ព័ត៌មានជាតិ

ឃាត់ខ្លួនមុខសញ្ញាថ្នាំញៀន៤នាក់ ជាបន្តបន្ទាប់ រួមនឹងវត្ថុតាងជាច្រើនផងដែរ

បានផុស

៤ years មុន

នៅ

ថ្ងៃអាទិត្យ ៧ កុម្ភៈ ២០២១

ដោយ

បាត់ដំបង ៖ ជនសង្ស័យចំនួន៤នាក់ ដែលសមត្ថកិច្ចបានកំណត់ថា ជាមុខសញ្ញាជួញដូរថ្នាំញៀន យ៉ាងសកម្ម ត្រូវបានកម្លាំងអធិការដ្ឋាន នគរបាលស្រុកសំពៅលូន តាមប្រមាញ់ និងឈានដល់ការចាប់ខ្លួនក្នុងបទល្មើស កាន់កាប់ និង រក្សាទុកនូវសារធាតុញៀន ខុសច្បាប់ លើករណីជាក់ស្តែង រួមជាមួយនឹងវត្ថុតាងជាច្រើនមុខផងដែរ។

យោងតាមរបាយការណ៍របស់កម្លាំង នគរបាលនៃអធិការរដ្ឋានស្រុកសំពៅលូន បានបញ្ជាក់ថា កាលពីថ្ងៃទី៤ ខែកុម្ភៈ ឆ្នាំ ២០២១ វេលាម៉ោង ប្រហែល៩យប់ កម្លាំងសមត្ថកិច្ចបានចុះទៅកាន់ ចំណុចភូមិអូស្ងាត់ ឃុំសន្តិភាព ស្រុកសំពៅលូន ដោយបានបង្ក្រាបករណីជួញដូរដោយខុសច្បាប់នូវសារធាតុញៀនមួយករណីក្នុងបទល្មើសជាក់ស្ដែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងកិច្ចប្រតិបត្តិការនោះ កម្លាំងជំនាញបានឃាត់ខ្លួនជនសង្ស័យ ចំនួនម្នាក់ ឈ្មោះ ហូល ហេង ភេទប្រុស អាយុ៣៨ឆ្នាំ មានទីលំនៅនៅភូមិពពូល ឃុំអំពិលប្រាំដើម ស្រុកបវេល ដោយសមត្ថកិច្ចបានដកហូតវត្ថុតាងមួយចំនួន រួមមាន ថ្នាំញៀនប្រភេទម៉ាទឹកកក ចំនួន ១ ថង់ ទូរសព្ទដៃចំនួន០១ គ្រឿង ប្រាក់ថៃ ចំនួន៣៤៣០ បាត (បីពាន់បួនសាមសិបបាត) ប្រាក់រៀល ចំនួន១៧៨,០០០(ដប់ប្រាំពីរម៉ឺន ប្រាំបីពាន់រៀល ) ម៉ូតូ០១ចំនួនគ្រឿងម៉ាក execter ពណ៌ខ្មៅផលិតឆ្នាំ២០១៧។

យោងតាមចម្លើយសារភាពរបស់ជនសង្ស័យឈ្មោះហូល ហេង និង ដោយមានការអនុញ្ញាតពីលោក គឺ ប៊ុណ្ណារ៉ា ព្រះរាជអាជ្ញា នៃអយ្យការអមសាលាដំបូងខេត្តបាត់ដំបង ផងនោះ កម្លាំងអធិការរដ្ឋាននគរបាលស្រុកសំពៅលូនបានសហការជាមួយកម្លាំងអធិការនគរបាលស្រុកបវេលនិងការិយាល័យប្រឆាំងគ្រឿងញៀននៃស្នងការនគរបាលខេត្តបាត់ដំបង បានបន្តកិច្ចប្រតិបត្តិការ រហូតដល់ឃាត់ខ្លួនជនសង្ស័យបានចំនួន ៣ នាក់ទៀត កាលពីថ្ងៃទី៥ ខែកុម្ភៈ ឆ្នាំ២០២១ម៉ោង០១និង00នាទី នៅចំណុចភូមិបឹងអារក្ស ឃុំអំពិលប្រាំដើម ស្រុកបវេល ខេត្តបាត់ដំបង។

នៅក្នុងនោះសមត្ថកិច្ចបានឲ្យដឹងថា ជនសង្ស័យមានឈ្មោះ ១.ឈ្មោះ សេង សុខា ភេទស្រី អាយុ៣៨ឆ្នាំ មានលំនៅភូមិបឹងអារក្ស ឃុំអំពិលប្រាំដើម ស្រុកបវេល ២.ឈ្មោះ ឡេង សុខាឡៃ ភេទប្រុស អាយុ៣៨ឆ្នាំ មានលំនៅភូមិបឹងធុង ឃុំបឹងប្រាំ ស្រុកបវេល និង ៣. ឈ្មោះ ឈួង ឈឿង ភេទប្រុស អាយុ៣៨ឆ្នាំ រស់នៅឃុំខ្នាចរមាស ស្រុកបវេល វត្ថុតាងដែលកម្លាំងសមត្ថកិច្ចចាប់យកបានរួមមាន ថ្នាំញៀនប្រភេទម៉ាទឹកកក ចំនួន ១ ថង់ ក្រវិល ៤ គូ ខ្សែ.ក ២ ខ្សែ ខ្សែដៃ ១ ខ្សែ កងដៃ ១ កង នាឡិកា ២ គ្រឿង លុយខ្មែរចំនួន ២.១៣៥.០០០ រៀល លុយបាត ចំនួន ២៣.៧៨០ បាត និង កញ្ឆាក្រៀម ចំនួន ១ ថង់ ថ្នាំញៀនប្រភេទម៉ាទឹកកក ចំនួន ៣ ថង់ រថយន្តម៉ាក ហាយឡិនឌ័រ ពណ៌ទឹកមាស ១ គ្រឿង ពាក់ស្លាកលេខ បាត់ដំបង 2C-0377 ទូរសព្ទដៃចំនួន ២គ្រឿង។

ក្រោយពីធ្វើការសាកសួរសមត្ថកិច្ចបានកសាងសំណុំរឿង និង បញ្ជូនជនសង្ស័យទាំង៤នាក់ រួមទាំងវត្ថុតាងទៅកាន់សាលាដំបូងហើយ ក្នុងការចាត់វិធានការ តាមនីតិវិធីច្បាប់៕

ដោយ ៖ សោ និយមរ័ត្ន