លោក Kishida ថា ជប៉ុន មិនចូលរួមជាមួយ ណាតូ ឡើយ

នាយករដ្ឋមន្ត្រីជប៉ុនលោក Fumio Kishida បាននិយាយនៅថ្ងៃពុធនេះថា ជប៉ុនមិនមានគម្រោងក្លាយជាសមាជិកអង្គការណាតូនោះទេ ប៉ុន្តែបានទទួលស្គាល់ផែនការរបស់សម្ព័ន្ធភាពយោធាមួយនេះក្នុងការបើកការិយាល័យទំនាក់ទំនងនៅក្នុងប្រទេសជប៉ុន ។

ក្នុងកិច្ចប្រជុំសភានៅថ្ងៃពុធនេះ លោក Kishida ប្រាប់ថា លោកមិនទាន់ដឹងពីការសម្រេចចិត្តណាមួយទាក់ទងនឹងការបង្កើតការិយាល័យអង្គការណាតូនៅជប៉ុននោះទេ ដោយលោកគ្រាន់តែលើកឡើងថា ប្រទេសរបស់លោកនឹងមិនមានគម្រោងចូលរួមជាមួយអង្គការណាតូក្នុងឋានៈជាសមាជិកពេញលេញ ឬក្នុងកម្រិតណាមួយនោះទេ ។

គួរបញ្ជាក់ថា ការអត្ថាធិប្បាយរបស់លោក Kishida បានកើតឡើង បន្ទាប់ពីឯកអគ្គរដ្ឋទូតជប៉ុនប្រចាំនៅសហរដ្ឋអាមេរិក កាលពីដើមខែនេះ បាននិយាយថា សម្ព័ន្ធភាពយោធាដែលមានសហរដ្ឋអាមេរិកជាបងធំមួយនេះ កំពុងរៀបចំផែនការបើកការិយាល័យនៅទីក្រុងតូក្យូ ហើយជាការិយាល័យដំបូងគេនៅអាស៊ី ដើម្បីជួយសម្រួលដល់ការពិគ្រោះយោបល់នៅក្នុងតំបន់ ៕

ប្រែសម្រួល៖ នាង រតនៈ

ប្រភព៖ Reuters

ចុចអាន៖ រុស្ស៊ី ៖ ណាតូ នៅតែរឹងចចេសមិនទទួលស្គាល់ថា កំពុងប្រឈមនឹងការផ្ទុះ អាវុធនុយក្លេអ៊ែរ