូនជ្រុំនូវទំនាក់ទំនងរវាងកម្ពុជា និងអូទ្រីសឱ្យកាន់តែរីកចម្រើន ដោយលោកស្រី បានលើកឡើងពីកិច្ចសហប្រតិបត្តិការបន្ថែមទាំងនៅក្នុងក្របខណ្ឌនយោបាយ ជាពិសេសគឺក្របខណ្ឌសេដ្ឋកិច្ច ពាណិជ្ជកម្ម និងការវិនិយោគ។

លោកស្រី ឯកអគ្គរដ្ឋទូត បានបញ្ជាក់ថា នឹងខិតខំប្រឹងប្រែងក្នុងការជំរុញពាណិជ្ជកម្ម វិនិយោគរវាងកម្ពុជា និងអូទ្រីសឱ្យកាន់តែមានការកើនឡើង។

លោកស្រី ឯកអគ្គរដ្ឋទូត ក៏បានជម្រាបជូនសម្ដេចតេជោ អំពីគម្រោងនៅពេលខាងមុខ ដែលនឹងមានធុរជនរបស់អូទ្រីសប្រមាណ ១០ក្រុមហ៊ុន នឹងធ្វើដំណើរមកកាន់ប្រទេសកម្ពុជា ដើម្បីស្វែងរកឱកាសក្នុងការវិនិយោគផងដែរ។ ដំណឹងនេះ ត្រូវបានសម្ដេចតេជោ ហ៊ុន សែន បង្ហាញការសាទរចំពោះគម្រោងធុរជនរបស់អូទ្រីស គ្រោងមកកាន់ប្រទេសកម្ពុជា នាពេលខាងមុខ។

សម្ដេចតេជោ បង្ហាញក្ដីសង្ឃឹមថា តាមរយៈធុរជន រួមទាំងតាមរយៈការប្ដេជ្ញាចិត្តរបស់លោកស្រី ក្នុងនាមជាឯកអគ្គរដ្ឋទូតថ្មីរបស់អូទ្រីសប្រចាំនៅកម្ពុជា នឹងញ៉ាំងឱ្យទំនាក់ទំនងផ្នែកនយោបាយ ជាពិសេសការពង្រីកទំហំពាណិជ្ជកម្ម សេដ្ឋកិច្ច និងការវិនិយោគរវាងប្រទេសទាំងពីរកាន់តែរីកចម្រើនបន្តទៀត។

សម្ដេចតេជោចាត់ទុកវត្តមានដ៏ឆាប់រហ័សរបស់លោកស្រី មកកាន់តំណែងជាឯកអគ្គរដ្ឋទូតនេះ គឺបញ្ជាក់យ៉ាងច្បាស់ថា អូទ្រីសបានផ្ដល់តម្លៃខ្ពស់ចំពោះទំនាក់ទំនងរវាងកម្ពុជា និងអូទ្រីស៕

ដោយ៖ ធឿន វ៉ាន់សុង