លោកស្រី អម្ពរ ទេវី សម្រេចចិត្តវិលមកកម្ពុជា ត្រៀមថតភាពយន្តបុរាណ ផ្ដាំចាស់

តារាសម្ដែងឆ្នើមអំឡុងទសវត្សឆ្នាំ៩០ លោកស្រី អម្ពរ ទេវី នៅរសៀលថ្ងៃនេះ បានបង្ហាញទឹកចិត្តរំភើបនៅពេលដែលឃើញទស្សនិកជន ប្រជាពលរដ្ឋខ្មែរ ​នៅតែ​ស្រឡាញ់​គាំទ្រ​ការ​សម្ដែង​របស់​លោកស្រី​ និង​បងទេព​ រិនដារ៉ូ​ បន្ទាប់ពីអ្នកដឹកនាំសម្ដែង បានប្រកាសថា ដៃគូទាំងពីរនឹងសម្ដែងភាពយន្តភាគខ្នាតធំរួមគ្នា បន្ទាប់ពីខានសម្ដែងរួមគ្នាជាយូរមកហើយនោះ។

លោកស្រី អម្ពរ ទេវី បញ្ជាក់ថា៖ “ថ្វី​ត្បិត​តែ​នាង​ខ្ញុំ​ជាប់រវល់ការងារផ្ទាល់ខ្លួន​ រវល់ជាមួយនឹងក្រុមគ្រួសារយ៉ាងណា​ ក៏​នាង​ខ្ញុំត្រូវ​ពុះជ្រៀកពេលវេលា​ បន្ទាប់​ពី​បាន​ទទួល​ដំណឹង​ពីបងប្រុស​ ហ្វៃ​ សំអាង​ ទូរសព្ទ​រៀប​រាប់​ពី​សាច់​រឿង​ និង​តួអង្គ​ដែល​នាង​ខ្ញុំ​ត្រូវ​សម្ដែង​។ ទីមួយ​គឺ​ស្រឡាញ់​សាច់​រឿង​ល្អ​ប្លែក​ មាន​ទាំង​អត្ថន័យ​ អត្ថរស​ បង្កប់រសជាតិនិយម​”។

លោកស្រី អម្ពរ ទេវី លើកឡើងបន្តថា៖ “ទីពីរ​ ជា [ភាពយន្ត] សម័យ​កាលបុរាណ​ ដែល​មិនធ្លាប់មានផលិតករណាផលិតឡេីយ​។ នាង​ខ្ញុំ​សប្បាយ​ចិត្ត​ និងត្រៀមខ្លួនដេីម្បីទៅសម្តែង​ភាពយន្ត​ភាគ​ខ្នាត​ធំ​ រឿង​ “​អប្សរា​មហាអង្គរ”​ នេះ ផលិត​ដោយ​ផលិតកម្ម​ ហង្សមាស​ ដែល​ជា​ផលិតកម្ម​ដ៏​ល្បីឈ្មោះ​”។

លោក ហ្វៃ សំអាង បានឱ្យដឹងថា លោក​ ទេព​ រិនដារ៉ូ​ លោក​ស្រី​ អម្ពរទេវី​ ​ធ្លាប់បានសម្តែងរួមគ្នារាប់រយរឿង​ទាំងឈុតឆាក​កុងកាច់ លេបខាយពាក្យសម្តី​ ក្រមិចក្រមើម​ ស្នេហា​ផ្អែមល្ហែម​។ល។ តារា​ទាំង​ពីរ​ដួង​បាន​ឃ្លាត​ឆ្ងាយ​ពី​គ្នា​នៅ​ក្នុង​ការ​សម្ដែង​យ៉ាង​យូរ ​ធ្វើ​ឱ្យ​ប្រិយមិត្ត​អ្នក​គាំទ្រ​ស្ទើរ​តែ​ភ្លេច​។

លោក ហ្វៃ សំអាង បញ្ជាក់ថា នៅក្នុង​ខ្សែ​ភាពយន្ត​ភាគ​ខ្នាត​ធំ​រឿង​ “​អប្សរា​មហាអង្គរ”​ តារា​ទាំង​ពីរ​ដួង​នឹងជួបគ្នាជាថ្មីម្តងទៀត ​ដោយ​អមមកជាមួយឈុតឆាកស្នេហា​ ផ្អែមល្ហែម​ ល្វីង​ជូរចត់​ ​មាន​គ្រប់​រសជាតដេីម្បី​ផ្តាំចាស់ ​នៅលេី​មាគ៌ាសិល្ប:ភាពយន្តនេះ។

លោក ហ្វៃ សំអាង បញ្ជាក់ថា៖ “អ្នកស្រី អម្ពរ ទេវី​ នឹងសម្ដែងជា​តួអង្គ​ព្រះនាម​ អ្នក​អង្គ​ម្ចាស់ស្ត្រី​ កាមល​ ជារាជ​នាដកាអប្សរា​ ជា​រាជគ្រូបង្ហាត់បង្ហា​ញព្រះ​កេរមរតក​ដ៏​មហា​អស្ចារ្យ​របស់​ជាតិ​ខ្មែរ​ ខណៈ លោក ទេព​ រិនដារ៉ូ​ ជា​តួអង្គបណ្ឌិតអក្សរសាស្ត្រ​ ឈ្មោះ​ ខីណាព្រាហ្ម​ណ៍​។ រាជនាដកាអប្សរា​ លង់ព្រះហទ័យស្នេហ៍​ស្និទ្ធ​បណ្ឌិត​អក្សរ​សាស្ត្រ​ នៅ​រៀងរាល់​យប់​ថ្ងៃ​១៥កេីត​ ខែ​ពេញ​បូរណ៍មី​ អ្នក​អង្គ​ម្ចាស់ស្ត្រី​ កាមល ​តែងតែ​យាងមក​ទ្រង់​ព្រះ​សណ្តាប់​រឿងនិទានបេះដូងរបស់​បណ្ឌិត​ ខីណាព្រាហ្ម​ណ៍​ ធ្វេី​ឱ្យ​នាង​ បារមី​ ដែល​ជា​នាដកាអប្សរា​ដែរ​ មាន​ចិត្ត​ច្រណែន​ និន្ទា​ឈ្នានីស​ ព្រោះ​តែ​បេះដូង​របស់​នាង​បាន​ធ្លាក់​ចូល​ទៅ​ក្នុង​ជ្រោះ​ស្នេហ៍​របស់​បណ្ឌិត​អក្សរ​សាស្ត្រ​នោះដោយដកមិនរួច”។

លោក ហ្វៃ សំអាង បន្ថែមថា សង្គ្រាម​បេះដូង​ក៏​បាន​ផ្ទុះ​ឡេីងពេញផ្ទៃរឿង​ទាំង​មូល​។ តួ​អង្គ​នាងបារមី ត្រូវបានសម្ដែងដោយអ្នកស្រី​ លី​ ម៉ារីណា​ ដែលត្រូវ​អ្នក​ដឹក​នាំ​សម្ដែង​ផ្លាស់ប្ដូរ​រសជាតិ​​សម្តែង​របស់​គាត់ ​​មិនធ្លាប់​បាន​ឃើញ​កន្លងមក។

គួររំលឹកថា វិស័យកុន ឬភាពយន្តបញ្ចាំងរោងខ្មែរបានស្លាប់ សូម្បីតែរោងកុន ក៏ត្រូវបានបិទដំណើរការទាំងស្រុង។ លុះឆ្នាំ២០០០ វិស័យកុនខ្មែរបានរស់ឡើងវិញ ទាំងបណ្ដាផលិតកម្ម និងរោងភាពយន្តបានបើកឡើងវិញជាបន្តបន្ទាប់ ក្រោយពីវត្តមាន កុនដ៏ល្បីរឿង កូនពស់កេងកង ដែលដឹកនាំសម្ដែងដោយ លោក ហ្វៃ សំអាង។ ក្នុងរឿងនោះ លោកស្រី អម្ពរ ទេវី សម្ដែងជាតួ នាងនី ឯលោក ទេព រិនដារ៉ូ សម្ដែងជាតួ ពស់កងកង ប្រែកាយជាមនុស្ស៕​

អត្ថបទ៖ ច័ន្ទ វីរៈ