រដ្ឋមន្ត្រីព្រមានវិធានការឃាត់រថយន្តដឹកលើសទម្ងន់​ទុក១ឆ្នាំមិនរើសមុខអ្នកមានអ្នកក្រ

ឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃទី ២២ ខែ​មិថុនា​ បានថ្លែងព្រ​មាន​​ចាត់វិធានការផាកពិន័យ និងឃាត់រថយន្តដឹកលើសទម្ងន់ទុក រយៈ​ពេល​១ឆ្នាំ ដោយមិនរើសមុខ អ្នកមានអ្នក្រ ឬមានខ្សែ។

លោក រដ្ឋមន្ត្រីថ្លែងក្នុងពេលចុះពិនិត្យវឌ្ឍន​ភាព​ការ​ងារ​សាងសង់ផ្លូវជាតិលេខ៣ នៅថ្ងៃទី ២២ ខែ​មិថុនា​ម្សិលមិញ។

លោក ស៊ុន ចាន់ថុលបានលើកឡើងថា “ន្លងមក ក្រសួងបានចាត់វិធានការ ដូចភ្លៀងរលឹម រួមមាន​ការបង្កើតក្រុមការងារជញ្ជីងចល័តនៅតាមផ្លូវជាតិធំៗផងដែរ ដោយក្នុងនោះបាន ផាកពិន័យយាន​យន្ត​ដឹកជញ្ជូនលើសទម្ងន់កម្រិតកំណត់ដោយច្បាប់បានប្រមាណជាង១០០គ្រឿង និងបានឃាត់​យាន​យន្តទុករយៈពេល១ឆ្នាំ”។

បើតាមលោក ស៊ុន ចាន់ថុល ក្រសួងនៅតែបន្តអនុវត្តវិធានការនេះបន្តទៀត ដោយ​មិន​យោគ​យល់ចំពោះឡានអ្នកក្រ ឡានអ្នកមាន អ្នកមានខ្នង ឬឡានអ្នកអត់ខ្នងអ្វីឡើយ។

ឯកឧត្តមទេសរដ្ឋមន្រ្តី ក៏បានស្នើឱ្យបងប្អូនប្រជាពលរដ្ឋ អ្នកប្រើប្រាស់ផ្លូវ គោរពច្បាប់ទាំងអស់គ្នា ចូលរួមថែរក្សាទ្រព្យសម្បត្តិជាតិយើងឱ្យបានគង់វង្ស និងប្រើប្រាស់បានយូរអង្វែង ដោយកុំប្រថុយ ប្រថានដឹកជញ្ជូនលើសទម្ងន់ ដែលបង្កឱ្យផ្លូវឆាប់ខូច បង្កគ្រោះថ្នាក់ចរាចរណ៍ កុំបើកលើសល្បឿន​កំណត់ដោយច្បាប់ ដើម្បីចូលរួមក្នុងការកសាងប្រទេសជាតិ៕