មេដឹកនាំគណបក្ស Palang ព្រលយពាក្យអពមង្គលនៅមុនខួបកំណើត ៧ ថ្ងៃ

ឧត្ដមសេនីយ៍ Prawit Wongsuwan បានប្រារព្ធពិធីខួបកំណើតមុនអាយុ៧៨ឆ្នាំ ខណៈដែលលោកបានព្រលយ​ប្រយោគ​ប្រៀបដូចជាអមង្គលថា ស្អែកយើងមិនដឹងថាអាចភ្ញាក់ពីដំណេកទៀតឬអត់? អ្នកណាដឹង! ដូច្នេះសូមថែរក្សា​សុខភាព​ទាំងអស់គ្នា និងស្រឡាញ់គ្នាទៅវិញទៅមក។

កាលពីថ្ងៃទី៥ ខែសីហា លោក Prawit Wongsuwan មេដឹកនាំ​គណបក្ស Palang Pracharat បាន​ជួប​សំណេះសំណាល​ជាមួយ​សិស្ស​ត្រៀម​យោធា ថ្នាក់ទី៦ (១៩៦៥) និង​នាយទាហាន​រង ដោយក្នុងនោះមនុស្ស​ជិតស្និទ្ធ​ដែលត្រូវគេស្គាល់ថាជាមិត្តរួមថ្នាក់យោធាបាន​រៀបចំពិធី​ខួបកំណើត​មុនថ្ងៃឲ្យលោកថែមទៀតផង។

ក្រោយមក មេដឹកនាំគណបក្ស Palang Pracharat បានឡើងកាត់នំ និងទទួលផ្កាកុលាប​លើកទឹកចិត្តពីមនុស្សជុំវិញ ព្រមទាំង​ទទួលការស្វាគមន៍​ថ្ងៃកំណើត​យ៉ាង​កក់ក្ដៅ​​មុនថ្ងៃ ​១១ ខែសីហា ដែល​ឆ្នាំ​នេះ​លោក​មាន​អាយុ ៧៨ ឆ្នាំ​ហើយ។

នាយ​ឧត្ដមសេនីយ៍ Prawit បានកាន់ក្បាលមេក្រូរួចមានប្រសាសន៍ថា “ឆ្នាំនេះខ្ញុំ​មានអាយុ ៧៨ឆ្នាំ ជិត ៧៩ឆ្នាំទៅហើយ ចំណែកឯសកម្មភាពខ្លះៗរបស់មនុស្សចាស់គឺគ្មានអ្វីក្រៅពី​គេងមិន​លក់នោះទេ។ ហើយ​ស្អែកឡើង អ្នកណា​ទៅដឹងទៅថាអាចក្រោកមកបាន​ឬក៏ត្រូវដេករហូត។ ដូច្នេះ សូមថែរក្សា​សុខភាព​ទាំងអស់គ្នា ស្រលាញ់គ្នា​បែបនេះ។ សូម​អរគុណ​មិត្តភក្តិ និង​ចៅៗ ទាំងអស់​ដែលមកជូនពរ​ថ្ងៃកំណើត សូម​ឲ្យ​បាន​សុខ​សប្បាយ​គ្រប់​ៗ​គ្នា”។

លើសពីនេះទៀតដែរ​ លោក Prawit បាន​ស្រែក​ច្រៀង​ចម្រៀង​ស្នេហា​ដោយ​អារម្មណ៍​ល្អមិនធ្លាប់ឃើញពីមុនមក ក្នុង​ពេល​ដែល​លោក​កំពុងតែ​​កាត់​នំ​ខេក​នៅ​ចំពោះមុខមនុស្សជាទីស្រលាញ់ដែលចូលរួមព្រឹត្តិការណ៍ដ៏វិសេសនោះ៕

ប្រែសម្រួល៖ សាង ស្រីល័ក្ខ

ប្រភព៖Sanook

ចុចអាន៖លោក ប្រាយុទ្ធ ប្ដេជ្ញាថា យោធានឹងនៅតែការពារប្រទេស ថៃ