មុនកម្ពុជា តើប្រទេសណាខ្លះនៅអាស៊ានធ្លាប់ធ្វើម្ចាស់ផ្ទះសន្និបាតសមាគមកាយឫទ្ធិនារីពិភពលោក?

សមាគមកាយឫទ្ធិនារីកម្ពុជា ទើបតែទទួលបានសិទ្ធិរៀបចំសន្និបាតសមាគមកាយឫទ្ធិនារីពិភពលោកលើកទី៣៩ឆ្នាំ ២០២៦ ដែលនេះ គឺជាលើកទីមួយហើយក្នុងប្រវត្តិសាស្ត្រកាយឫទ្ធិកម្ពុជា។ ប៉ុន្តែ មុនកម្ពុជា​នេះ នៅក្នុងក្របខណ្ឌតំបន់អាស៊ាន ប្រទេសដែលធ្លាប់បានរៀបចំសន្និបាតសមាគមកាយឫទ្ធិនារីពិភពលោក គឺមានប្រទេសចំនួនពីរតែប៉ុណ្ណោះ។

ទី១. គឺប្រទេសហ្វីលីពីន។ ប្រទេសនេះ ធ្លាប់បានធ្វើជាម្ចាស់ផ្ទះរៀបចំសន្និបាតសមាគមកាយឫទ្ធិនារីពិភពលោកលើកទី៣១ ក្នុងឆ្នាំ២០០២ ដែលរៀបចំឡើងក្នុងទីក្រុងម៉ានីល។ ទី២. គឺប្រទេសសិង្ហបុរី ក្នុងភាពជាសមាជិក ប្រទេសនេះ ធ្លាប់ទទួលបានសិទ្ធិជាម្ចាស់ផ្ទះរៀបចំសន្និបាតសមាគមកាយឫទ្ធិនារីពិភពលោកលើកទី២៧ នៅក្នុងឆ្នាំ១៩៩០។

សូមជម្រាបថា សមាគមកាយឫទ្ធិនារីពិភពលោក បានរៀបចំសន្និបាតលើកដំបូងរបស់ខ្លួននៅក្នុងឆ្នាំ១៩២០ រាប់ចាប់តាំងពីពេលនោះមកដល់បច្ចុប្បន្ន សមាគមនេះ បានរៀបចំសន្និបាតសរុបចំនួន៣៨ដងរួចមកហើយ ដោយលើកទី៣៩ កម្ពុជាដែលជាសមាជិកនៃសមាគមមួយនេះ នឹងទទួលបន្ទុកធ្វើជាម្ចាស់ផ្ទះរៀបចំសន្និបាតម្ដង៕

ដោយ៖ ង៉ិល ណារ៉ាត់