NATO ទំនង​ប្ដូរ​​​កិច្ច​ប្រជុំកំពូល​​​របស់ខ្លួន ដើម្បី​បញ្ចៀស​សម្ពាធខ្លាំងពី លោក ត្រាំ

កាលពីថ្ងៃទី២៧ ខែមេសា ប្រភពចំនួន ៦ បានប្រាប់ទីភ្នាក់ងារសារព័ត៌មាន Reuters ថា អង្គការណាតូ កំពុងពិចារណាលើការ​សម្រេច​ចុងក្រោយ​ក្នុងការរៀបចំកិច្ចប្រជុំកំពូលប្រចាំឆ្នាំ ដែលចំណាត់ការនេះអាចជួយចៀសវាងការប្រឈមមុខដាក់គ្នាដ៏តានតឹង ដែលអាចកើតមានជាមួយប្រធានាធិបតីអាមេរិក លោក ដូណាល់ ត្រាំ នៅក្នុងឆ្នាំចុងក្រោយនៃអាណត្តិរបស់លោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែង រដ្ឋបាលរបស់លោកត្រាំ បានធ្វើការរិះគន់យ៉ាងចាស់ដៃជាដដែលៗ ទៅលើសមាជិកដទៃទៀតចំនួន ៣១ ប្រទេស នៃសម្ព័ន្ធភាពការពារជាតិដែលដឹកនាំដោយសហរដ្ឋអាមេរិក ហើយថ្មីៗបំផុតនេះ លោកបានស្ដីបន្ទោសសមាជិកមួយចំនួន ចំពោះការមិនបានផ្ដល់ជំនួយបន្ថែមដល់ប្រតិបត្តិការយោធារបស់អាមេរិក ប្រឆាំងនឹងប្រទេសអ៊ីរ៉ង់។

ភាពញឹកញាប់នៃកិច្ចប្រជុំកំពូលរបស់ណាតូ មានការប្រែប្រួល​ជា​​ប្រវត្តិសាស្ត្រ​ ក្នុង​ពេល​៧៧ ឆ្នាំរបស់សម្ព័ន្ធភាពនេះ ប៉ុន្តែមេដឹកនាំនៃអង្គការនេះ បានជួបប្រជុំគ្នារៀងរាល់រដូវក្ដៅចាប់តាំងពីឆ្នាំ ២០២១ មក ហើយពួកគេនឹងជួបជុំគ្នាម្ដងទៀតនៅឆ្នាំនេះ ក្នុងរដ្ឋធានី អង់ការ៉ា (Ankara) ប្រទេសតួកគី នៅថ្ងៃទី ៧ និងទី ៨ ខែកក្កដា។

ប៉ុន្តែ សមាជិកមួយចំនួនកំពុងជំរុញឲ្យកាត់បន្ថយភាពញឹកញាប់នៃកិច្ចប្រជុំនេះ។ នេះបើតាមការបញ្ជាក់របស់មន្ត្រីជាន់ខ្ពស់អឺរ៉ុបម្នាក់ និងមន្ត្រីការទូតប្រាំរូបទៀត ដែលពួកគេទាំងអស់មកពីបណ្តាប្រទេសជាសមាជិកអង្គការណាតូ បានប្រាប់ភ្នាក់ងារសារព័ត៌មាន Reuters។ សមាជិកណាតូទាំំងនោះ កំពុងស្វែងរកការកាត់បន្ថយរឿងរកាំរកូស និងការសម្រេចចិត្តឲ្យបានកាន់តែប្រសើរជាងមុន។

មន្ត្រីការទូតម្នាក់បានលើកឡើងថា កិច្ចប្រជុំកំពូលឆ្នាំ ២០២៧ ដែលនឹងត្រូវរៀបចំឡើងនៅក្នុងប្រទេស អាល់បានី (Albania) ទំនងជានឹងប្រព្រឹត្តទៅនៅក្នុងរដូវស្លឹកឈើជ្រុះឆ្នាំនោះ ហើយណាតូ ក៏កំពុងពិចារណាមិនរៀបចំកិច្ចប្រជុំទាល់តែសោះនៅឆ្នាំ ២០២៨ ដែលជាឆ្នាំបោះឆ្នោតប្រធានាធិបតីអាមេរិក និងជាឆ្នាំពេញចុងក្រោយនៃអាណត្តិរបស់លោកត្រាំនៅក្នុងតំណែង។

ទោះជាយ៉ាងណាក៏ដោយ មន្ត្រីការទូតម្នាក់ទៀតបានលើកឡើងដែរថា ប្រទេសមួយចំនួនកំពុងជំរុញឲ្យមានការរៀបចំកិច្ចប្រជុំកំពូលរៀងរាល់ពីរឆ្នាំម្ដង ដោយបានបន្ថែមថា មិនទាន់មានការសម្រេចចិត្តណាមួយត្រូវបានធ្វើឡើងនៅឡើយទេ ហើយអគ្គលេខាធិការ លោក Mark Rutte នឹងក្លាយជាអ្នកមានសិទ្ធិសម្រេចចុងក្រោយ។

ដោយឡែក អ្នកសង្កេតការណ៍មួយចំនួនជឿជាក់ថា ចំណាត់ការនេះក៏បានឆ្លុះបញ្ចាំងពីកិច្ចខិតខំប្រឹងប្រែងរបស់អង្គការណាតូ ក្នុងការរក្សានូវ កិច្ចព្រមព្រៀងជាឯកច្ឆន្ទផ្ទៃក្នុង នៅក្នុងអំឡុងពេលដ៏រសើបមួយនេះផងដែរ។ ចំណែកឯ មន្ត្រីការទូតម្នាក់បានលើកឡើងថា វាប្រសើរជាងក្នុងការមានកិច្ចប្រជុំកំពូលតិចតួច ជាជាងមានកិច្ចប្រជុំកំពូលដែលមិនល្អ (ឬពោរពេញដោយជម្លោះ)។ ទោះជាយ៉ាងណា យើងមានការងារជាច្រើនដែលត្រូវធ្វើនៅចំពោះមុខ ហើយយើងដឹងច្បាស់ថាអ្វីដែលយើងត្រូវធ្វើ៕

អត្ថបទ៖ សាង ស្រីល័ក្ខ

នាយករដ្ឋមន្ត្រី អង់គ្លេស ច្រាន​ចោល​លទ្ធ​ភាព​បង្ខំ​លោក​ឲ្យ​​ចុះ​ចេញ​ពីអំណាច​​