ហេតុអ្វី ទុរេន ចាល់ទីផ្សារ តែថៃ និង​​វៀតណាម នៅតែ​សម្រុកដាំ និងមានទិន្នផលកើនឡើងខ្លាំង?

ទុរេនគឺជាដំណាំរយៈពេលវែង ដែល​អាច​ប្រើ​ពេល​​យូរ​មុន​ទទួលបាន​ផល ដោយចំណាយលើ​ការ​ថែទាំ​​ច្រើន​​​ ជា​ងដំណាំ​ផ្សេង​​ៗ​ជា​​ច្រើន​ទៀត​​។ ទិន្នផល​ទុរេន​នៃ​ប្រទេសជិត​ខាងកម្ពុជា​ទាំងពីរ​ ដែលហក់ឡើងខ្លាំងនៅឆ្នាំ ២០២៥-២០២៦ នេះ គឺជាលទ្ធផលនៃការសម្រុកដាំយ៉ាងគំហុករបស់កសិករថៃ និងវៀតណាម កាលពីចន្លោះឆ្នាំ ២០១៨ ដល់ ២០២០ (កាលនោះទុរេនឡើងថ្លៃខ្លាំង)។ ទោះបីបច្ចុប្បន្នទីផ្សារមានបញ្ហា​ប្រឈមក៏ដោយ ដើមទុរេនទាំងនោះធំពេញវ័យ និងដល់ពេលត្រូវផ្តល់ផល ដែលមិនអាចបញ្ឈប់បានឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្អែកតាមរបាយការណ៍ចុងក្រោយពី Reuters, និង Nation Thailand ទោះបីជាមានការចុះផ្សាយថា ​ទុរេន​​ចាល់ទីផ្សារ ឬ តម្លៃធ្លាក់ចុះ បើធៀបនឹងដំណាំកសិកម្មដទៃដូចជា កៅស៊ូ ដំឡូងមី ឬកាហ្វេ ក៏​ទុរេននៅតែផ្តល់ចំណូលខ្ពស់ជាងឆ្ងាយ។ កសិករសុខចិត្តប្រថុយនឹងទីផ្សារទុរេន ប្រសើរជាងដាំដំណាំផ្សេងដែលដឹងច្បាស់ថាបានចំណូលតិច។

ដោយឡែក ចំពោះបញ្ហាចាល់ទីផ្សារច្រើនតែកើតឡើងតែក្នុង រដូវប្រមូលផលរួមគ្នាតែប៉ុណ្ណោះ។ ផ្ទុយទៅវិញ ទុរេនក្រៅរដូវលក់បានតម្លៃខ្ពស់បំផុតក្នុងរយៈពេល ៣ ឆ្នាំចុងក្រោយ ដែលជាអ្នករុញឲ្យទិន្នផលសរុបប្រចាំឆ្នាំកើនឡើង ហើយវាក៏លក់បានតម្លៃខ្ពស់ និងមិនសូវប្រឈមនឹងការកកស្ទះទីផ្សារឡើយ។ នេះក៏ជំរុញឲ្យកសិករនៅតែបន្តពង្រីកការដាំដុះដើម្បីផ្គត់ផ្គង់ទីផ្សារចិន ដែលមានតម្រូវការមិនចេះរីងស្ងួត ជាពិសេសបន្ទាប់ពីចិនអនុញ្ញាតឲ្យនាំចូល ទុរេនក្លាសេ ពីវៀតណាម និងម៉ាឡេស៊ី។

យោងតាម ប្រភពពី HSBC Global Research បង្ហាញថា វៀតណាមបានដណ្ដើមចំណែកទីផ្សារពីថៃបានរហូតដល់ ៤០% ក្នុងរយៈពេលត្រឹម ៣ ឆ្នាំ។ ការប្រកួតប្រជែងរវាងប្រទេសទាំងពីរនេះ បានជំរុញឲ្យផ្ទៃដីដាំដុះចេះតែរីកធំទៅៗ ដើម្បីធានាថា ខ្លួនមានទំនិញគ្រប់គ្រាន់ផ្គត់ផ្គង់ទៅឲ្យទីផ្សារចិន ដែលជាទីផ្សារធំតែមួយគត់ និងមានតម្រូវការមិនចេះរីងស្ងួត (បើទោះជាមានការរឹតបន្តឹងផ្នែករដ្ឋបាលខ្លះក៏ដោយ)៕

អត្ថបទ៖ សាង ស្រីល័ក្ខ