ចិនអាច​បន្ត​បិទការនាំចេញប្រេងនៅខែមេសា​ ដោយលើកលែងសម្រាប់ប្រទេសមួយចំនួន

​ចិនទំនងជាបន្តហាមឃាត់ការនាំចេញប្រេងឥន្ធនៈចម្រាញ់​នៅខែមេសានេះ​ ​ប៉ុន្តែអាចលើកលែងឱ្យតិចតួចសម្រាប់ប្រទេសក្នុងតំបន់មួយចំនួនដែលស្នើសុំជំនួយ។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ នៅថ្ងៃពុធ (១ មេសា) នេះ ដោយស្រង់សម្ដីប្រភព​ក្នុងឧស្សាហកម្ម ៥ នាក់ជាអនាមិក។

ប្រភព​ ៣ នាក់ក្នុងចំណោមនោះ បាន​អះអាងថា ​ការពិភាក្សាកំពុងដំណើរការសម្រាប់ការ​នាំចេញ​ប្រេងម៉ាស៊ូត ប្រេងយន្តហោះ និងប្រេងសាំង​ក្នុងកម្រិតមាន​កំណត់ ទៅកាន់អាស៊ីអាគ្នេយ៍ ដែលជាអតិថិជនរបស់ចិន​។ ប្រភព ២ នាក់​បានប៉ាន់ប្រមាណថា ការនាំចេញដែលត្រូវបានអនុញ្ញាត អាចមានរហូតដល់ ១៥០ ០០០ តោន ​ខណៈប្រភព​មួយរូប​អះអាងថា បរិមាណនោះអាចដល់ ៣០០ ០០០ តោន។ ​

ប្រភពបន្តថា ការលក់សម្រាប់ការនាំចេញភ្លាមៗដោយក្រុមហ៊ុនចម្រាញ់ប្រេងរបស់ចិន ​នឹង​នៅតែបន្តរងការហាមឃាត់ ខណៈប្រទេសដែលអាចទទួល​បានប្រេងឥន្ធនៈពីចិន​ រួមមាន​បង់ក្លាដែស មីយ៉ាន់ម៉ា ស្រីលង្កា ម៉ាល់ឌីវ និងវៀតណាម​ជាដើម។​

ប្រភព ៣ រូប បាននិយាយថា ការ​នាំចេញ​ដោយផ្ទាល់ទៅកាន់ប្រទេសទាំងនេះ នឹង​គ្រប់គ្រងដោយក្រុមហ៊ុនរដ្ឋចិន។ ​

គួរគូសបញ្ជាក់ថា ចាប់តាំងពី​សង្គ្រាមអ៊ីរ៉ង់ផ្ទុះឡើងមក ប្រទេសមួយចំនួន រួមទាំងហ្វីលីពីន និងបង់ក្លាដែស បានស្នើសុំការផ្គត់ផ្គង់ប្រេងឥន្ធនៈពី​ចិន។ ចិន​បាននិយាយថា ខ្លួនមានឆន្ទៈក្នុងការជួយអាស៊ីអាគ្នេយ៍​ពាក់ព័ន្ធនឹង​កង្វះខាតថាមពល។

​ចិនបានដាក់បម្រាមលើការនាំចេញប្រេងម៉ាស៊ូត សាំង និងប្រេងឥន្ធនៈយន្តហោះចាប់ពីថ្ងៃទី ១២ ខែមីនា ប៉ុន្តែប្រេងឥន្ធនៈយន្តហោះសម្រាប់ជើងហោះហើរអន្តរជាតិ និង​ប្រេងកប៉ាល់ មិនត្រូវបានរាប់បញ្ចូលក្នុងវិធានការនោះទេ៕