រាជរដ្ឋាភិបាល និងវិស័យឯកជន រួមគ្នាពិភាក្សាជំរុញកំណែទម្រង់ និងការវិនិយោគនៅកម្ពុជា

នាព្រឹកថ្ងៃព្រហស្បតិ៍ ទី៤ ខែមិថុនា ឆ្នាំ២០២៦ លោក ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញចូលរួមកម្មវិធី «ទទួលទានអាហារពេលព្រឹកធុរកិច្ចលើកទី២ រវាងស្ថាប័នរដ្ឋ និងវិស័យឯកជន» ក្រោមអធិបតីភាពដ៏ខ្ពង់ខ្ពស់លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC) នៅសណ្ឋាគារ ហៃយ៉ាត់ រីជិនស៊ី ភ្នំពេញ។

កម្មវិធីដែលរៀបចំដោយសភាពាណិជ្ជកម្មអាម៉េរិកប្រចាំនៅកម្ពុជា (AmCham Cambodia) ក្រោមការផ្តួចផ្តើមរបស់ក្រុមប្រឹក្សាអភិវឌ្ឍន៍កម្ពុជា មានការអញ្ជើញចូលរួមពីថ្នាក់ដឹកនាំក្រសួង-ស្ថាប័នជាតិ តំណាងអង្គទូតនានាប្រចាំព្រះរាជាណាចក្រកម្ពុជា និងថ្នាក់ដឹកនាំសភាពាណិជ្ជកម្ម និងសមាគមធុរកិច្ចអន្តរជាតិឈានមុខ ដែលជាតួអង្គសេដ្ឋកិច្ចដ៏សំខាន់ ព្រមទាំងសមាជិក សមាជិកា នៃស្ថាប័នពាក់ព័ន្ធជាច្រើនរូបទៀតផងដែរ។

ពិធីដ៏មានសារៈសំខាន់នេះធ្វើឡើងក្នុងគោលបំណងពិនិត្យឡើងវិញអំពីដំណើរការនៃយន្តការវេទិការាជរដ្ឋាភិបាល-វិស័យឯកជន (G-PSF) កំណត់ភាពខ្វះចន្លោះជាក់ស្តែងក្នុងការដាក់ស្នើបញ្ហា កិច្ចពិគ្រោះយោបល់ ការរៀបចំឯកសារ ការតាមដាន និងការត្រួតពិនិត្យ និងប្រមូលមតិយោបល់ពីសភាពាណិជ្ជកម្មអន្តរជាតិអំពីវិធីសាស្រ្តធ្វើឱ្យយន្តការ G-PSF កាន់តែច្បាស់លាស់ អាចព្យាករបាន និងមានប្រសិទ្ធភាពជាងមុន ព្រមទាំងពិភាក្សាអំពីកំណែទម្រង់អាទិភាពនានា ដើម្បីលើកកម្ពស់ប្រសិទ្ធភាពនៃការងាររបស់ក្រុមការងារ G-PSF និងក្រុមការងារបច្ចេកទេសជាដើម៕