សម្ដេចតេជោ ហ៊ុន សែន សរសើរលោក កែវ រតនៈ ដែលខិតខំដោះស្រាយបញ្ហាក្នុងរោងចក្រ នៅខេត្តពោធិ៍សាត់

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងកោតសរសើរលោក កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកអគ្គិសនីកម្ពុជា និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានស្រុកក្រគរ និងស្រុកកណ្តៀង ខេត្តពោធិ៍សាត់ ដែលបានខិតខំដោះស្រាយបញ្ហានៅក្នុងរោងចក្រ។

បើតាមសម្ដេចតេជោ ហ៊ុន សែន ខេត្តពោធិ៍សាត់ ជាខេត្តមួយដែលដោះស្រាយបញ្ហានៅក្នុងរោងចក្រល្អជាងគេ។ ការថ្លែងកោតសរសើររបស់សម្ដេចតេជោ ហ៊ុន សែន បានធ្វើឡើងក្នុងពិធីជួបសំណេះ​សំណាលជាមួយកម្មករ-កម្មការិនី នៅខេត្តពោធិ៍សាត់ នៅព្រឹកថ្ងៃទី ៣០ ខែមិថុនា ឆ្នាំ ២០២៣នេះ។

សម្ដេចតេជោ ហ៊ុន សែន បានថ្លែងថា សម្ដេច ចង់ឲ្យរោងចក្រនីមួយៗ ក្លាយជាសហគន៍សុខសាន្ដ​មួយ ដែលជាផ្នែកមួយនៃការអនុវត្តគោលនយោបាយភូមិ-ឃុំ មានសុវត្ថិភាព ដោយមិនត្រូវឲ្យរោងចក្រក្លាយជាកន្លែងប្រើប្រាស់គ្រឿង​ញៀន ឬជាកន្លែងបងតូចបងធំជាដើម។

«បើតាមខ្ញុំទទួលព័ត៌មានជាបន្តបន្ទាប់ អ្នកខេត្តពោធិ៍សាត់នេះ មានសំណាងណាស់ កម្មករ-កម្មការនី ដោយសារអី កែវ រតនៈ គាត់ចុះតាមរោងចក្រដោះស្រាយបញ្ហា អាហ្នឹងគឺអត់រង់ចាំក្រសួងការងារ ​និងមន្ទីរការងារទេ នៅទីនេះ ខេត្តពោធិ៍សាត់ដោះស្រាយល្អជាងគេ ខ្ញុំហ៊ាននិយាយអញ្ចឹងៗ»។ នេះជាការថ្លែងរបស់សម្ដេចតេជោ ហ៊ុន សែន៕