ប្រេសិតពិសេស​អាស៊ាន​៖ មិនអាចឱ្យវិបត្តិនៅ​មីយ៉ាន់ម៉ា ទាញ​ឱ្យដើរថយក្រោយនោះទេ

​លោកឧបនាយករដ្ឋមន្ត្រី ប្រាក់ សុខុន​ រដ្ឋមន្ត្រីការបរទេស និងសហប្រតិ​បត្តិការអន្តរជាតិ​កម្ពុជា ក្នុងឋានៈ​ជាប្រេសិតពិសេសរបស់ប្រធានអាស៊ាន​បានលើក​ឡើង​ពី​បញ្ហា​ប្រទេស​មីយ៉ាន់ម៉ា ខណៈ​លោ​ក​​​ផ្តល់ព័ត៌មានជូនក្រុមប្រឹក្សាសន្តិសុខអង្គការសហប្រ​ជា​ជាតិអំពីស្ថានភាព នៃប្រទេ​ស​មីយ៉ាន់ម៉ា កាលពីវេលាម៉ោង​១០​យប់ (ម៉ោងនៅកម្ពុជា) ​ថ្ងៃទី​២៨ ខែមករា ឆ្នាំ២០២២​។​​

នៅក្នុងឱកាសនោះ លោក​ឧបនាយករដ្ឋមន្ត្រី ប្រាក់ សុខុន ​​បានលើកឡើងពី​ភាពស្មុគស្មាញចាក់​ស្រេះ នៃស្ថានភាពនៅក្នុងប្រទេសមីយ៉ាន់ម៉ា និងការ​វិវត្តថ្មីៗ នៃបញ្ហាសន្តិសុខនយោ​បាយ និងមនុស្សធម៌ នៅក្នុងប្រទេសមីយ៉ាន់ម៉ា ហើយលោក​ក៏បានជម្រាបជូនប្រធាន​ក្រុមប្រឹក្សា អំពីកិច្ចខិតខំប្រឹងប្រែង និងប្តេជ្ញាចិត្តរបស់អាស៊ាន ក្នុងការដោះស្រាយ​វិបត្តិ​មីយ៉ាន់ម៉ា  ជាពិសេសអំពីលទ្ធផលនៃដំណើរទស្សនកិច្ចនាពេលថ្មីៗនេះ របស់សម្តេច តេជោ ហ៊ុន សែន ​ ទៅកាន់ប្រទេសមីយ៉ាន់ម៉ា និងជំហានឆ្ពោះទៅមុខដើម្បីជំរុញវឌ្ឍនភាពក្នុងការអនុវត្តកិច្ចព្រមព្រៀងជាឯកច្ឆន្ទប្រាំចំណុច (5PC)។

ខណៈពេលជម្រាបជូនអំពីដំណើរទស្សនកិច្ចរបស់​សម្តេចតេជោ ហ៊ុន សែន ទៅកាន់ប្រទេសមីយ៉ាន់ម៉ា លោក​ឧបនាយករដ្ឋមន្ត្រី ប្រាក់ សុខុន ​ក្នុងនាម​ប្រេសិតពិសេសរបស់ប្រធានអាស៊ាន បានគូសបញ្ជាក់ពីគោលបំណងចម្បងនៃដំណើរទស្សនកិច្ច រួមមាន៖

ទី១, ភ្ជាប់ទំនាក់ទំនងជាមួយទីក្រុងណៃពិដោឡើងវិញ ដើម្បីស្វែងរកមធ្យោបាយឆ្ពោះទៅរកការអនុវត្តកិច្ចព្រមព្រៀងជាឯកច្ឆន្ទប្រាំចំណុចរបស់អាស៊ាន។  ការបញ្ចប់អំពើហិង្សា និងការបន្តបទឈប់បាញ់ដោយភាគីពាក់ព័ន្ធទាំងអស់ គឺជាការចាំបាច់ដោយខានមិនបានក្នុងការកសាងទំនុកចិត្ត និងបង្កើតបរិយាកាសអំណោយផលសម្រាប់កិច្ចសន្ទនាប្រកបដោយបរិយាប័ន្ន 

ទី២, ដើម្បីធានាថា ដំណើរទស្សនកិច្ចជាលើកដំបូងរបស់ប្រេសិតពិសេសរបស់ប្រធានអាស៊ាន ទៅកាន់ប្រទេស មីយ៉ាន់ម៉ា អាចប្រព្រឹត្តទៅបាន ដើម្បីជួយសម្រួលដល់ការសម្របសម្រួលនៃកិច្ចសន្ទនាដោយភាគីពាក់ព័ន្ធផ្ទាល់ និងទី៣, ដើម្បីធានាបាននូវការផ្តល់ជំនួយមនុស្សធម៌ ដោយសុវត្ថិភាព និងឆាប់រហ័សទៅដល់ប្រជាជនដែលត្រូវការជំនួយបំផុតនៅក្នុងប្រទេសមីយ៉ាន់ម៉ា។

លោក​ឧបនាយករដ្ឋមន្ត្រី ប្រាក់ សុខុន ​បានបញ្ជាក់ថា “ដំណើរទស្សនកិច្ចរបស់នាយករដ្ឋមន្ត្រីយើងខ្ញុំ ទៅកាន់ទីក្រុងណៃពិដោ គឺជាបេសកកម្មដើម្បីទម្លុះទម្លាយភាពជាប់គាំង។ ទស្សនកិច្ចនេះ មានគោលបំណងដើម្បីកសាងទំនុកចិត្ត ការជឿជាក់ និងការយោគយល់គ្នា ហើយទស្សនកិច្ចនេះ ពិតជាអាចដើរតួនាទីជាការបោះជំហានដ៏រឹងមាំមួយឆ្ពោះទៅរកវឌ្ឍនភាពបន្ថែមទៀត។ សម្ដេចតេជោ បានទៅទីនោះ ដើម្បីដាំដើមឈើ ជាដើមឈើសម្រាប់សន្តិភាព និងការផ្សះផ្សាជាតិ។ វាត្រូវការពេលវេលា ភាពអត់ធ្មត់ និងការអនុវត្តជាក់ស្តែង មុនពេលគេអាច​ប្រមូលផលពីដើមឈើនោះបាន”។

បើតាមលោក​ឧបនាយករដ្ឋមន្ត្រី ប្រាក់ សុខុន ​​ឥឡូវនេះ លោកកំពុងធ្វើការលើការរៀបចំកម្មវិធីសម្រាប់ដំណើរទស្សនកិច្ចលើកដំបូងរបស់លោក ក្នុងនាមជាប្រេសិតពិសេសស្ដីពីមីយ៉ាន់ម៉ា និងអាទិភាព របស់លោកក្នុងការអនុវត្តកិច្ចព្រមព្រៀងជា​ឯកច្ឆន្ទប្រាំចំណុច ដែល​នឹងត្រូវលើកយកទៅពិភាក្សាក្នុងអំឡុងពេលកិច្ចប្រជុំចង្អៀតរដ្ឋមន្ត្រីការបរទេសអាស៊ាននាពេលខាងមុខនេះ ដែលគ្រោងរៀបចំពីថ្ងៃទី ១៦-១៧ ខែកុម្ភៈ ជាការត្រៀមសម្រាប់ការរៀបចំកិច្ចប្រជុំពិគ្រោះយោបល់ពហុភាគីពាក់ព័ន្ធអំពីជំនួយមនុស្សធម៌ ដែលនឹងមានការគាំទ្រ និងកិច្ចសហប្រតិបត្តិការពីលេខាធិការដ្ឋានអាស៊ាន (ASEC) និងប្រេសិតពិសេសរបស់អគ្គលេខាធិការអង្គការសហប្រជាជាតិ (UNSG) ហើយនឹងប្រមូលនូវវិធីសាស្រ្ត មនុស្សធម៌ជាក់ស្តែងទាំងអស់ពីអ្នកជំនាញ និងទីភ្នាក់ងារមនុស្សធម៌ក្នុងស្រុក តំបន់ និង​អន្តរជាតិ ដើម្បីជួយសម្រួលដល់ការផ្តល់ជំនួយមនុស្សធម៌ឱ្យបានឆាប់រហ័ស។

លោកឧបនាយករដ្ឋមន្រ្តី ប្រាក់ សុខុន បាន​បញ្ចប់​ការ​ផ្តល់ព័ត៌មាន​​របស់​លោក ដោយ​សង្កត់ធ្ងន់ថា គ្រប់សកម្មភាពរបស់យើង គឺផ្អែកលើស្មារតី នៃកិច្ចព្រមព្រៀងជាឯកច្ឆន្ទប្រាំចំណុច និងធម្មនុញ្ញ អាស៊ាន។ នៅមានបញ្ហា និងការប្រឈមជាច្រើនផ្សេងទៀតក្រៅពីវិបត្តិនៅមីយ៉ាន​ម៉ា ដែល​អាស៊ានត្រូវការដោះស្រាយ និង​បាន​បន្ថែម​ថា លើស​ពីនេះ យើង​ត្រូវរែក​ពុនសុខុមាលភាពតំបន់ទាំងមូល យើងមិនអាចឱ្យវិបត្តិនៅមីយ៉ាន់ម៉ាទាញយើងឱ្យដើរថយក្រោយនោះទេ ហើយយើងត្រូវតែរួមដៃគ្នា ដើម្បីដោះស្រាយបញ្ហាប្រឈមទាំងអស់នេះរួមគ្នា៕ ​កោះកែវ