វៀតណាម ឲ្យយកមនុស្សទៅធ្វើតេស្តថ្នាំព្យាបាលកូវីដរបស់បារាំង ជាថ្នូរទទួលយកបច្ចេកវិទ្យា

ក្រសួងសុខាភិបាលវៀតណាមបាននិយាយកាលពីថ្ងៃពុធទី០៨ខែកញ្ញាថា ខ្លួននឹងសហការជាមួយការធ្វើតេស្តលើមនុស្ស សម្រាប់ថ្នាំព្យាបាលជំងឺកូវីដ-១៩ របស់បារាំង ហើយក្រោយមក នឹងទទួលយកបច្ចេកវិទ្យារបស់ថ្នាំនេះ។

ថ្នាំ XAV-19 ដែលបង្កើតឡើងដោយក្រុមហ៊ុនជីវបច្ចេកវិទ្យា Xenothera បានឆ្លងកាត់ដំណាក់កាលទី ១ និងទី ២ នៃការសាកល្បងលើមនុស្ស ដោយបង្ហាញថា វាមានសុវត្ថិភាពនិងប្រសិទ្ធភាពប្រឆាំងកូវីដ បន្សាបមេរោគកូរ៉ូណានិងកាត់បន្ថយការរលាក។

ក្រសួងសុខាភិបាលវៀតណាមនិយាយថា ខ្លួននឹងជួយដល់ការធ្វើតេស្តដំណាក់កាលទី ៣ លើមនុស្ស។

លោកស្រី Odile Duvaux សហស្ថាបនិកនិងជានាយកប្រតិបត្តិ Xenothera បានឲ្យដឹងថា ក្រុមហ៊ុនរបស់លោកស្រីបានត្រៀមខ្លួនរួចជាស្រេច ដើម្បីសហការជាមួយក្រសួងនិងផ្ទេរបច្ចេកវិទ្យាផលិតកម្ម។

ការសាកល្បងលើមនុស្សចំពោះថ្នាំ XAV-19 ក៏កំពុងត្រូវបានធ្វើឡើងផងដែរ នៅប្រទេសបារាំង ក្រិក អេស្ប៉ាញនិងបណ្តាប្រទេសអឺរ៉ុបមួយចំនួនទៀត។

គួរបញ្ជាក់ថា វៀតណាមតែងតែស្វែងរកថ្នាំនិងការព្យាបាលជំងឺកូវីដបន្ថែមទៀតនៅជុំវិញពិភពលោក។ ថ្នាំមួយចំនួនដូចជា molnupiravir កំពុងឆ្លងកាត់ការសាកល្បងលើមនុស្សក្នុងប្រទេសវៀតណាម ហើយថ្នាំដទៃទៀតដូចជា remdesivir ត្រូវបានប្រើប្រាស់រួចទៅហើយដើម្បីព្យាបាលករណីធ្ងន់ធ្ងរនៅក្នុងមន្ទីរពេទ្យ។

ប្រទេសនេះមានករណីកូវីដចំនួន ៥៥៩,៣៤៧ ករណីនៅក្នុងរលកទី ៤ ដែលបានចាប់ផ្តើមកាលពីចុងខែមេសា៕

ប្រែសម្រួល៖ Vann Vann

ប្រភព៖ VN Express

ចុចអាន៖ បាងកក ប្រើរថយន្តក្រុង ចាក់វ៉ាក់សាំងចល័តជូន មនុស្សចាស់និងក្រុមងាយរងគ្រោះ