រថយន្តដឹកប្រេងរាប់រយគ្រឿងផ្ទុះឆេះ បង្កអគ្គិភ័យសន្ធោសន្ធៅនៅព្រំដែនអាហ្វហ្គានីស្ថាន-អ៊ីរ៉ង់

មនុស្សយ៉ាងតិច៦០នាក់បានរងរបួសនៅពេលរថយន្តដឹកប្រេងរាប់រយគ្រឿងបានផ្ទុះឡើងក្នុងអគ្គិភ័យដ៏ធំដែលបានកម្ទេចប៉ុស្តិ៍គយមួយកន្លែងក្នុងប្រទេស អាហ្វហ្គានីស្ថាន ជាប់ព្រំដែនអ៊ីរ៉ង់។

ហេតុការណ៍នេះបានបណ្តាលឲ្យមានការរំខានដល់ការផ្គត់ផ្គង់ថាមពលនិងធ្វើឲ្យខាតបង់ក្នុងទំហំទឹកប្រាក់រាប់លានដុល្លារ។

អាជ្ញាធរអ៊ីរ៉ង់បានបញ្ជូនរថយន្តពន្លត់អគ្គិភ័យនិងសង្គ្រោះជាច្រើនគ្រឿងឆ្លងកាត់ព្រំដែន ស្របពេលដែលអ្នកស្រុកជាច្រើនបានប្រយុទ្ធនឹងអគ្គិភ័យនៅក្នុងទីក្រុងព្រំដែន Qala។

របាយការណ៍ដំបូងបាននិយាយថា អគ្គិភ័យបានចាប់ផ្តើមបន្ទាប់ពីរថយន្តដឹកប្រេងផ្ទុះ។ ក្រោយមក ក្រុមមន្ត្រីបានឲ្យដឹងថា មូលហេតុមិនទាន់ត្រូវបានគេដឹងច្បាស់នៅឡើយទេ។

លោក Waheed Qatali អភិបាលខេត្ត Herat ភាគខាងលិចបាននិយាយថា អាជ្ញាធរអ៊ីរ៉ង់និងបុគ្គលិកដឹកនាំដោយអង្គការណាតូនៅក្នុងប្រទេសអាហ្វហ្គានីស្ថាន ត្រូវបានគេស្នើសុំជំនួយដើម្បីទប់ទល់អគ្គិភ័យដែលបានបំផ្លាញហេដ្ឋារចនាសម្ព័ន្ធអគ្គិសនីដោយធ្វើឲ្យទីរួមខេត្ត Herat គ្មានអគ្គិសនីប្រើប្រាស់។

វីដេអូក្នុងទូរទស្សន៍បានបង្ហាញពី ផ្សែងខ្មៅនិងអណ្តាតភ្លើងក្រាស់នៅលើមេឃជុំវិញកន្លែងកើតហេតុ។

ទីភ្នាក់ងារសារព័ត៌មានរដ្ឋអ៊ីរ៉ង់ IRNA បានដកស្រង់សម្តីលោក Jilani Farhad អ្នកនាំពាក្យអភិបាលខេត្ត Herat ដែលនិយាយថា អគ្គិភ័យត្រូវបានគ្រប់គ្រងប៉ុន្តែរថយន្តប្រហែល៥០០ត្រូវបានដុតបំផ្លាញ។

មន្ត្រីម្នាក់បានប្រាប់រ៉យទ័រថា មនុស្ស៦០នាក់បានរងរបួស។ យ៉ាងណាក្តី មន្ត្រីអាហ្វហ្គានីស្ថានបានផ្តល់ចំនួនអ្នកស្លាប់និងរបួសទាបជាងនេះប៉ុន្តែនិយាយថា តួលេខអាចកើនឡើង៕

ប្រែសម្រួលដោយ៖ Vann Vann

ប្រភព៖ Reuters