អ្នកនាំពាក្យអំពាវនាវឲ្យអ្នកបង្កគ្រោះថ្នាក់ចរាចរណ៍​នៅផ្លូវ៦០ម៉ែត្រ ចូលខ្លួនដោះស្រាយតាមនីតិវិធី

លោកវរសេនីយ៍ឯក សំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញ នៅព្រឹកថ្ងៃទី១២ ខែកុម្ភៈ ឆ្នាំ២០២៤​នេះ បានអំពាវនាវឲ្យអ្នកបើករថយន្តបង្កគ្រោះថ្នាក់ចរាចរណ៍នៅផ្លូវ៦០ម៉ែត្រ ក្នុងភូមិសាស្ដ្រខណ្ឌដង្កោ ចូលខ្លួនមកសារភាព និងដោះស្រាយ ដើម្បីអនុវត្តតាមនីតិវិធីច្បាប់។

បើតាមលោកវរសេនីយ៍ឯក សំ វិច្ឆិកា ករណីនេះមន្ត្រីជំនាញការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ បានចុះស្រាវជ្រាវជាបន្ទាន់នៅកន្លែងកើតហេតុនោះរួចហើយ ដើម្បីប្រមូលព័ស្ថុតាងក្នុងការតាមស្វែងរករថយន្តបង្កយកមកអនុវត្តតាមនីតិវិធី។

សូមបញ្ជាក់ថា កាលពីវេលាម៉ោង២១និង៣០នាទីយប់ ថ្ងៃទី១១ ខែកុម្ភៈ ឆ្នាំ២០២៤ មានករណីគ្រោះថ្នាក់ចរាចរណ៍មួយកើតឡើងរវាងរថយន្ត និងម៉ូតូ ត្រង់ចំណុចផ្លូវ៦០ម៉ែត្រ ស្ថិតនៅភូមិព្រែកថ្លឹង សង្កាត់ជើងឯក ខណ្ឌដង្កោ បណ្ដាលឱ្យរងរបួសស្រាលចំនួន០២នាក់ និងស្លាប់ ក្មេងស្រីចំនួន១នាក់ បន្ទាប់ពីកើតហេតុរថយន្ដបង្កបានបើករត់គេចខ្លួនបាត់៕

អត្ថបទ៖ សុខុម