កាតា កំពុងស៊ើបអង្កេតការស្លាប់កម្មករហ្វីលីពីន នៅកន្លែងហ្វឹកហាត់ World Cup

ក្រុមមន្ត្រីបាននិយាយកាលពីថ្ងៃព្រហស្បតិ៍ទី០៨ខែធ្នូថា ប្រទេសកាតា បានចាប់ផ្តើមការស៊ើបអង្កេតសុវត្ថិភាពការងារ លើការស្លាប់របស់ជនជាតិហ្វីលីពីនម្នាក់ បន្ទាប់ពីមានរបាយការណ៍ថា បុរសនោះបានស្លាប់ពេលកំពុងធ្វើការនៅឯកន្លែងហ្វឹកហាត់ អំឡុងការប្រកួតបាល់ទាត់ពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទង្វើរបស់កាតាចំពោះពលករចំណាកស្រុក បានស្ថិតនៅក្រោមការត្រួតពិនិត្យយ៉ាងហ្មត់ចត់ មុនព្រឹត្តិការណ៍ World Cup ខណៈក្រុមសិទ្ធិមនុស្ស បានចោទប្រកាន់រដ្ឋឈូងសមុទ្រមួយនេះ ពីបទរំលោភបំពានការងារជាប្រព័ន្ធ។

លោក Nasser al-Khater នាយកប្រតិបត្តិនៃការប្រកួតបាល់ទាត់ពិភពលោកឆ្នាំ២០២២ ក្នុងទីក្រុង ដូហា បានបញ្ជាក់ប្រាប់ Reuters ថា កម្មករម្នាក់នេះពិតជាស្លាប់មែន ប៉ុន្តែមិនបានផ្តល់ព័ត៌មានលម្អិតបន្ថែមនោះទេ។

ស្របពេលជាមួយគ្នានោះ​ ក្រសួងការបរទេសហ្វីលីពីនបានបញ្ជាក់នៅក្នុងសេចក្តីថ្លែងការណ៍មួយថា ជនជាតិរបស់ខ្លួនម្នាក់ បានស្លាប់ពេលកំពុងធ្វើការក្នុងរមណីយដ្ឋានមួយកន្លែង នៅភាគខាងត្បូងនៃរដ្ឋធានីដូហា។ ក្រសួងបន្តថា ស្ថានទូតរបស់ខ្លួនកំពុងធ្វើការជាមួយអាជ្ញាធរផ្នែកច្បាប់ដើម្បីបញ្ជាក់លម្អិតបន្ថែមទៀតនៃការស្លាប់របស់គាត់។

គេហទំព័រកីឡា The Athletic កាលពីថ្ងៃពុធ បានរាយការណ៍ថា បុរសម្នាក់នោះ ធ្វើការឲ្យក្រុមហ៊ុនមួយ ដែលបានចុះកិច្ចសន្យាជួសជុលអំពូលភ្លើងក្នុងចំណតរថយន្តនៅឯរមណីយដ្ឋាន Sealine ដែលជាកន្លែងហ្វឹកហាត់របស់ក្រុមបាល់ទាត់ជម្រើសជាតិ៕

ប្រែសម្រួល៖ Vann Vann

ប្រភព៖ Alarabiya

ចុចអាន៖ កាតា ដាច់ចិត្តបង្ហើបតួលេខ ពលករចំណាកស្រុក ដែលស្លាប់ ពាក់ព័ន្ធនឹងគម្រោងរៀបចំ World Cup