រុស្ស៊ី​​អធិប្បាយ​​ពី​​ស្ថាន​ភាព​​កិច្ច​​ព្រម​​ព្រៀង​សន្តិភាព​​អ៊ុយក្រែន

មានវឌ្ឍនភាពខ្លះនៅក្នុងកិច្ចពិភាក្សាសន្តិភាពរវាងរដ្ឋាភិបាលក្រុងមូស្គូ និងរដ្ឋាភិបាលក្រុងកៀវ ប៉ុន្តែសេចក្តីព្រាងមិនទាន់រួចរាល់ដើម្បីដាក់ជូនកិច្ចប្រជុំកំពូលរវាងប្រធានាធិបតីប្រទេសទាំងពីរឡើយ។ លោក Vladimir Medinsky ប្រធានគណៈប្រតិភូរុស្ស៊ីបាននិយាយ។

លោក Medinsky បានសរសេរតាម Telegram កាលពីថ្ងៃអាទិត្យថា ៖«ភាគីអ៊ុយក្រែនកាន់តែមានភាពប្រាកដប្រជានៅក្នុងវិធីសាស្ត្ររបស់ខ្លួនចំពោះបញ្ហាពាក់ព័ន្ធនឹងស្ថានភាពអព្យាក្រឹត និងគ្មាននុយក្លេអ៊ែររបស់អ៊ុយក្រែន»។

«ហើយក៏មានការយោគយល់គ្នារវាងទីក្រុងមូស្គូ និងទីក្រុងកៀវលើតម្រូវការដើម្បីបង្កើតប្រព័ន្ធនៃការធានាសន្តិសុខអន្តរជាតិមួយសម្រាប់ប្រទេសអ៊ុយក្រែនអព្យាក្រឹត»។ លោកបានបន្ថែម។

លោក Medinsky បានលើកឡើងថា ក្នុងចំណោមរឿងផ្សេងទៀតដែលបានយល់ព្រមដោយភាគីទាំងពីរអំឡុងកិច្ចពិភាក្សានៅទីក្រុងអ៊ីស្តង់ប៊ុលកាលពីសប្តាហ៍មុនគឺការបដិសេធរបស់ទីក្រុងកៀវលើការដាក់ពង្រាយកម្លាំងទ័ពបរទេស មូលដ្ឋានទ័ព និងអាវុធវាយប្រហារណាមួយលើទឹកដីអ៊ុយក្រែន ការដាក់ពង្រាយ និងការផលិតអាវុធប្រល័យលោក ព្រមទាំងការធ្វើសមយុទ្ធជាមួយយោធាបរទេសដោយគ្មានការយល់ព្រមពីរដ្ឋធានា រាប់ទាំងរុស្ស៊ីផង។

ទោះបីជាយ៉ាងណា លោក Medinsky មិនបានយល់ព្រមជាមួយអ្នកចរចាកំពូលរបស់អ៊ុយក្រែនគឺលោក David Arakhamia ដែលបានអះអាងថា ទីក្រុងមូស្គូបានទទួលយកគោលជំហររបស់ទីក្រុងកៀវលើចំណុចទាំងអស់ លើកលែងតែបញ្ហានៅតំបន់ Crimea។

«ខ្ញុំជំទាស់»។ បុរសរុស្ស៊ីរូបនេះបានសរសេរដោយទទួចថា គោលជំហររបស់ទីក្រុងមូស្គូលើស្ថានភាពតំបន់ Crimea និងសាធារណៈរដ្ឋ Donetsk និង Lugansk នៅដដែលគឺគ្មានការប្រែប្រួលទេ។

ទីក្រុងមូស្គូកំពុងទាមទារឲ្យទីក្រុងកៀវទទួលស្គាល់តំបន់ Crimea ជាផ្លូវការថាជាផ្នែកមួយរបស់ប្រទេសរុស្ស៊ី ហើយសាធារណៈរដ្ឋ Donbass ជារដ្ឋឯករាជ្យ។ តំបន់ Crimea បានបោះឆ្នោតចាកចេញពីប្រទេសអ៊ុយក្រែន និងបានចូលរួមជាមួយរុស្ស៊ីវិញ បន្ទាប់ពីរដ្ឋប្រហារ Maidan ឆ្នាំ២០១៤នៅទីក្រុងកៀវ។

អំឡុងពេលកិច្ចពិភាក្សាថ្មីៗនេះនៅទីអ៊ីស្តង់ប៊ុល គណៈប្រតិភូអ៊ុយក្រែនបានសន្យាថា ទីក្រុងកៀវនឹងមិនបង្កើតការប៉ុនប៉ង់ដើម្បីយកតំបន់ Donbass ដោយកម្លាំងឡើយ និងបានស្នើឲ្យមានការចរចាដាច់ដោយឡែកពីស្ថានភាពតំបន់ Crimea ក្នុងរយៈពេល១៥ឆ្នាំ៕

ប្រែសម្រួល៖ វីរបុត្រ
ប្រភព៖ RT