សម្ដេតេជោ អំពាវនាវឲ្យបន្តអនុវត្តគោលដៅអភិវឌ្ឍប្រកបដោយចីរភាពស្ដីពីជនមានពិការភាព

សម្ដេចតេជោ ហ៊ុន សែន បានអំពាវនាវដល់សហគមន៍ជាតិ-អន្តរជាតិ បន្តរួមគ្នាអនុវត្តគោលដៅអភិវឌ្ឍន៍ប្រកបដោយចីរភាពស្ដីពីជនមានពិការភាព និងអនុសញ្ញាស្ដីពីសិទ្ធិជនពិការនៃអង្គការសហប្រជាជាតិ។ សម្ដេចតេជោ អំពាវនាវបែបនេះ ក្នុងពិធីបើកសន្និសីទជនមានពិការភាពប្រចាំតំបន់អាស៊ី និងអាស៊ីប៉ាស៊ីហ្វិកលើកទី៥ នាព្រឹកថ្ងៃទី១៥ ខែមីនានេះ នៅសណ្ឋាគារសុខាភ្នំពេញ។

សម្ដេចតេជោនាយករដ្ឋមន្ត្រី បានថ្លែងថា សន្និសីទជនមានពិការភាពប្រចាំតំបន់អាស៊ី និងអាស៊ីប៉ាស៊ីហ្វិក គឺរៀបចំឡើងក្នុងគោលបំណងប្រយុទ្ធប្រឆាំងការរើសអើង និងលើកកម្ពស់សិទ្ធជនមានពិភាព តាមរយៈបើកឱកាសឲ្យភាគីពាក់ព័ន្ធជួបពិភាក្សាគ្នា ចែករំលែកបទពិសោធ និងរួមគ្នាដោះស្រាយបញ្ហាប្រឈមរបស់ជនមានពិការភាព។

ជាមួយគ្នានេះ បើតាមសម្ដេចតេជោ ដើម្បីធានាបានសុខមាលភាពរបស់ជនមានពិការភាព គឺរាជរដ្ឋាភិបាលកម្ពុជា បានកំណត់កូតារហូតដល់ ២ភាគរយ សម្រាប់ជ្រើសរើសជនមានពិការភាពឲ្យបម្រើការងារនៅតាមបណ្ដាក្រសួងស្ថាប័នរដ្ឋ ស្របតាមច្បាប់ស្ដីពីកិច្ចការពារ និងលើកកម្ពស់ជនពិការ។ បន្ថែមពីនេះ វិស័យឯកជន បានត្រូវលើកទឹកចិត្ត ជាពិសេសឲ្យទទួលយកជនមានពិការភាពអាចបម្រើការងារ និងលើកកម្ពស់ជីវភាពគ្រួសារ ដើម្បីផ្ដល់ឱកាសចូលរួមអភិវឌ្ឍន៍សេដ្ឋកិច្ច-សង្គមកម្ពុជា៕

ដោយ៖ ធឿន វ៉ាន់សុង