តើអ៊ីរ៉ង់ បាត់បង់មេដឹកនាំនិងមន្ត្រីសំខាន់ៗ ប៉ុន្មាននាក់ហើយ ក្នុងសង្គ្រាម?

កាលពីថ្ងៃចន្ទទី៦ខែមេសាឆ្នាំ២០២៦ ប្រទេសអ៊ីរ៉ង់ បានប្រកាសពីការបាត់បង់មន្ត្រីជាន់ខ្ពស់ម្នាក់ទៀតហើយ ​ នោះគឺជាមេចារកម្មរបស់កងឆ្មាំបដិវត្ត (IRGC) ឈ្មោះ Seyyed Majid Khademi ដែលលោកត្រូវសម្លាប់ក្នុងការវាយប្រហារអាកាសរបស់អាមេរិកនិងអ៊ីស្រាអែល កាលពីព្រឹកព្រហាមថ្ងៃអាទិត្យ។

យោងតាមគេហទំព័រ NRP, ចាប់តាំងពីសង្គ្រាមមជ្ឈិមបូព៌ា ផ្ទុះឡើងនៅថ្ងៃទី២៨ខែកុម្ភៈឆ្នាំ២០២៦មក ការវាយប្រហារតាមអាកាសរួមគ្នារវាងអាមេរិកនិងអ៊ីស្រាអែល បានសម្លាប់មន្ត្រីជាន់ខ្ពស់អ៊ីរ៉ង់ជាង ៥០ នាក់ហើយ។

ខាងក្រោមនេះគឺជាមេដឹកនាំនិងមន្ត្រីជាន់ខ្ពស់អ៊ីរ៉ង់សំខាន់មួយចំនួន ដែលបាត់បង់ជីវិត គិតត្រឹមថ្ងៃអង្គារទី៧ខែមេសា៖

• Ali Khamenei៖ មេដឹកនាំកំពូលនៃប្រទេសអ៊ីរ៉ង់។
• Ali Shamkhani៖ ទីប្រឹក្សាជាន់ខ្ពស់របស់មេដឹកនាំកំពូល និងជាអតីតលេខាធិការនៃក្រុមប្រឹក្សាសន្តិសុខជាតិកំពូល។
• Mohammad Pakpour៖ អគ្គមេបញ្ជាការនៃកងឆ្មាំបដិវត្តន៍ឥស្លាម (IRGC)។
• Abdolrahim Mousavi៖ អគ្គសេនាធិការនៃកងកម្លាំងប្រដាប់អាវុធអ៊ីរ៉ង់។
• Aziz Nasirzadeh៖ រដ្ឋមន្ត្រីក្រសួងការពារជាតិ។
• Ali Larijani៖ លេខាធិការនៃក្រុមប្រឹក្សាសន្តិសុខជាតិកំពូល។
• Esmaeil Khatib៖ រដ្ឋមន្ត្រីក្រសួងចារកម្ម។

• Majid Khademi៖ មេចារកម្ម IRGC។
• Alireza Tangsiri៖ មេបញ្ជាការកងទ័ពជើងទឹក។
• Ali-Mohammad Naeini អ្នកនាំពាក្យកងទ័ពជើងទឹក។
• Gholamreza Soleimani៖ ប្រធានកងកម្លាំង Basij។
• Esmail Ahmadi៖ អនុប្រធានកងកម្លាំង Basij។

ក្រៅពីថ្នាក់ដឹកនាំកំពូល និងមន្ត្រីជាន់ខ្ពស់ទាំងនេះ យោធាអ៊ីស្រាអែលបានប៉ាន់ប្រមាណថា ក៏មានទាហានអ៊ីរ៉ង់ និងមេបញ្ជាការថ្នាក់ក្រោមចន្លោះពី ៤ ០០០ ទៅ ៥០០០ នាក់ដែរ ដែលត្រូវបានសម្លាប់នៅក្នុងសង្គ្រាម៕

អត្ថបទ៖ សុខ សុវណ្ណ