ជប៉ុន ប្រាប់ទៅ WTO ថា បម្រាមរបស់ចិន លើការនាំចូលអាហារសមុទ្រ គឺមិនអាចទទួលយកបានទាំងស្រុង

ទីក្រុងតូក្យូ បានប្រាប់អង្គការពាណិជ្ជកម្មពិភពលោក (WTO) ថា បម្រាមរបស់ចិន លើអាហារសមុទ្រជប៉ុន បន្ទាប់ពីការបញ្ចេញទឹកសំណល់ពីរោងចក្រនុយក្លេអ៊ែរ ហ្វូគូស៊ីម៉ា គឺមិនអាចទទួលយកបានទាំងស្រុង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាការប្រឆាំងទៅនឹងសេចក្តីជូនដំណឹងកាលពីថ្ងៃទី៣១ខែសីហា របស់ប្រទេសចិនទៅកាន់ WTO ស្តីពីវិធានការរបស់ខ្លួន លើការផ្អាកនាំចូលជលផលរបស់ប្រទេសជប៉ុន, ក្រសួងការបរទេសនៅទីក្រុងតូក្យូនឹងពន្យល់ពីជំហររបស់ខ្លួនទៅកាន់គណៈកម្មាធិការពាក់ព័ន្ធរបស់ WTO និងសូមជំរុញឲ្យភាគីចិន លុបចោលសកម្មភាពនេះជាបន្ទាន់ ។

មន្ត្រីជប៉ុនមួយចំនួនបានបង្ហាញពីលទ្ធភាពនៃការដាក់ពាក្យប្តឹងចិនទៅកាន់ WTO ជុំវិញបម្រាមនាំចូលអាហារសមុទ្រ ហើយរឿងនេះ ក៏ត្រូវបានឯកអគ្គរដ្ឋទូតសហរដ្ឋអាមេរិកប្រចាំប្រទេសជប៉ុនបញ្ជាក់កាលពីសប្តាហ៍មុនផងដែរថា ទីក្រុងវ៉ាស៊ីនតោននឹងគាំទ្រយ៉ាងពេញទំហឹង។

នៅក្នុងសេចក្តីថ្លែងការណ៍ដាច់ដោយឡែកមួយកាលពីថ្ងៃចន្ទ ក្រសួងការបរទេសរបស់ទីក្រុងតូក្យូនិយាយថា ជប៉ុនក៏បានស្នើសុំឲ្យចិន ពិភាក្សាជុំវិញបម្រាមនាំចូល ដោយផ្អែកលើបទប្បញ្ញត្តិនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ផងដែរ។

ពាក់ព័ន្ធនឹងបញ្ហានេះដែរ ជប៉ុន​សង្ឃឹម​ថា ចិន​នឹង​ពិភាក្សា​ជាមួយ​ខ្លួនឲ្យបាន​ឆាប់​តាម​ដែល​អាចធ្វើទៅបាន និង​ពិនិត្យ​មើល​វិធានការ​ ​ដោយ​អនុលោម​តាម​កាតព្វកិច្ច​របស់​កិច្ចព្រមព្រៀង RCEP៕

ប្រែសម្រួល៖ Vann Vann

ប្រភព៖ Tuoi Tre 

ចុចអាន៖ ជប៉ុន ដាក់ចេញវិធានការ ២ ដើម្បីជួយទីផ្សារគ្រឿងសមុទ្រ ក្រោយការបង្ហូរ ទឹកសំណល់ចេញពីរោងចក្រនុយក្លេអ៊ែរ