បក្សហ្វ៊ុនស៊ិនប៉ិច ខកចិត្តចំពោះបក្សនយោបាយមួយដែលកំពុងគំរាមកំហែងដល់ឆន្ទៈរបស់អង្គបោះឆ្នោត

គណបក្សរាជានិយម ហ្វ៊ុនស៊ិនប៉ិច បានសម្ដែងការខកចិត្តចំពោះគណបក្សមួយដែលកំពុងដើរឆ្ងាយពីគោលការណ៍លទ្ធិប្រជាធិបតេយ្យ ហើយបែរជាមកធ្វើសកម្មភាពគំរាមកំហែងដល់សិទ្ធិសេរីភាព និងឆន្ទៈរបស់អង្គបោះឆ្នោតទៅវិញ។  

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការដែលគណបក្សហ្វ៊ុនស៊ិនប៉ិចបង្ហាញការខកចិត្តបែបនេះ គឺបន្ទាប់ពីមានគណបក្សនយោបាយមួយ បាននិងកំពុងធ្វើសកម្មភាពគំរាមកំហែង បង្គាប់បញ្ជាឱ្យក្រុមប្រឹក្សាឃុំ-សង្កាត់របស់ខ្លួន ដែលជាអង្គបោះឆ្នោត ទៅបោះឆ្នោតឱ្យគណបក្សនេះ ឬគណបក្សនោះ សម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ខាងមុខនេះ។ ទង្វើគំរាមកំហែងដល់អង្គបោះឆ្នោតនេះ ត្រូវបានគណៈកម្មាធិការជាតិរៀបចំការបោះឆ្នោត ក្រសួងមហាផ្ទៃ ក៏ដូចជាគណបក្សនយោបាយជាច្រើន រួមទាំងមជ្ឈដ្ឋានសាធារណៈទូទៅ ចេញមកថ្កោលទោស និងប្រឆាំងដាច់ខាតចំពោះទង្វើបែបនេះ។  

គណបក្សហ៊្វុនស៊ិនប៉ិច ដែលជាគណបក្សមួយបានចូលរួមក្នុងការប្រកួតប្រជែងសម្រាប់ការបោះឆ្នោតព្រឹទ្ធសភា នីតិកាល ទី៥ ឆ្នាំ២០២៤ បានចេញសេចក្ដីថ្លែងការណ៍មួយ នៅថ្ងៃទី១៩ ខែកុម្ភៈ ឆ្នាំ២០២៤នេះ ដោយសម្តែងការខកចិត្តយ៉ាងខ្លាំងដែលបានឃើញ គណបក្សមួយចំនួន ងាកចេញពីគោលការណ៍ប្រជាធិបតេយ្យ ដោយប្រើប្រាស់ការបំភិតបំភ័យ ការគំរាមកំហែង គាបសង្កត់សិទ្ធិ និងសេរីភាពក្នុងការបោះឆ្នោតតាមឆន្ទៈរបស់អង្គបោះឆ្នោត។

គណបក្សហ៊្វុនស៊ិនប៉ិច បានចាត់ទុកថា សកម្មភាពបែបនេះមិនត្រឹមតែធ្វើឱ្យខូចដល់ក្រមសីលធម៌នៃលទ្ធិប្រជាធិបតេយ្យប៉ុណ្ណោះទេ ថែមទាំងធ្វើឱ្យខូចដល់ខ្លឹមសារនៃដំណើរការបោះឆ្នោតដោយយុត្តិធម៌ ក្បត់តម្លៃមូលដ្ឋាននៃប្រព័ន្ធពហុបក្ស និងឧត្តមគតិនៃអភិបាលកិច្ចប្រជាធិបតេយ្យពិតប្រាកដ។ គណបក្សរាជានិយមនេះ សង្កត់ធ្ងន់ថា គណបក្សនយោបាយ ត្រូវចៀសវាងការប្រព្រឹត្តិខុសច្បាប់ និងគេចវេះពីគោលការណ៍ណែនាំផ្សេងៗសម្រាប់ការបោះឆ្នោតជ្រើសតាំងសមាជិកព្រឹទ្ធសភា៕