មេសហជីព ថ្លែងអំណរគុណរាជរដ្ឋាភិបាល ដែលផ្ដល់ប្រាក់ឧបត្ថម្ភដល់កម្មករព្យួរកិច្ចសន្យាការងារ

កម្មករ-និយោជិត ដែលធ្វើការងារនៅរោងចក្រក្នុងវិស័យកាត់ដេរសំលៀកបំពាក់ និងផលិតស្បែកជើង ដែលត្រូវបានព្យួរកិច្ចសន្យាការងារ ចាប់ពីខែមេសាទៅ នឹងត្រូវទទួលបានប្រាក់ឧបត្ថម្ភពីរាជរដ្ឋាភិបាល និងនិយោជក។ ទាក់ទងនឹងការអន្តរាគមន៍របស់រាជរដ្ឋាភិបាល ដែលជួយឧបត្ថម្ភកម្មករ-និយោ​ជិត ត្រូវបានព្យួរកិច្ចសន្យាការងារនេះ មេសហជីពមួយរូប បានថ្លែងអំណរគុណប្រមុខរាជរដ្ឋាភិបាល ដែលតែងតែគិតគូរដល់កម្មករ-និយោជិត គ្រប់កាលៈទេសៈទាំងអស់។  

លោក ឡុង សុផាត ប្រធានសហភាពសហជីព យុវជនការពារសិទ្ធិកម្មករកម្ពុជា មានប្រសាសន៍ប្រាប់កម្ពុជាថ្មី នៅថ្ងៃទី ៣០ ខែមីនានេះថា ក្នុងនាមជាមេសហជីពមួយរូប លោកថ្លែងអំណរគុណសម្ដេចតេជោ ហ៊ុន សែន នាយករដ្ឋមន្ត្រី ក៏ដូចជារដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ដែលតែងតែគិតគូរអំពីសុខទុក្ខរបស់កម្មករ-និយោជិតគ្រប់កាលៈទេសៈ ជាពិសេសនៅក្នុងបរិបទនៃវិបត្តិសកលនេះតែម្ដង។

លោក ឡុង សុផាត មានប្រសាសន៍បែបនេះថា «ទាក់ទងនឹងការជួយអន្តរាគមន៍ដល់កម្មករ-និយោជិត ដែលព្យួរកិច្ចសន្យាការងារ នៅក្នុងវិបត្តិសកលចាប់ពីមេសាតទៅនេះ ខ្ញុំមើលឃើញថា គឺជាការជួយសម្រាលបន្ទុក នៃការលំបាករបស់បងប្អូនកម្មករ-និយោជិតរបស់យើង ដែលត្បិតថា ការជួយនេះមិនអាចរ៉ាប់រងបាន នូវតម្រូវការជីវភាពរស់នៅរបស់កម្មករយើង ប៉ុន្តែបានជួយចូលរួមកាត់បន្ថយការលំបាករបស់ពួកគាត់បានមួយផ្នែក»។

ជាមួយគ្នានេះ ប្រធានសហភាពសហជីព យុវជនការពារសិទ្ធិកម្មករកម្ពុជារូបនេះ បានឲ្យដឹងថា សម្រាប់រោងចក្រដែលលោកគ្រប់គ្រងចំនួន ១០០រោងចក្រ គឺមានចំនួន ៦រោងចក្រ បានព្យួរកិច្ចសន្យាការងារកម្មករ-ជិយោជិតជាង ២ពាន់នាក់។ លោក ឡុង សុផាត សង្ឃឹមថា បញ្ហាព្យួរកិច្ចសន្យាការងាររបស់កម្មករ-ជិយោជិត ក្នុងវិស័យកាត់ដេរសំលៀកបំពាក់ និងផលិតស្បែកជើង ដោយសារវិបត្តិសកលនេះ នឹងអាចដោះស្រាយបានក្នុងពេលឆាប់ៗខាងមុខនេះ ហើយកម្មករ-និយោជិត នឹងអាចមានការងារបំពេញលេញឡើងវិញ។

យោងតាមសេចក្ដីណែនាំរបស់ក្រសួងការងារ និងបណ្ដុះបណ្ដាលវិជ្ជាជីវៈ កាលពីថ្ងៃទី ១៥ ខែមីនា ឆ្នាំ ២០២៣ បានឲ្យដឹងថា កម្មករ-និយោជិត ដែលត្រូវបានព្យួរកិច្ចសន្យាការងារ ចាប់ពីថ្ងៃទី ១ ខែមេសា ឆ្នាំ ២០២៣ នឹងត្រូវទទួលប្រាក់ឧបត្ថម្ភ ដូចខាងក្រោម៖

-ចំនួន ២០ដុល្លារពីរាជរដ្ឋាភិបាល និងចំនួន ១៥ដុល្លារពីនិយោជក សម្រាប់ការព្យួរកិច្ចសន្យាការងាររយៈពេល ៧ថ្ងៃ ទៅ ១៤ថ្ងៃ។

-ចំនួន ៤០ដុល្លារពីរាជរដ្ឋាភិបាល និងចំនួន ៣០ដុល្លារពីនិយោជក សម្រាប់ការព្យួរកិច្ចសន្យាការងាររយៈពេល ១៥ថ្ងៃ ទៅ ១ខែ។

ក្រសួងការងារ និងបណ្ដុះបណ្ដាលវិជ្ជាជីវៈ ដាក់ចេញនូវការណែនាំបែបនេះ បន្ទាប់ពីមានអនុសាសន៍របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដើម្បីរក្សាលំនឹងជីវភាពរស់នៅរបស់កម្មករ-និយោជិត និងធានានូវស្ថិរភាពអាជីវកម្មរបស់រោងចក្រ ដែលមានការថមថយច្រវាក់ផលិតកម្ម ក្នុងបរិបទនៃវិបត្តិសកល៕