មន្ត្រីបច្ចេកទេសប្រកាសបើកទ្វារទឹកចេញពីទំនប់វារីអគ្គិសនីកំចាយនៅព្រឹកនេះ

គណៈកម្មាធិការគ្រប់គ្រងគ្រោះមហន្តរាយខេត្តកំពត បានចេញសេចក្ដីប្រកាសពីការបើកទ្វារទឹកទំនប់វារីអគ្គិសនីកំចាយ ដើម្បីរំដោះទឹកចេញពីទំនប់ ដោយសារស្ថានភាពអាកាសធាតុមានភ្លៀងនៅតែបន្តធ្លាក់ជាបន្តបន្ទាប់។

យោងតាមសេចក្ដីប្រកាសថ្ងៃទី២៥ ខែកក្កដា ឆ្នាំ២០២៣ ក្រុមការងារបច្ចេកទេសទំនប់វារីអគ្គិសនីកំចាយ នឹងធ្វើការបើកទ្វារទឹកចំនួន១ កម្ពស់២ម៉ែត្រ នៅវេលាម៉ោង១០និង០០ព្រឹកថ្ងៃទី២៦ ខែកក្កដា ឆ្នាំ២០២៣នេះ ដើម្បីរំដោះទឹកចេញទំនប់ ដូច្នេះស្ថានភាពទឹកព្រែកនឹងមានកម្ពស់លើសពីធម្មតា។

គណៈកម្មាធិការគ្រប់គ្រងគ្រោះមហន្តរាយខេត្តកំពត បញ្ជាក់ថា តាមការជូនដំណឹងរបស់ក្រសួងធនធានទឹក និងឧតុនិយម ភ្លៀងនឹងបន្តធ្លាក់ចាប់ពីថ្ងៃទី២៦ ខែកក្កដា ឆ្នាំ២០២៣ រហូតដល់ថ្ងៃទី០១ ខែសីហា ឆ្នាំ២០២៣ នៅផ្ទៃសមុទ្រមានភ្លៀងខ្យល់ខ្លាំង និងរលកសមុទ្រមាន កម្ពស់ខ្ពស់៕

អត្ថបទ៖ សុខុម