គណបក្សហ៊្វុនស៊ិនប៉ិច ត្រៀមដាក់បេក្ខជនឈរឈ្មោះបោះឆ្នោត ឲ្យបាន ៧០ភាគរយ ក្នុងចំណោមឃុំ-សង្កាត់ ១៦៥២

គណបក្សហ៊្វុនស៊ិនប៉ិច ត្រៀមដាក់បេក្ខជនឈរឈ្មោះបោះឆ្នោត ជ្រើសរើសក្រុមប្រឹក្សាឃុំ-សង្កាត់អាណត្តិទី ៥ ឲ្យបាន ៧០ភាគរយ ក្នុងចំណោមឃុំ-សង្កាត់ចំនួន ១៦៥២ នៅទូទាំងប្រទេស។ បើតាម គ.ជ.ប ការចុះទទួលពាក្យស្នើសុំ ចុះបញ្ជីបេក្ខ ជនគណបក្សនយោបាយ សម្រាប់ឈរឈ្មោះបោះឆ្នោតជ្រើសរើស ក្រុមប្រឹក្សាឃុំ-សង្កាត់អាណត្តិទី ៥ ឆ្នាំ ២០២២ មានរយៈពេល ៣ថ្ងៃ គឺចាប់ពីថ្ងៃទី ៤ ខែមីនា និងបញ្ចប់នៅថ្ងៃទី ៦ ខែមីនា ឆ្នាំ ២០២២។

លោក ញឿន រ៉ាដែន អ្នកនាំពាក្យគណបក្សហ៊្វុនស៊ិនប៉ិច មានប្រសាសន៍ប្រាប់កម្ពុជាថ្មី នៅថ្ងៃទី ៣ ខែមីនានេះថា គណបក្សហ៊្វុនស៊ិនប៉ិច ដែលមានព្រះអង្គម្ចាស់ នរោត្តម ចក្រាវុធ ជាព្រះប្រធានគណបក្ស បានត្រៀមខ្លួនរួចរាល់ហើយ ក្នុងការដាក់បេក្ខជនឈរឈ្មោះបោះឆ្នោត សម្រាប់ការបោះឆ្នោតជ្រើសរើស ក្រុមប្រឹក្សាឃុំ-សង្កាត់អាណត្តិទី ៥ នេះ តាមការកំណត់របស់គណៈកម្មាធិការជាតិ រៀបចំការបោះឆ្នោត (គ.ជ.ប)។

លោកបន្តថា តាមតួលេខបឋមពីគណៈកម្មការប្រតិបត្តិរាជធានី-ខេត្ត របស់គណបក្សហ៊្វុនស៊ិនប៉ិច គឺមកដល់ពេលនេះ បានត្រៀមដាក់បេក្ខជន ឈរឈ្មោះបោះឆ្នោតចំនួន ៧០ភាគរយ ក្នុងចំណោមឃុំ-សង្កាត់​សរុបចំនួន ១៦៥២ឃុំ-សង្កាត់ នៅទូទាំងប្រទេស។  

លោក ញឿន រ៉ាដែន បានបន្ថែមថា «ទាក់ទងទៅនឹងបេក្ខជននីមួយៗ គឺយើងបានផ្ដោតទៅលើអតីតភាព ក៏ដូចជាបទពិសោធន៍ការងារ ដែលគាត់ធ្លាប់បម្រើ ជាមួយគណបក្សហ៊្វុនស៊ិនប៉ិច ហើយគណបក្សហ៊្វុនស៊ិនប៉ិច អត់មានការផ្លាស់ប្ដូរទេ គឺនៅតាមឃុំ-សង្កាត់ របស់គណបក្សហ៊្វុនស៊ិនប៉ិចនោះ គឺយើងមានប្រធានបក្សឃុំរបស់ខ្លួននីមួយៗ រួចជាស្រេចហើយ អញ្ចឹងយើងផ្ដោតអទិភាព ផ្ដល់ជូនពួកគាត់នៅដដែល ហើយនិងក្នុងនោះដែរ ក៏យើងមានបញ្ចូលនូវចលនាយុវជន របស់យើងបន្ថែមទៀត ដើម្បីបន្សាំខ្លួន នៅក្នុងការចូលរួមដឹកនាំ ជាបន្តបន្ទាប់»។

សូមជម្រាបថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី ៥ ឆ្នាំ ២០២២ នឹងប្រព្រឹត្តទៅនៅថ្ងៃទី ៥ ខែមិថុនា ឆ្នាំ ២០២២ ខាងមុខនេះ។ គិតត្រឹមថ្ងៃទី ២ ខែមីនា ឆ្នាំ ២០២២ គ.ជ.ប បានទទួលពាក្យស្នើសុំបង្កើតគណនី ប្រើប្រាស់កម្មវិធីរៀបចំបញ្ជី បេក្ខជនឈរឈ្មោះបោះឆ្នោត ពីគណបក្សនយោ​បាយចំនួន ១១ ហើយ៕

អត្ថបទ៖ ឃួន សុភ័ក្រ