កំពូលតារាភាពយន្តខ្មែរ ឌី សាវ៉េត ទទួលបានការជូនពរយ៉ាងកក់ក្ដៅ ក្នុងថ្ងៃរំលឹកកំណើតគម្រប់វ័យ ៨២ឆ្នាំ

កំពូលតារាភាពយន្តខ្មែរជើងចាស់ ឌី សាវ៉េត ដែលតែងត្រូវបានគេចាត់ទុកថាជា “ផ្ការីកគ្រប់រដូវ” ទោះបីមានវ័យជាង ៨០ឆ្នាំហើយក្តី ក៏នៅតែទទួលបានការគាំទ្រយ៉ាងខ្លាំងពីសំណាក់ទស្សនិកជនទាំងក្នុង និងក្រៅប្រទេស។ ប្រជាប្រិយភាព និងកេរ្តិ៍ឈ្មោះរបស់លោកស្រី នៅតែបន្តរឹងមាំ និងដក់ជាប់ក្នុងបេះដូងមហាជនជានិច្ច។

ក្នុងឱកាសថ្ងៃរំលឹកកំណើតគម្រប់វ័យ ៨២ឆ្នាំ ត្រូវនឹងថ្ងៃទី៧ ខែឧសភា ឆ្នាំ២០២៦ នេះ អ្នកស្រី ឌី សាវ៉េត បានទទួលសារជូនពរយ៉ាងច្រើនពីអ្នកគាំទ្រ សិល្បករ និងសាធារណជនទូទៅ។ សារជូនពរជាច្រើនត្រូវបានចែករំលែកលើបណ្តាញសង្គម ដោយសរសើរចំពោះការរួមចំណែកដ៏ធំធេងរបស់អ្នកស្រី ក្នុងការលើកស្ទួយវិស័យភាពយន្តខ្មែរកន្លងមក។

ជាក់ស្តែង មួយក្នុងចំណោមសារជូនពរទាំងនោះ បានលើកឡើងថា អ្នកស្រីគឺជាតារាដែលមានតម្លៃសិល្បៈខ្ពស់ និងបានចូលរួមយ៉ាងសកម្មក្នុងការអភិវឌ្ឍវិស័យភាពយន្តខ្មែរ ចាប់តាំងពីយុគមាសមុនឆ្នាំ១៩៧៥ រហូតដល់សម័យសន្តិភាពបច្ចុប្បន្ន។ ការខិតខំប្រឹងប្រែង និងទេពកោសល្យរបស់លោកស្រី បាននាំឱ្យវិស័យសិល្បៈជាតិទទួលបានការស្គាល់ និងកោតសរសើរយ៉ាងទូលំទូលាយ។

គួរបញ្ជាក់ថា អ្នកស្រី ឌី សាវ៉េត គឺជាតារាភាពយន្តដ៏ល្បីល្បាញក្នុងអំឡុងទសវត្សរ៍ទី៦០ និងដើមទសវត្សរ៍ទី៧០ ដែលបានសម្តែងក្នុងភាពយន្តជាច្រើន និងបន្សល់ទុកស្នាដៃអមតៈសម្រាប់ជំនាន់ក្រោយ។ ទោះបីពេលវេលាបានកន្លងផុតទៅយូរហើយក៏ដោយ កេរ្តិ៍ឈ្មោះ និងស្នាដៃរបស់លោកស្រី នៅតែមានឥទ្ធិពល និងតម្លៃខ្ពស់ក្នុងវិស័យសិល្បៈខ្មែរ។

ដោយសារតែការរួមចំណែកដ៏អស្ចារ្យនេះ ឌី សាវ៉េត ត្រូវបានគេចាត់ទុកថាជារូបតំណាងសំខាន់មួយនៃវិស័យភាពយន្តខ្មែរ ដែលមិនត្រឹមតែបង្កើតកេរ្តិ៍ឈ្មោះឲ្យខ្លួនឯងប៉ុណ្ណោះទេ ប៉ុន្តែថែមទាំងនាំមកនូវកិត្តិយសជូនជាតិផងដែរ៕ ដោយ៖ ចាន់រ៉ា