ព័ត៌មានជាតិ

ស្រុកព្រះស្តេច គ្រោងបង្កើតវិទ្យាល័យថ្មីមួយទៀត ដើម្បីបង្ខិតការអប់រំដល់ពលរដ្ឋមូលដ្ឋាន

បានផុស

៣ years មុន

នៅ

ថ្ងៃពុធ ២៥ ឧសភា ២០២២

ដោយ

ខណៈដែលស្រុកព្រះស្តេចមានវិទ្យាល័យ ៣ រួចទៅហើយ បើតាមប្រធានមន្ទីរអប់រំយុវជននិងកីឡាខេត្តព្រៃវែងបានឲ្យកម្ពុជាថ្មីដឹងពីគម្រោងបង្កើតវិទ្យាល័យថ្មីមួយទៀត ដែលបានជំនួយពីសប្បុរសជន។

លោកប៉ាវ សុធីរ ប្រធានមន្ទីរអប់រំ យុវជននិងកីឡាខេត្តព្រៃវែងបានឲ្យដឹងថា ដោយសារស្រុកព្រះស្តេចមានប្រជាពលរដ្ឋច្រើន ហើយគម្លាតភូមិសាស្ត្រឆ្ងាយពីគ្នា ទើបមន្ទីរកំពុងស្នើសុំគោលការណ៍ក្នុងការសាងសង់វិទ្យាល័យថ្មីមួយទៀត ដើម្បីកាត់បន្ថយអត្រាបោះបង់ការសិក្សារបស់សិស្សានុសិស្សក្នុងមូលដ្ឋាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោកប៉ាវ សុធីរ បច្ចុប្បន្នស្រុកព្រះស្តេចមានវិទ្យាល័យចំនួន ០៣ កន្លែង ខណៈវិទ្យាល័យថ្មីដែលគ្រោងបង្កើតបានមកពីជំនួយរបស់សប្បុរសជន។

យ៉ាងណាមិញ មន្ទីរកំពុងស្នើសុំគោលការណ៍អនុញ្ញាតិពីក្រសួងសិន ខណៈសប្បុរសជនក៏កំពុងសិក្សាការផ្តល់ជំនួយលើការសាងសង់វិទ្យាល័យថ្មីនេះដែរ។

នៅទូទាំងខេត្តព្រៃវែងមានវិទ្យាល័យ ៣២ កន្លែង និងអនុវិទ្យាល័យ ៩៣ កន្លែងដែលជាថ្នាលសម្រាប់បណ្តុះធនធានមនុស្សទូទាំងខេត្ត។

លោក ប៉ាវ សុធីរ បានបន្តថា អនុវត្តតាមគោលនយោបាយរបស់រដ្ឋាភិបាល ខេត្តព្រៃវែងមានថ្នាក់កម្រិតអនុវិទ្យាល័យនៅគ្រប់ឃុំទាំងអស់ ខណៈវិទ្យាល័យពង្រាយតាមស្រុកនានា។

លោកបញ្ជាក់ថា ឃុំខ្លះមានអនុវិទ្យាល័យដល់ទៅពីរ ខណៈកម្រិតវិទ្យាល័យក៏ពង្រីករហូតដល់ស្រុកខ្លះមានវិទ្យាល័យដល់ទៅ ៣ កន្លែងដែលផ្តល់ភាពងាយស្រួលសម្រាប់កូនចៅប្រជាពលរដ្ឋមកទទួលការសិក្សាបានសមរម្យ។

ដោយសារមើលឃើញពីគុណតម្លៃនៃការអប់រំ ក្រសួងអប់រំ យុវជននិងកីឡា កន្លងទៅបានផ្តល់អគារសិក្សាថ្មីចំនួន ១២ កន្លែង និងប្រមុខរដ្ឋាភិបាលក៏បានជួយសាងសង់អគារសិក្សាជាច្រើនដើម្បីឆ្លើយតបទៅនឹងតម្រូវការចំាបាច់ និងសម្រួលដល់ការសិក្សារបស់សិស្សានុសិស្ស និងលោកគ្រូអ្នកគ្រូនៅទូទាំងខេត្ត៕

អត្ថបទ៖ ប៊ុណ្ណារ៉ា

Related Topics:វិទ្យាល័យទូទាំងប្រទេស