១០ខែនេះ កម្ពុជាបានផ្តល់ការងារជូនពលរដ្ឋទៅធ្វើការនៅក្រៅប្រទេសជាង៥ម៉ឺននាក់

នៅក្នុងរយៈពេល១០ខែឆ្នាំ២០២៣នេះ កម្ពុជាបានផ្តល់ឱកាសការងារជូនប្រជាពលរដ្ឋទៅធ្វើការនៅក្រៅប្រទេសប្រមាណជាង៥ម៉ឺននាក់ ដែលបានជួយលើកស្ទួយដល់ជីវភាពរស់នៅរបស់ប្រជាពលរដ្ឋក៏ដូចជាសេដ្ឋកិច្ចជាតិកាន់តែប្រសើរឡើងថែមទៀត។

លោក កត្តា អ៊ន អ្នកនាំពាក្យក្រសួងការងារនិងបណ្តុះបណ្តាលវិជ្ជាជីវៈ បានមានប្រសាសន៍នៅព្រឹកថ្ងៃទី១៨វិច្ឆិកានេះថា
ចាប់ពីខែមករារហូតមកដល់ខែតុលាឆ្នាំ២០២៣ កម្ពុជាបានផ្តល់ឱកាសការងារនៅក្រៅប្រទេសជូនប្រជាពលរដ្ឋចំនួន​៥០៧៩៨នាក់ ស្រី២១២៣៣នាក់ ក្នុងនោះរួមមានប្រទេសថៃ មានចំនួន ៣៦ ២៨៤នាក់ ស្រី ១៦ ១៤៧នាក់សាធារណរដ្ឋកូរ៉េ មានចំនួន ៨ ២២៤នាក់ ស្រី ២ ៣០៣នាក់ ប្រទេសជប៉ុន មានចំនួន ៦ ២១៩នាក់ ស្រី ២ ៧១២​នាក់ ប្រទេសម៉ាឡេស៊ី មានចំនួន ០០នាក់ ស្រី ០០នាក់ ប្រទេសសិង្ហបុរី មានចំនួន ៣០នាក់ ស្រី ៣០នាក់ តំបន់រដ្ឋបាលពិសេសហុងកុង មានចំនួន ៣នាក់ ស្រី ៣នាក់ និង ព្រះរាជាណាចក្រអារ៉ាប់ប៊ីសាអូឌីត មានចំនួន
៣៨នាក់ ស្រី ៣៨នាក់។

លោក កត្តា អ៊ន បានបញ្ជាក់ថា គិតត្រឹមខែតុលា ឆ្នាំ២០២៣ កម្ពុជាបានផ្តល់ឱកាសការងារនៅក្រៅប្រទេសជូនប្រជាពលរដ្ឋបានចំនួន ១ ៣៥២៤៧៨នាក់ ស្រីចំនួន ៥៥១ ១៧០នាក់ ក្នុងនោះរួមមាន៖ ប្រទេសថៃ មានចំនួន ១ ២៥៦ ២៩៤នាក់ ស្រី ៥០៦ ០២១នាក់ សាធារណរដ្ឋកូរ៉េ មានចំនួន ៥១ ១៣៦នាក់ ស្រី ១២ ៤៣៣នាក់ ប្រទេសជប៉ុន មានចំនួន ២១ ៣៤៤នាក់ ស្រី ៩ ៩៣០នាក់ ប្រទេសម៉ាឡេស៊ី មានចំនួន ២២ ៥៧២នាក់ ស្រី ២១ ៦៥៤នាក់ ប្រទេស​សិង្ហបុរី មានចំនួន ៨៦៩ នាក់ ស្រី ៨៦៩ នាក់តំបន់រដ្ឋបាលពិសេសហុងកុង មានចំនួន ២១៦ នាក់ ស្រី២១៦នាក់ និងព្រះរាជាណាចក្រអារ៉ាប់ប៊ីសាអូឌីត មានចំនួន៤៧ នាក់ ស្រី៤៧នាក់។ លោក​បាន​បន្ត​ទៀតថា ​ពលករទាំង​នោះ​ទៅ​ធ្វើការ​ផ្នែក​កសិកម្ម​ឧស្សាហកម្ម ​សំណង់​ ​ការងារ​ផ្ទះ​ និង​ការងារ​ផ្សេងៗ​ដោយ​ពួកគេ​ផ្ញើ​ប្រាក់​ត្រឡប់​មក​ប្រទេស​កម្ពុជា​វិញ​ជិត៣ពាន់លានដុល្លារ។

បើ​តាម​លោក កត្តា អ៊ន ពលករ​ទៅ​ធ្វើការ​នៅ​ប្រទេស​ថៃ​ជា​មធ្យម​ទទួល​បាន​ប្រាក់ខែ ៤០០ដុល្លារ ក្នុង១ខែ ប្រទេស​ម៉ាឡេស៊ី​ទទួល​បាន​ប្រាក់ខែ ៣៤០ ដុល្លារ ប្រទេស​អា​រ៉ា​ប៊ី​សា​អូឌីត​ទទួល​បាន​ប្រាក់​ខែ ៤០០ ដុល្លារ ប្រទេស​ជប៉ុន​ទទួល​បាន​ប្រាក់ខែ ១៤០០ ដុល្លារ ប្រទេស​សិង្ហបុរី​ទទួល​បាន​ប្រាក់​ខែ ៥០០ ដុល្លារ កូរ៉េខាងត្បូង​ទទួល​បាន​ប្រាក់ខែ ១៥០០ ដុល្លារ និង​តំបន់​សេដ្ឋកិច្ច​ពិសេស​ហុងកុង​ទទួល​បាន​ប្រាក់ខែ ៥៩១ដុល្លារក្នុង១ខែ៕

អត្ថបទ៖ សំអឿន