ឆេះសាឡាងដឹកអ្នកដំណើរ ១៣៤ នាក់នៅ ហ្វីលីពីន ស្លាប់ច្រើននាក់

ឆ្មាំសមុទ្រហ្វីលីពីនបាននិយាយនៅថ្ងៃចន្ទនេះថា មនុស្សចំនួន ៧ នាក់បានស្លាប់ បន្ទាប់ពីសាឡាងល្បឿនលឿនដែលដឹកមនុស្សចំនួន ១៣៤ នាក់នៅក្នុងប្រទេសហ្វីលីពីនបានឆាបឆេះ ខណៈអ្នកដំណើរ ៧ នាក់ផ្សេងទៀតនៅតែបាត់ខ្លួននៅឡើយ ។

សាឡាងនេះបានឆេះមុននឹងទៅដល់កំពង់ផែ Real ក្នុងខេត្ត Quezon ចម្ងាយប្រហែល ៦០ គីឡូម៉ែត្រ ភាគខាងកើតនៃរដ្ឋធានីម៉ានីល បន្ទាប់ពីបានចាកចេញពីកោះ Polilio នៅម៉ោង ៥ ព្រឹកម៉ោង ។

ឆ្មាំឆ្នេរសមុទ្របាននិយាយនៅក្នុងសេចក្តីថ្លែងការណ៍មួយថា ស្ត្រី ៥ នាក់ និងបុរស ២ នាក់បានស្លាប់ ខណៈពេលដែលអ្នកដំណើរ ១២០ នាក់ត្រូវបានជួយសង្គ្រោះ ហើយ ២៣ នាក់ក្នុងចំណោមពួកគេបានរងរបួស ។

រូបភាពដែលបានចែករំលែកដោយឆ្មាំឆ្នេរសមុទ្របានបង្ហាញឲ្យឃើញពីអ្នកដំណើរពាក់អាវពងនៅសមុទ្ររង់ចាំការជួយសង្គ្រោះ ខណៈដែលអ្នកខ្លះត្រូវបានបញ្ជូនទៅកាន់កន្លែងសុវត្ថិភាពដោយកប៉ាល់ដឹកទំនិញនៅក្នុងតំបន់នោះ ក្រោយអគ្គីភ័យ ​និង​ផ្សែង​ហុយ​​ពេញសាឡាង​ដឹក​អ្នកដំណើរកម្ពស់​ ២ ​ជាន់មួយនេះ​ ។

ចំណែកមូលហេតុនៃការឆេះនេះមិនទាន់ដឹងច្បាស់នៅឡើយទេ ប៉ុន្តែហ្វីលីពីនដែលជាប្រជុំកោះជាង ៧,៦០០ កោះ មានកំណត់ត្រាមិនល្អឡើយសម្រាប់សុវត្ថិភាពដែនសមុទ្រ ដោយសារភាគច្រើនសាឡាងរបស់ពួកគេតែដាក់មនុស្សច្រើនកកកុញ និងមានអាយុកាលច្រើនឆ្នាំជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera