Netanyahu អវត្តមានពីកិច្ចប្រជុំទ័ព គួរឲ្យសង្ស័យ ចំពេលផ្ទុះពាក្យចចាមអារ៉ាមថា លោកបាត់បង់ជីវិត

នាយករដ្ឋមន្ត្រីអ៊ីស្រាអែល Benjamin Netanyahu បានអវត្តមានក្នុងកិច្ចប្រជុំគណៈរដ្ឋមន្ត្រីយោធា ចំពេលផ្ទុះពាក្យចចាមអារ៉ាមថា លោកបាត់បង់ជីវិត។

តាមរយៈវីដេអូផ្សាយលើកញ្ចក់ទូរទស្សន៍រដ្ឋអ៊ីស្រាអែល គេឃើញថា ក្នុងកិច្ចប្រជុំទ័ព គឺមិនមានវត្តមានលោក Netanyahu ទេ ពោលគឺមានតែរដ្ឋមន្ត្រីការពារជាតិ Israel Katz និងមន្ត្រីជាន់ខ្ពស់ជាមួយមេទ័ពផ្សេងទៀតប៉ុណ្ណោះ។

អ្វីដែលគេសង្ស័យគឺថា ចាប់តាំងពីសង្គ្រាមជាមួយអ៊ីរ៉ង់ ផ្ទុះឡើង លោក Netanyahu មិនដែលអវត្តមានទេ សម្រាប់កិច្ចប្រជុំសំខាន់បែបនេះ ដូច្នេះនេះជាលើកទី១ហើយដែលនាយករដ្ឋមន្ត្រីអ៊ីស្រាអែលបាត់មុខពីកិច្ចប្រជុំគណៈរដ្ឋមន្ត្រីសន្តិសុខ។

ប្រភពជាច្រើនបានលើកឡើងដូចៗគ្នា អំពីមរណភាពរបស់លោក Netanyahu ជាពិសេសមុននេះ ក៏មានការបញ្ចេញវីដេអូសង្ស័យជា Ai ដែលបង្ហាញពីបុរសខ្លាំងអ៊ីស្រាអែល មានរូបរាងខុសលក្ខណៈផងដែរ។

យ៉ាងណា រហូតមកដល់ម៉ោងនេះ នៅមិនទាន់មានព័ស្តុតាងរឹងមាំណាមួយដែលបញ្ជាក់ថា លោក Netanyahu បាត់បង់ជីវិតនោះទេ។ ផ្ទុយទៅវិញ វាហាក់ដូចជាយុទ្ធសាស្ត្ររក្សាសុវត្ថិភាពយ៉ាងតឹងរ៉ឹងបំផុតរបស់អ៊ីស្រាអែល ចំពេលសង្គ្រាមកំពុងឈានដល់ដំណាក់កាលគ្រោះថ្នាក់។

ជុំវិញរឿងនេះ ការិយាល័យនាយករដ្ឋមន្ត្រីបញ្ជាក់ហើយថា លោកនៅមានជីវិត និងសុខភាពល្អណាស់។ អវត្តមានរបស់លោក គឺអាចបណ្តាលមកពីពិធីសារសន្តិសុខ ដែលតម្រូវឲ្យមេដឹកនាំកំពូលៗ ត្រូវស្ថិតនៅក្នុងលេណដ្ឋានសម្ងាត់ផ្សេងៗគ្នា ដើម្បីបង្ការការវាយប្រហារចំគោលដៅពីសំណាក់មីស៊ីលអ៊ីរ៉ង់។

ក៏មានរបាយការណ៍ដែរថា លោកនៅតែតាមដាននិងបញ្ជាទ័ពតាមរយៈប្រព័ន្ធទំនាក់ទំនងដែលមានសុវត្ថិភាពខ្ពស់ ប៉ុន្តែមិនមានការផ្សាយផ្ទាល់ជាសាធារណៈទេ៕

អត្ថបទ៖ សុខ សុវណ្ណ