ថៃ បញ្ចេញលុយជាង ១.៤៣ លានដុល្លារទិញធានារ៉ាប់រងដល់ទេសចរបរទេស

នាយករដ្ឋមន្ត្រីថៃលោក សេដ្ឋា ថាវីស៊ីន បញ្ជាឲ្យរៀបចំកញ្ចប់ធានារ៉ាប់រងដល់ភ្ញៀវទេសចរបរទេសដែលចូលមកលេងកម្សាន្តប្រទេសថៃ អំឡុងពេលចូលឆ្នាំ​សកលដើម្បីការពារគ្រោះថ្នាក់ និងការស្លាប់ណាមួយជាយថាហេតុ ។

តាមការបញ្ជាក់ពីក្រសួងទេសចរណ៍ និងកីឡាបានឲ្យដឹងថា ថៃ​នឹងរៀបចំថវិកាប្រមាណ ៥០ លានបាត ​ឬប្រហែលជាង​ ១.៤៣ លានដុល្លារពីមូលនិធិកណ្តាល ដើម្បីទិញការធានារ៉ាប់រងសម្រាប់ភ្ញៀវទេសចរដែលមកទស្សនាប្រទេសថៃ ក្នុងអំឡុងបុណ្យចូលឆ្នាំថ្មី ។

ការរៀបចំថវិកាធានារ៉ាប់រងនេះគឺក្នុងគោលបំណងដើម្បីស្តារកិត្តិយសឡើងវិញ បន្ទាប់ពីមានបញ្ហាកើតឡើងលើទេសចរបរទេស ២ រូបដែលត្រូវចូលពេទ្យសង្រ្គោះបន្ទាន់ ។

ទេសចរជនជាតិតៃវ៉ាន់ម្នាក់ ត្រូវបានក្រុមគ្រូពេទ្យបដិសេធមិនទទួលបានការព្យាបាលបន្ទាន់នៅមន្ទីរពេទ្យឯកជនមួយក្នុងតំបន់ Pattanakarn ហើយបានស្លាប់ នៅពេលធ្វើដំណើរទៅកាន់មន្ទីរពេទ្យទី ២ ដែលមានចម្ងាយប្រហែល ១០ គីឡូម៉ែត្រ ។

ខណៈករណីទី ២ ពាក់ព័ន្ធនឹងអ្នកទេសចរជនជាតិអៀរឡង់ម្នាក់ ដែលបានទទួលការព្យាបាលក្នុងបន្ទប់សង្គ្រោះបន្ទាន់នៃមន្ទីរពេទ្យឯកជនមួយកន្លែង ដោយសារជំងឺគ្រុនឈាម ប៉ុន្តែថ្លៃស្នាក់នៅមានរហូតដល់ជិត ៣ ពាន់ដុល្លារឯណោះក្នុងមួយយប់ ។

គួរឲ្យដឹងថា ​ថៃ​បាន​ទទួល​ភ្ញៀវ​ទេសចរ​បរទេស​ជាង ​២៤ ​លាន​នាក់​ក្នុង​ឆ្នាំ​នេះ ហើយ​កំពុង​ស្ថិត​ក្នុង​ផ្លូវ​ដើម្បី​សម្រេច​បាន​គោលដៅ​ចំនួន​ ២៨​ លាន​នាក់ ​៕

ប្រែសម្រួល៖ នាង រតនៈ

ប្រភព៖ Thai PBS